“Коррупция - ёшлар келажагига таҳдид солувчи иллат” мавзусида тадбир бўлиб ўтди

Коррупция жамият ва давлат ривожи учун хавфли иллат саналади. У инсон ҳуқуқлари, қонун устуворлиги ва келажак авлоднинг ёруғ истиқболига путур етказади. Шу сабабли юртимизда коррупцияга қарши муросасиз ва тизимли кураш олиб борилмоқда. Айниқса, ёшларнинг ҳуқуқий онги ва фуқаролик масъулиятини юксалтириш, уларни адолатпарварлик ва ҳалоллик руҳида тарбиялаш бу борада устувор вазифалардан бирига айланган.

Шу мақсадда Қорақалпоғистон қишлоқ хўжалиги ва агротехнологиялар институтида “Коррупция – ёшлар келажагига таҳдид солувчи иллат” мавзусида маънавий-маърифий тадбир ташкил этилди.

Унда Қорақалпоғистон Республикаси Вазирлар Кенгаши ҳузуридаги Коррупцияга қарши курашиш бўлими бошлиғи Б.Матмуратов, Бош прокуратура ҳузуридаги Иқтисодий жиноятларга қарши курашиш департаменти Қорақалпоғистон Республикаси бошқармаси бўлим бошлиғи Р.Садиков, Қорақалпоғистон Республикаси Олий таълим, фан ва инновациялар вазирлигининг Коррупцияга қарши курашиш бўлими бошлиғи М.Халиев, институт ректори Б.Жоллибеков ва барча факультет деканлари, профессор-ўқитувчилар, талаба-ёшлар иштирок этди.

Тадбирни институт ректори Б.Жоллибеков кириш сўзи билан очди ва олиб борди. Ўз нутқида у таълим соҳасида коррупцияга мутлақо йўл қўйиб бўлмаслиги, бу иллат халқ фаровонлиги учун амалга оширилаётган ислоҳотларнинг самарадорлигига жиддий таъсир кўрсатиши, давлат ва жамият тараққиётига тўсиқ бўлиши ҳақида алоҳида тўхталиб ўтди. Шу муносабат билан ёш авлод онгида адолат, қонунийлик ва ҳалоллик тамойилларини шакллантириш устувор вазифа экани таъкидланди.

– Агар таълим тизимида шаффофлик, ҳалоллик ва адолат принциплари таъминланмаса, келажакдаги раҳбарлар, олимлар, муҳандислар, фермерлар ва турли соҳалардаги мутахассислар орасидан юксак маънавиятли, виждонли инсонлар етишиб чиқмайди, – деди институт ректори.

Тадбир давомида масъуллар томонидан коррупциянинг жамият ривожига кўрсатаётган салбий оқибатлари, давлат бошқаруви, иқтисодиёт ва ижтимоий ҳаётга келтираётган зарарли таъсири, аҳолининг давлат органларига бўлган ишончига салбий таъсир кўрсатаётгани батафсил таҳлил этилди.

Хусусан, қишлоқ хўжалиги соҳаси нафақат иқтисодиётнинг асосий устуни, балки аҳоли турмуш даражаси, озиқ-овқат хавфсизлиги ва минтақавий барқарорликни таъминловчи ҳал қилувчи тармоқ сифатида алоҳида ўрин тутади. Шу боис, ушбу соҳада шахсий манфаатлар устуворлиги, асоссиз қарорлар, қонунбузарлик ва масъулиятсизлик каби иллатлар кенг жамоатчилик ишончига ҳам путур етказиши, иқтисодий барқарорликни издан чиқариши мумкинлиги таъкидланди.

Тадбир давомида юртимизда коррупцияга қарши шакллантирилган институционал тизим, қабул қилинган меъёрий-ҳуқуқий ҳужжатлар, амалга оширилаётган профилактик чора-тадбирлар ҳақида атрофлича маълумот берилди. Сўнгги йилларда бу борада Президент ташаббуси билан қабул қилинган дастурлар, назорат тизимлари ва жамоатчилик иштирокини таъминлашга қаратилган чоралар натижасида мамлакатимизда фуқароларнинг ҳуқуқий онги ошгани, мурожаатлар сонининг ўсгани ва коррупцияга нисбатан муросасиз муносабат шаклланаётгани таъкидланди.

Айтиш жоизки, мазкур учрашув Президент раислигида 2025 йил 5 март куни бўлиб ўтган кенгайтирилган йиғилишда берилган топшириқлар ижросини таъминлаш доирасида ташкил этилди.

Тадбир талаба-ёшлар билан очиқ мулоқот, ҳаётий мисоллар ва таҳлиллар асосида ўтказилиб, уларда ҳуқуқий билим ва фаол фуқаролик позициясини мустаҳкамлашга хизмат қилди. Чунки айнан ёшлар — эртанги куннинг ҳал қилувчи кучи, мамлакат тақдирини белгилайдиган авлоддир.

Шоҳзод Қурбонбоев.