Хитойлик ишбилармонлар Амударё туманига ташриф буюриб, ҳамкорлик истиқболларини муҳокама қилди
Яқинда Хитой Халқ Республикасидан ишбилармонлар делегацияси Амударё туманига ташриф буюриб, ҳудуднинг иқтисодий ва инвестициявий имкониятлари билан танишди. Мазкур ташриф туманда янги сармоявий лойиҳаларни амалга ошириш, туманнинг туристик салоҳиятини ривожлантириш ва саноат тармоқларини кенгайтириш учун муҳим асос яратиб, кенг имкониятлар эшигини очиши кўзда тутилмоқда.
Ташриф давомида меҳмонлар туман ҳокими Собир Хўжаметов ҳамроҳлигида “Чилпиқ” тарихий ёдгорлигига бориб, сайёҳлик имкониятларини ўрганди. Шунингдек, объект атрофида замонавий меҳмонхоналар, туристик хизматлар марказлари ва инфратузилма объектларини барпо этиш бўйича таклифлар билдирилди.
Туризм нафақат маданий, балки иқтисодий ривожланишда ҳам муҳим аҳамиятга эга. Жаҳонда кўплаб давлатлар ушбу соҳа орқали хорижий инвестицияларни жалб этиб, янги иш ўринлари яратмоқда. Амударё тумани бой тарихий ва маданий мероси билан бу йўналишда улкан салоҳиятга эга.
Ишбилармонлар ташриф давомида Бештом маҳалласида жойлашган “VORIS CHINA” МЧЖ фаолияти ва корхонада каолин қазиб олишни кенгайтириш лойиҳалари билан ҳам танишди.
Каолин – юқори сифатли оқ гил бўлиб, керамика, қоғоз, косметика, фармацевтика ва қурилиш материаллари саноатида кенг қўлланилади. Ушбу минералдан тайёрланган маҳсулотлар қурилиш ва саноатда муҳим ресурс саналади. Каолин ишлаб чиқариш ҳажмини ошириш туман иқтисодиётига салмоқли ҳисса қўшиб, экспорт ҳажмини кенгайтиришга ҳам хизмат қилади.
Сўнгги йилларда Амударё тумани иқтисодий ривожланишнинг янги босқичига кириб, хорижий сармоядорлар учун кенг имкониятлар яратмоқда. 2024 йил давомида қиймати 2,2 трлн сўмлик 37 инвестиция лойиҳаси амалга оширилиб, 811 та иш ўрни яратилди. 2025 йилда эса 317,8 млрд сўмлик 39 лойиҳа доирасида 732 та янги иш ўрни ташкил этилиши режалаштирилган.
Президентимизнинг тегишли Фармони доирасида 2022-2025 йилларда умумий қиймати 120,3 млрд сўмлик 40 та лойиҳа амалга оширилиши ва 267 та иш ўрни яратилиши белгиланган. Ҳозиргача 85,1 млрд сўмлик 34 та лойиҳа амалиётга татбиқ этилиб, 201 та иш ўрни ташкил этилди.
2025 йилда 24,2 млн долларлик экспорт прогноз қилинган бўлиб, шундан 18,8 млн доллари саноат маҳсулотлари, 5,4 млн доллари эса мева-сабзавот маҳсулотлари ҳиссасига тўғри келади. Шунингдек, хорижий инвестициялар доирасида 25 млн долларлик 4 та лойиҳа амалга оширилиши режалаштирилган.
Президентимизнинг “Қорақалпоғистон Республикасида тадбиркорларга қулай шароитлар яратишга оид қўшимча чора-тадбирлар тўғрисида”ги Фармони асосида 920,7 млрд сўмлик 25 та лойиҳа учун тўғридан-тўғри ер ажратилиб, 976 та янги иш ўрни яратилиши кўзда тутилган. Жумладан, 2025 йилда 493,3 млрд сўмлик 16 та, 2026-2029 йилларда 402,3 млрд сўмлик 6 та лойиҳа амалга оширилиши белгиланган.
Хитойлик ишбилармонларнинг ташрифи туманнинг иқтисодий ривожи ва инвестиция муҳитини янада жозибадор қилишда муҳим аҳамият касб этади. Туризм ва саноат соҳаларидаги ҳамкорлик, каолин ишлаб чиқаришни кенгайтириш, янги меҳмонхоналар ва инфратузилма объектларини барпо этиш лойиҳалари эса ҳудуднинг инвестиция салоҳиятини янада юксалтиришга хизмат қилади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
