Маҳаллаларда хавфсиз муҳитни яратиш борасидаги ишлар жадаллаштирилмоқда

Кейинги йилларда мамлакатимизда жиноятчиликка қарши курашиш ва ҳуқуқбузарликларнинг олдини олиш бўйича кенг кўламли ислоҳотлар амалга оширилмоқда. Мазкур ислоҳотлар доирасида аҳолининг тинч ва осойишта ҳаётини таъминлаш ҳамда жамоат хавфсизлиги маданиятини шакллантириш бўйича ижобий натижаларга эришилмоқда. Бундан ташқари, ҳуқуқбузарликлар профилактикаси ва уларнинг олдини олиш, шунингдек фуқароларга юксак ҳуқуқий маданият ва қонунга ҳурмат туйғусини сингдириш борасидаги ҳуқуқий механизмлар ҳам янада такомиллаштирилмоқда.

Жорий йилнинг 3 январь санасида имзоланган Ўзбекистон Республикаси Президентининг “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори бу борада муҳим дастуруламал бўлмоқда.

2 апрель куни Амударё тумани ҳокимлигининг мажлислар залида Президент қарори ижросини таъминлаш борасида амалга оширилаётган ишлар ва келгусидаги режаларга бағишланган йиғилиш бўлиб ўтди. Унда Қорақалпоғистон Республикаси Ички ишлар вазирининг биринчи ўринбосари Жасурбек Атаев, туман ҳокими Собир Хўжаметов, туман Прокуратураси, Ички ишлар бўлими масъуллари, ҳоким ўринбосарлари, бўлимлар, ташкилотлар раҳбарлари ҳамда “Маҳалла еттилиги” масъуллари иштирок этдилар.

Йиғилишни туман ҳокими Собир Хўжаметов кириш сўзи билан очиб берди. Туман ҳокими ўз сўзида бугунги кунда ҳуқуқбузарликларнинг олдини олиш, жиноятчиликни жиловлаш масаласи давлат сиёсати даражасига кўтарилганлигини, жиноятчиликка қарши курашиш, ҳуқуқбузарликларнинг профилактикаси юзасидан ҳуқуқни муҳофаза қилувчи органлар билан бирга мутасадди идоралар зиммасига муҳим вазифалар юкланганлигини ҳамда бу борадаги ислоҳотлар ижросини таъминлаш бўйича қатор чора-тадбирлар амалга оширилаётгани хусусида сўз юритди.

Қорақалпоғистон Республикаси Ички ишлар вазирининг биринчи ўринбосари Жасурбек Атаев сўзга чиқиб, юқоридаги Президент қарори билан белгилаб берилган маҳаллаларда хавфсиз муҳитни яратиш борасидаги устувор вазифалар хусусида сўз юритди.

Хусусан, жорий йилда “Ҳар бир маҳаллада ҳуқуқбузарликларнинг барвақт олдини олиш” устувор вазифа этиб белгиланиб, ишлаш механизмлари жорий этилди.

2024 йилда жиноят содир этилган ҳар бир маҳаллада криминоген вазиятни барқарорлаштириш ҳамда жиноятларни барвақт профилактика қилишнинг маҳаллалар кесимида чораклик манзилли чора-тадбирларини белгилаган ҳолда маҳалла — туман — вилоят даражасида унинг ижроси учун бевосита масъул раҳбарлар бириктирилганлиги ва аниқ соҳавий жавобгарлик юкланганлиги таъкидланди.

Шунингдек, қарор билан криминоген вазият оғир маҳаллаларда илмий-амалий ёндашувлар асосида жойларга чиққан ҳолда мақсадли ўрганишларни ўтказиш орқали ҳуқуқбузарликларга сабаб бўлаётган асл омилларни аниқлаш ва барҳам бериш бўйича ташкилий-ҳуқуқий чораларни кўриш, маҳаллаларда ёшлар, аёллар ва ишсизлар томонидан, шунингдек, оила-турмуш муносабатлари доирасида содир этиладиган жиноятларнинг олдини олишда “маҳалла еттилиги” ҳар бир вакилининг аниқ масъулиятини белгилаш, ушбу тоифадаги ҳуқуқбузарликлар профилактикасига янгича иш услубларини татбиқ қилиш белгилаб берилган асосий вазифалардан экани таъкидланди.

Қолаверса, йиғилиш мобайнида аҳолининг ҳуқуқий онги, ижтимоий фаоллиги ва фуқаролик масъулиятини ошириш, жиноят содир этилишига сабаб бўлиши мумкин бўлган ижтимоий муаммоларни ҳал этишга жамоатчилик вакиллари, нуронийлар ва маҳалла фаолларини кенг жалб этиб бориш, маҳаллалар жамоат жойлари ва яшаш хонадонларида хавфсиз муҳит яратиш, фуқаролар ҳаёти, соғлиғи ва мол-мулкига ҳар қандай тажовузларнинг олдини олиш мақсадида ҳуқуқбузарликлар профилактикасига замонавий рақамли технологиялар ва техник воситаларни кенг жорий этиш лозимлиги таъкидланди.

Чарос Арслонова, туман ҳокимлигининг Ахборот хизмати раҳбари.