ТУМАН КЕНГАШИ ДЕПУТАТИ Х.РАЖАБОВА ЎЗ САЙЛОВЧИЛАРИ ОЛДИДА ҲИСОБ БЕРДИ
Айни кунларда Халқ депутатлари туман Кенгашига сиёсий партиялардан сайланган депутатлар ўзларига юксак ишонч билдириб, сайловолди дастурини қўллаб-қувватлаган ва депутатликка сайлаган сайловчилари олдида 2025 йилнинг биринчи чорагида амалга оширган ишлари юзасидан ҳисобот беришмоқда. Бу борада Ўзбекистон Халқ демократик партиясидан сайланган депутатлар ҳамиша фаол. Улар сайловчилар ишончига муносиб тарзда фаолият олиб бориш билан бирга, аҳоли ҳаётига оид муаммоларни жойига чиққан ҳолда ўрганиш ва ўз ваколатлари доирасида тегишлича ҳал қилиш нафақат депутатлик бурчи, балки зиммаларидаги юксак масъулият эканини, сайловчилар олдида ҳамиша ҳисобдорлигини ҳис қилган ҳолда фаолият олиб боришмоқда.
Ўзбекистон Халқ демократик партиясидан Халқ депутатлари Амударё туман Кенгаши депутати, Ўзбекистон Ёзувчилар Уюшмаси аъзоси Хонимжон Ражабова ҳам ўзига катта ишонч билдирган Дурунки маҳалласи аҳолиси билан тез-тез учрашиб, улар билан самимий ва дилдан мулоқотлар ўтказиш орқали маҳалла аҳли ҳаётига доир муаммоларни тегишли ташкилотлар билан ҳамкорликда ижобий ҳал этиш чораларини кўрмоқда.
Депутат жорий йилнинг 11 апрель санасида Амударё туман Мактабгача ва мактаб таълими бўлими тасарруфидаги 56-сонли умумтаълим мактабида бўлиб, мактаб педагогика жамоаси билан учрашди. Учрашувда Хонимжон Ражабова ўз депутатлик фаолиятининг дастлабки уч ойи давомида амалга оширган ишлари юзасидан ҳисоботини тақдим этди.
Хусусан, маҳалла ҳудудида истиқомат қилувчи ногиронлиги бўлган фуқароларни, ўзгалар парваришига муҳтож якка-ёлғизларни ижтимоий қўллаб-қувватлаш, кам таъминланган оилалардаги меҳнатга лаёқатли аҳолининг бандлигини таъминлашга қаратилган чора-тадбирларнинг ижобий самараси ҳақида сўз юритиб, бу каби ишлар ЎзХДПнинг доимий диққат марказидаги вазифалар сирасига киришини алоҳида таъкидлади.
Айниқса, ёш авлод таълим-тарбияси борасидаги ишларни жаҳон андозалари даражасига кўтаришга қаратилган саъй-ҳаракатлар туфайли тумандаги, шу баробарида Дурунки маҳалласи ҳудудидаги умумтаълим мактаблари ва мактабгача таълим ташкилотлари нафақат туманда, балки Қорақалпоғистон Республикаси миқёсидаги ҳам энг намунали таълим-тарбия муассасалари сафидан жой олганини алоҳида эътироф этди.
Учрашув давомида 56-сонли мактаб ўқитувчилари томонидан мактаб ва маҳалла ҳамкорлиги, инфратузилма масалалари ҳамда ўзининг ижодий фаолияти юзасидан тушган саволларга депутат батафсил жавоблар берди ва мактаб кутубхонасига яқинда нашрдан чиққан "Умр карвони" китобини совға қилди .
Шу куни депутат Хонимжон Ражабова Насиба Жуманиёзова раҳбарлигидаги 8-сонли Давлат мактабгача таълим ташкилоти тарбиячи-педагоглари билан ҳам учрашди. Учрашувда депутат мамлакатимизда мактабгача таълим тизимида амалга оширилаётган жиддий ислоҳотлар хусусида батафсил тўхталиб, бу борада Ўзбекистон Халқ демократик партияси томонидан ҳаётга изчиллик билан татбиқ этилаётган ўзгаришлар, МТТларга қамров даражасининг кескин ошиб бораётгани, хусусий тадбиркорлик йўналиши жадал ривожланиб, давлат-хусусий шериклик асосидаги, шунингдек, кўплаб нодавлат МТТлар ташкил этилаётгани ҳақида сўз юритди.
Шу билан бирга, Хонимжон Ражабова 2025 йилнинг биринчи чораги давомида олиб борган ўз депутатлик фаолияти бўйича йиғилганларга ҳисобот берди.
Учрашув якунида депутат ушбу МТТ ходимларига ҳам ўзининг "Умр карвони" номли китобини совға қилди. Дурункилик сайловчилар билан ошкора ва самимий мулоқот тарзида, шаффофлик асосида бўлиб ўтган мазкур учрашувлар сайловчилар билан депутатни бир-бирига янада яқинлаштиргани билан муҳим аҳамият касб этди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
