ТУМАН ТИББИЁТ БИРЛАШМАСИДА МУСТАҚИЛЛИКНИНГ 34 ЙИЛЛИГИ КЕНГ НИШОНЛАНДИ

Мамлакатимиз мустақиллигининг 34 йиллигини халқимиз катта шодиёналар билан нишонлади. Меҳнат жамоаларида, жамоат ташкилотларида халқимиз томонидан 34 йил давомида эришилган ютуқлар, кенг миқёсли бунёдкорлик ишлари, ўз иш фаолиятлари жараёнида юқори натижаларга эришаётган юртдошларимиз меҳнатлари эътироф этилиб, уларга байрам совғалари топширилди.

Амударё тумани Тиббиёт бирлашмасининг тантаналар залида Тиббиёт бирлашмаси тасарруфидаги туман марказий шифохонаси бўлимлари, Кўп тармоқли марказий поликлиника, Оилавий поликлиникалар ва Оилавий шифокорлик пунктлари ходимлари иштирокида ўтказилган Мустақилликнинг 34 йиллиги байрам тадбири бирлашма меҳнат жамоаси учун бир умр эсда қоларли даражада ёрқин таассуротларга бой бўлди ва Мустақилликнинг 34 йиллиги шодиёналари қўшалоқ байрамга айланиб кетди. Шу куни Ўзбекистон Касаба уюшмалари қўмитаси ташкил топганлигининг 120 йиллиги ҳам кенг нишонланди.

Тантанали байрам тадбирини Тиббиёт бирлашмаси бош шифокори Шуҳрат Жуманиёзов очди ва барчани энг улуғ ва энг азиз байрам билан самимий табриклади. Шу билан бирга, Мустақиллик йилларида мамлакатимиз тиббиёт тизимида амалга оширилган ислоҳотлар, беморлар ва шифокорлар учун яратилаётган кенг имкониятлар, соҳада олиб борилаётган катта бунёдкорлик ишлари, шу баробарида туманимиз тиббиёти соҳасидаги ўзгаришлар, янгиланишлар, тобора замонавий қиёфа касб этаётган тиббий иншоотлар, барча шароитларга эга, замон талаблари даражасида бунёд этилган тиббий муассасалар хусусида батафсил сўз юритди.

Шунингдек, тадбирда сўзга чиққан Бирлашма касаба уюшмаси қўмитаси раиси Ибодулла Нуримбетов ва бошқалар Бирлашма ходимларини қўшалоқ байрам билан муборакбод этиб, узоқ йиллар ўзлари билан елкама-елка ишлаб, халқ саломатлигини сақлашдек эзгу вазифани адо этишда фидойилик намуналарини кўрсатган азиз устозлари билан боғлиқ хотираларни ёдга олдилар. Улар Бирлашма касаба уюшмаси томонидан инсон омилига кўрсатилаётган юксак эътибор ва рағбатдан мамнун эканликларини билдирдилар.

Шундан сўнг, Тиббиёт Бирлашмаси касаба уюшмаси қўмитаси раиси Ибодулла Нуримбетов тиббиёт ходимлари ўртасидаги спорт тарғиботи тадбирларида фаол иштирок этиш орқали фуқароларни “Саломатлик учун минг қадам”, “Саломатлик сайиллари” каби оммавий спорт тадбирларига жалб қилиш борасидаги хизматлари, шунингдек, тиббиёт ходимлари иштирокидаги турли спорт мусобақаларида қатнашиб, туман ва Қорақалпоғистон миқёсида фахрли ўринларни эгаллаган шифокор-спортчиларга Тиббиёт бирлашмаси касаба уюшма қўмитасининг эсдалик совғаларини топширди.

Жумладан, шифокорлар ўртасида шахмат спорти бўйича ўтказилган мусобақанинг Қорақалпоғистон Республикаси босқичида 1-ўрин, мазкур мусобақанинг Ўзбекистон Республикаси босқичида 3-ўрин ғолиби, Кўп тармоқли марказий поликлиниканинг қулоқ, томоқ, бурун касалликлари бўйича шифокори Ж. Эримбетов, стол тенниси бўйича Қорақалпоғистонда 1-ўрин, Ўзбекистон миқёсида фахрли 2-ўринни эгаллаган бирлашма бош ҳисобчиси А. Йўлдошев, маҳоратли шахматчи ҳамшира Мафтуна Давлатбоева, шашка бўйича Қорақалпоғистон Республикаси ғолиби Ҳамро Вафоев ва бошқалар, жами 25 нафар спортчи шифокорлар ва спорт тарғиботчилари муносиб рағбатлантирилди.

Бундан ташқари, Тиббиёт бирлашмаси ишчи-ходимларининг жорий ўқув йилида умумтаълим мактабларининг 1-синфига борадиган 90 нафар фарзандларига касаба уюшма қўмитаси томонидан ўқув анжомлари тўплами совға қилинди.

Тақдирлаш маросимидан сўнг байрам шодиёналари кўтаринки руҳда давом этди. Унда 29-сонли болалар мусиқа ва санъат мактабининг санъатсевар ёшлари томонидан тайёрланган адабий-мусиқий концерт дастури намойиш этилди. Бири-биридан дилбар наволар, куй-қўшиқлар ижроси тадбир иштирокчилари қалбига олам-олам завқ бағишлади.

РОБИЯ ЙЎЛДОШЕВА.