Педагогларни аттестациядан ўтказиш ва малакасини сертификатлаш тартиби, рағбатлантириш тизимини такомиллаштирилмоқда

Ўзбекистон Республикаси Вазирлар Маҳкамасининг 2025 йил 28 февралдаги 130-сонли қарори билан педагогларни аттестациядан ўтказиш, малака сертификатлаш ва рағбатлантириш тизимини такомиллаштириш бўйича айрим ҳукумат қарорларига ўзгартириш ва қўшимчалар киритилди.

Ушбу қарорга кўра, 2025 йил 1 сентябрдан бошлаб:

1. Мажбурий аттестациядан озод этиладиган педагоглар:

Қуйидаги тоифадаги педагоглар аттестациядан мажбурий равишда ўтказилмайди ва уларга мавжуд малака тоифаси (лавозими) бўйича иш ҳақи тўланади:

15 йил давомида узлуксиз равишда олий малака тоифасини (бош ўқитувчи лавозимини) сақлаб келганлар;

25 йил ва ундан ортиқ педагогик иш стажига эга бўлганлар;

Пенсияга чиқишига 5 йилдан кам вақт қолганлар;

Пенсия ёшига етган, ҳозирда ҳам педагогик фаолият билан шуғулланаётганлар.

2. Тўғридан-тўғри малака тоифаси бериладиганлар:

Қуйидаги педагогларга бевосита малака тоифаси берилади:

25 йил ва ундан ортиқ педагогик стажга эга бўлганларга – уларнинг амалдаги малака тоифаси (лавозими);

Пенсияга чиқишига 5 йилдан кам вақт қолганларга – амалдаги малака тоифаси (лавозими);

15 йил давомида олий малака тоифасини сақлаганларга – бош ўқитувчи лавозими (яъни олий малака тоифаси).

3. Истакка кўра навбатдан ташқари аттестация:

Педагоглар истагига кўра навбатдан ташқари аттестациядан ўтиб, агар юқорироқ малака тоифасини олса, уларга янги тоифа бўйича сертификат амал қиладиган муддат давомида иш ҳақи тўланади.

4. Қўшимча тартиблар:

Мусиқа, маданият ва жисмоний тарбия фанлари ўқитувчилари, пенсия ёшидаги ва олий маълумотга эга бўлмаган педагоглар ҳам аттестациядан ўтказилади.

Мактабгача ва мактаб таълими тизимидаги фаол ёки илгари ишлаган малакали педагог кадрлар рағбатлантирилади.

Мактабгача ва мактаб таълими вазири фонди фаолияти такомиллаштирилади.

Бу янгиликлар, асосан, тажрибали педагогларни қўллаб-қувватлашга, уларнинг меҳнатини қадрлашга ва таълим тизимида сифатни оширишга қаратилган.

Назокат Мадиёрова, Амударё тумани Адлия бўлими Давлат хизматлари маркази бош мутахассиси