Jinoyatchilikning oldini olish – barqarorlik va taraqqiyot kafolati

Bugun yurtimizda xavfsizlik, qonun ustuvorligi va fuqarolar osoyishtaligini taʼminlash davlat siyosatining ustuvor yoʻnalishlaridan biri hisoblanadi. Jinoyatchilik va huquqbuzarliklarning barvaqt oldini olish, xavfsiz muhitni yaratish masalasiga alohida eʼtibor qaratilib, hududlarda tizimli ishlar yoʻlga qoʻyilgan.

Amudaryo tumani hokimligining katta majlislar zalida Qoraqalpogʻiston Respublikasi prokurorining birinchi oʻrinbosari Oybek Shomuratov rahbarligida jinoyatchilik va huquqbuzarliklarning oldini olish, qonun ustuvorligini taʼminlash hamda islohotlar ijrosi kabi muhim va dolzarb masalalarga bagʻishlangan kengaytirilgan yigʻilish boʻlib oʻtdi.

Mazkur yigʻilishda tuman hokimi Sobir Xoʻjametov, hokim oʻrinbosarlari, tegishli boʻlim va tashkilotlar rahbarlari, "Mahalla yettilik"lari masʼullari ishtirok etdi. Asosiy eʼtibor jinoyatchilikka qarshi kurashish, huquqbuzarliklarning oldini olish, aholining huquqiy madaniyatini yuksaltirish va eng muhimi – xavfsiz mahalla tizimini takomillashtirishga qaratildi.

Yigʻilish davomida Oʻzbekiston Respublikasi Prezidentining 2025-yilda mahallalarda xavfsiz muhitni yaratish va huquqbuzarliklarning barvaqt oldini olish boʻyicha qabul qilingan 1-sonli qarori ijrosi yuzasidan tuzilgan yoʻl xaritalari boʻyicha olib borilgan ishlar chuqur tahlil qilindi. Aniqlangan kamchiliklar yuzasidan tanqidiy fikrlar bildirilib, mavjud muammolarni bartaraf etish yoʻllari belgilab olindi.

Tahlillarga koʻra, baʼzi hududlarda profilaktik ishlar yetarli darajada olib borilmayotgani, yoshlar bilan ishlashda sustkashlikka yoʻl qoʻyilayotgani, oilaviy nizolarni vaqtida hal etmaslik kabi omillar jinoyatchilik xavfini oshirmoqda. Ushbu kamchiliklarni bartaraf etish, “Mahalla yettiligi” institutining faolligini kuchaytirish, mahalla profilaktika inspektorlari, ijtimoiy xodimlar va imomlar hamkorligida barqaror mexanizm yaratilishi lozimligi  taʼkidlandi.

Oybek Shomuratov oʻz chiqishida jinoyatchilikka qarshi kurashish faqatgina huquq-tartibot idoralarining vazifasi boʻlib qolmasdan, barcha davlat idoralari, fuqarolik jamiyati institutlari va har bir fuqarodan bu borada chuqur masʼuliyat talab qilinishini alohida taʼkidladi.

Yigʻilish yakunida hududlarda jinoyatchilikni kamaytirish, xavfsiz muhitni shakllantirish boʻyicha amaliy choralar, aniq vazifalar belgilab olindi. Jumladan, “xavfsiz hudud” kontseptsiyasini toʻlaqonli amalga oshirish, axborot-tahliliy monitoringni kuchaytirish, yoshlar bilan ishlashni tizimli tashkil etish kabi yoʻnalishlar boʻyicha masʼullarga aniq topshiriqlar berildi.

Aytish joizki, jinoyatchilikning oldini olishda tizimli yondashuv, hamjihatlik va qatʼiyat asosiy omillardan sanaladi. Aholi osoyishtaligi va huquqiy madaniyatini yuksaltirish esa nafaqat bugunning, balki ertangi taraqqiyotning ham kafolatidir.

Charos Arslonova, tuman hokimligining Axborot xizmati rahbari.