“Ёш чегарачилар” ҳарбий-ватанпарварлик мусобақаси ўтказилди

Ёшларни миллий қадриятлар ва маданиятга бўлган таҳдидлар ҳамда ёт ғоялардан асраш, ҳар томонлама ривожланган, замонавий билим ва ҳунарларни пухта эгаллаган, миллий анъаналарга садоқатли, дунёқараши кенг, ватанпарвар ва баркамол қилиб тарбиялаш мақсадида ҳар йили “Ёш чегарачилар” ҳарбий-ватанпарварлик мусобақаси ўтказиб келинмоқда. Амударё туманида ҳам шу каби мусобақа ташкил қилинди.

Туманнинг Дўстлик маҳалласи ҳудудида жойлашган марказий ўйингоҳда ўтказилган мусобақада Давлат хавфсизлик хизмати чегара қўшинлари масъул офицери Отабек Мадалимов, ҳарбий хизматчилар Миржаҳон Мажидов, Рустам Ваҳобов ҳамда умумтаълим мактаблари ўқувчи ёшлари иштирок этдилар.

Тадбирни Давлат хавфсизлик хизмати чегара қўшинлари масъул офицери Отабек Мадалимов кириш сўзи билан очди. У ўз сўзида ҳарбий мусобақалар ёшларнинг камолотига ҳар томонлама ёрдам бериши, фақатгина жисмоний тайёргарлигини ошириб қолмасдан, интизом, жамоавий ишлаш, стратегик фикрлаш ва руҳий барқарорлик каби муҳим фазилатларини ҳам ривожлантириши хусусида сўз юритди.

Таъкидланганидек, ушбу мусобақа Ўзбекистон Республикаси Вазирлар Маҳкамасининг “Республика чегараолди шаҳар ва туманларидаги умумий ўрта таълим мактабларида ташкил этилган “Ёш чегарачилар” клублари фаолиятини тартибга солиш ва қўллаб-қувватлаш чора-тадбирлари тўғрисида” қарори асосида ташкил этилган бўлиб, мазкур қарор бу борада муҳим дастуруламал бўлиб хизмат қилмоқда.

“Ёш чегарачилар” ҳарбий мусобақасининг туман босқичида 22-, 59-, 48-, 36- ва 15-сонли умумтаълим мактаблари ўқувчиларидан ташкил топган жамоалар иштирок этдилар.

Ҳар бир жамоада жами умумтаълим мактабларининг 10-11-синф ўқувчиларидан иборат 10 нафардан ўқувчи ёшлар, жами 50 нафар иштирокчи белгиланган шартлар асосида ўзаро беллашдилар.

Хусусан, мусобақа ўқувчи ёшлардан иборат жамоаларнинг саф тайёргарлиги кўриги, ҳарбий варақалар, альбом, вимпел, жамоанинг рамзий байроғи ва номи ёзилган тахтача кўриги, жамоаларнинг махсус формаси кўриги, умумтаълим фанлари бўйича тест синови, Калашников автоматини нотўлиқ қисмларга ажратиш ва йиғиш, ўғил болалар 1000 метрга, қизлар 100 метрга югуриш, турникда тортилиш, азимут бўйича ҳаракатланиш, граната улоқтириш, заҳарланган ҳудуддан ўтиш, тўсиқлар йўлагидан ўтиш, тиббий ёрдам кўрсатиш, ўқ-дориларни ташиш, Калашников автоматидан ўқ отиш, Калашников автоматининг макети кўриги каби қизиқарли шартлар асосида бўлиб ўтди.

Айтиш жоизки, умумтаълим мактабларида ташкил этилган “Ёш чегарачилар” клублари ҳамда ҳарбий-ватанпарварлик мусобақалари ёшларнинг маънавий-интеллектуал салоҳиятини ва дунёқарашини юксалтириш, уларни миллий қадрият ва анъаналарга ҳурмат руҳида тарбиялаш, ёшларда Амир Темур, Жалолиддин Мангуберди, Заҳириддин Муҳаммад Бобур, Нажмиддин Кубро каби буюк сиймоларнинг ватанпарварлик, мардлик ва жасурлик туйғуларини шакллантириш, Ватан ҳимоячисидек шарафли касбга ҳурмат ҳиссини уйғотиш, ёшлар ўртасида соғлом турмуш тарзини тарғиб қилиш, ёшларда чегараолди ҳудудларда юз бериши мумкин бўлган ёки содир бўлган фавқулодда вазиятларда тўғри ҳаракатланиш ва жабрланганларга ёрдам кўрсатиш кўникмаларини шакллантириш, уларнинг чидамлилигини ошириш ҳамда ҳар қандай қийинчиликларни матонат билан енгишга ўргатишда муҳим аҳамият касб этмоқда.

Муросасиз кечган мусобақанинг якуний натижаларига кўра 59-сонли мактаб жамоаси 3-ўринни, 15-сонли мактаб жамоаси 2-ўринни, 48-сонли мактаб жамоаси фахрли 1-ўринни эгаллади.

Ғолиблар ва фаол иштирокчилар диплом ҳамда эсдалик совғалари билан тақдирланди.

Чарос Арслонова, туман ҳокимлигининг Ахборот хизмати раҳбари.