Халқ жамоаларининг ҳисобот концерти бўлиб ўтди

Санъат — бу инсон қалби ва халқ руҳиятининг теран ифодасидир. У нафақат бадиий завқ бағишлайди, балки жамият маънавиятини юксалтириш, авлодлар ўртасида руҳий-маънавий боғлиқликни таъминлашда ҳам беқиёс аҳамият касб этади. Хусусан, халқ санъати ўзининг соддалиги, самимийлиги ва чуқур маъно-мазмунига эга бўлган ифодалари орқали миллатнинг тарихи, урф-одатлари, анъаналари ва ҳаёт тарзини ўзида жамлаган. Куй ва қўшиқ, рақс, саҳна кўринишлари, оғзаки ижод намуналари орқали бу бебаҳо мерос асрлар давомида авлоддан авлодга ўтиб келмоқда.

Бугунги кунда ҳам халқ санъати ҳаётимизда муҳим ўрин тутади. Унинг ҳар томонлама ривожланиши, ёш истеъдодлар орқали янада бойиши ва кенг жамоатчиликка тарғиб этилиши миллий ўзлигимизни асраб келмоқда. Айниқса, ҳудудларда фаолият юритаётган халқ жамоалари бу борада муносиб ҳисса қўшиб, маданий меросимизни авлоддан авлодга етказишда муҳим роль ўйнамоқда.

24 июнь куни Амударё тумани Маданият бўлими ҳовлисида халқ жамоаларининг дастлабки 6 ойлик фаолиятига бағишланган ҳисобот концерти бўлиб ўтди. Тадбир “Учқун” ашула ва рақс халқ ансамбли, “Офарин” фольклор-этнографик халқ жамоаси ҳамда “Жайҳун мўъжизаси” анъанавий саҳна цирк халқ жамоаларининг ижодий чиқишлари билан иштирокчиларга хуш кайфият улашди.

Халқ жамоалари томонидан тақдим этилган ранг-баранг куй ва қўшиқлар, нафис рақслар, халқ ижоди намуналари ва саҳна томошалари иштирокчиларда унутилмас таассурот қолдирди. Тадбирда ўзбек ва қорақалпоқ халқ куйлари, Хоразм халқ мусиқалари ҳамда Комилжон Отаниёзов, Отажон Худайшукуров ва бошқа устоз санъаткорлар ижодига мансуб куй-қўшиқлар ижро этилди.

Шу билан бирга, концертда миллий ва замонавий эстрада куй-қўшиқлари ҳам ижро қилинди. Бу, айниқса, ёшлар томонидан катта қизиқиш билан қарши олинди.

Тадбир давомида халқимизнинг маданий меросини асраб-авайлаш, ёш истеъдодларни қўллаб-қувватлаш, ижодий фаолиятини мунтазам йўналтириш ва кенг оммага танитиш, шунингдек, ёш авлодни санъатга қизиқтириш, она Ватанга муҳаббат руҳида тарбиялаш ва бўш вақтларини мазмунли ташкил этишдаги самарали фаолияти учун халқ жамоалари туман ҳокимлиги томонидан “Ташаккурнома” билан тақдирланди. Бу каби эътироф ижодкорлар учун катта куч, янги илҳом ва масъулият манбаи бўлиб хизмат қилади.

Концерт дастуридан жой олган халқ қўшиқлари, миллий қадриятларимиз акс этган саҳна кўринишлари барчага бирдек манзур бўлди. Айниқса, ёш авлоднинг санъатга бўлган қизиқишини ошириш, уларни халқ ижодига ҳурмат руҳида тарбиялаш, бўш вақтларини мазмунли ташкил этиш борасида халқ жамоаларининг ўрни алоҳида эътироф этилди.

Тадбир якунида туман Маданият бўлими мудири Мурод Ибрагимов сўзга чиқиб, халқ санъати ва халқ жамоаларининг миллий маданиятимиздаги ўрнига тўхталди. Халқ ижоди миллат маънавиятининг таянчи экани, бундай жамоаларнинг маданий ҳаётимиздаги аҳамияти алоҳида таъкидланди. Шунингдек, барча иштирокчиларга, фаол санъаткор ва тадбир ташкилотчиларга самимий миннатдорлик билдирди.

Халқ санъати — бу халқнинг ўтмишини, бугуни ва келажагини боғловчи маънавий кўприкдир. У орқали миллат ўз ўзига, ўз тарихи ва қадриятларига янгича нигоҳ билан қарайди. Ушбу концерт дастури нафақат ҳисобот, балки халқ санъатига бўлган муҳаббат ва эҳтиром намунаси, миллий қадриятларимизни асраб-авайлашга қаратилган муҳим маънавий тадбир бўлди.

Шубҳасиз, бундай маънавий-маърифий тадбирлар ёш авлодни санъат орқали Ватанга муҳаббат, миллий ғурур ва фидойилик руҳида тарбиялашда, халқимизнинг юксак маданияти ва анъаналарини янада кенг тарғиб этишда муҳим аҳамият касб этади.

Шоҳзод Қурбонбоев.