Жиноятчиликнинг олдини олиш – барқарорлик ва тараққиёт кафолати

Бугун юртимизда хавфсизлик, қонун устуворлиги ва фуқаролар осойишталигини таъминлаш давлат сиёсатининг устувор йўналишларидан бири ҳисобланади. Жиноятчилик ва ҳуқуқбузарликларнинг барвақт олдини олиш, хавфсиз муҳитни яратиш масаласига алоҳида эътибор қаратилиб, ҳудудларда тизимли ишлар йўлга қўйилган.

Амударё тумани ҳокимлигининг катта мажлислар залида Қорақалпоғистон Республикаси прокурорининг биринчи ўринбосари Ойбек Шомуратов раҳбарлигида жиноятчилик ва ҳуқуқбузарликларнинг олдини олиш, қонун устуворлигини таъминлаш ҳамда ислоҳотлар ижроси каби муҳим ва долзарб масалаларга бағишланган кенгайтирилган йиғилиш бўлиб ўтди.

Мазкур йиғилишда туман ҳокими Собир Хўжаметов, ҳоким ўринбосарлари, тегишли бўлим ва ташкилотлар раҳбарлари, "Маҳалла еттилик"лари масъуллари иштирок этди. Асосий эътибор жиноятчиликка қарши курашиш, ҳуқуқбузарликларнинг олдини олиш, аҳолининг ҳуқуқий маданиятини юксалтириш ва энг муҳими – хавфсиз маҳалла тизимини такомиллаштиришга қаратилди.

Йиғилиш давомида Ўзбекистон Республикаси Президентининг 2025 йилда маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш бўйича қабул қилинган 1-сонли қарори ижроси юзасидан тузилган йўл хариталари бўйича олиб борилган ишлар чуқур таҳлил қилинди. Аниқланган камчиликлар юзасидан танқидий фикрлар билдирилиб, мавжуд муаммоларни бартараф этиш йўллари белгилаб олинди.

Таҳлилларга кўра, баъзи ҳудудларда профилактик ишлар етарли даражада олиб борилмаётгани, ёшлар билан ишлашда сусткашликка йўл қўйилаётгани, оилавий низоларни вақтида ҳал этмаслик каби омиллар жиноятчилик хавфини оширмоқда. Ушбу камчиликларни бартараф этиш, “Маҳалла еттилиги” институтининг фаоллигини кучайтириш, маҳалла профилактика инспекторлари, ижтимоий ходимлар ва имомлар ҳамкорлигида барқарор механизм яратилиши лозимлиги  таъкидланди.

Ойбек Шомуратов ўз чиқишида жиноятчиликка қарши курашиш фақатгина ҳуқуқ-тартибот идораларининг вазифаси бўлиб қолмасдан, барча давлат идоралари, фуқаролик жамияти институтлари ва ҳар бир фуқародан бу борада чуқур масъулият талаб қилинишини алоҳида таъкидлади.

Йиғилиш якунида ҳудудларда жиноятчиликни камайтириш, хавфсиз муҳитни шакллантириш бўйича амалий чоралар, аниқ вазифалар белгилаб олинди. Жумладан, “хавфсиз ҳудуд” концепциясини тўлақонли амалга ошириш, ахборот-таҳлилий мониторингни кучайтириш, ёшлар билан ишлашни тизимли ташкил этиш каби йўналишлар бўйича масъулларга аниқ топшириқлар берилди.

Айтиш жоизки, жиноятчиликнинг олдини олишда тизимли ёндашув, ҳамжиҳатлик ва қатъият асосий омиллардан саналади. Аҳоли осойишталиги ва ҳуқуқий маданиятини юксалтириш эса нафақат бугуннинг, балки эртанги тараққиётнинг ҳам кафолатидир.

Чарос Арслонова, туман ҳокимлигининг Ахборот хизмати раҳбари.