Уйшин маҳалласида янги тиббиёт маскани фойдаланишга топширилди

6 октябрь санаси Амударё туманининг олис ва чекка ҳудудларидан бири — Уйшин маҳалласи аҳолиси учун унутилмас, тарихий кунлардан бири бўлди. Шу куни маҳалла аҳли узоқ йиллар давомида орзиқиб кутган янги оилавий шифокорлик пункти фойдаланишга топширилди.

Мазкур замонавий тиббиёт маскани маҳалла аҳолиси ҳаётида катта қулайлик яратади. Чунки илгари Уйшин маҳалласи аҳолиси Қипчоқ шаҳарчаси ҳудудидаги 1-сонли оилавий поликлиникага бориб тиббий хизмат олишга мажбур эди. Поликлиника маҳалладан 8–9 чақирим узоқликда жойлашгани, айниқса қишнинг изғиринли кунларида ёки ёзнинг жазирама иссиғида транспорт воситаси топиш мушкуллиги сабабли, бу йўл кексалар ва ёш болали аёллар учун айниқса оғир кечарди.

Аҳолининг ана шундай эҳтиёжини инобатга олган ҳолда, саховатпеша тадбиркорнинг ташаббуси қўллаб-қувватланди ва Қорақалпоғистон Республикаси Соғлиқни сақлаш вазирлиги томонидан Уйшин маҳалласи ҳудудида янги тиббий пункт қуриш лойиҳаси тасдиқланди. Энг эътиборлиси шундаки, мазкур иншоот тўлиқ тадбиркор ҳомийлигида барпо этилди — бу эса хусусий секторнинг ижтимоий соҳадаги фаол иштирокининг ёрқин намунаси бўлди.

Очилиш маросимида туман ҳокимлиги масъуллари, соғлиқни сақлаш тизими раҳбарлари, нуронийлар, кенг жамоатчилик вакиллари ҳамда маҳалла аҳолиси иштирок этди.

Тадбирда сўзга чиққанлар ушбу хайрли ташаббус учун саховатпеша тадбиркорга чуқур миннатдорчилик билдириб, унинг маҳалла аҳолиси фаровонлиги йўлида амалга оширган эзгу ишларини юксак эътироф этдилар. Тадбиркорнинг халқ манфаати йўлидаги бунёдкорлик ишлари, нафақат Уйшин маҳалласи аҳолиси учун қулайлик яратди, балки унинг ижтимоий масъулияти, ватанпарварлик ва меҳр-оқибат каби фазилатларининг ёрқин намунаси бўлди.

Бу каби хайрли ишлар замирида инсон саломатлигини асраш, жамият фаровонлигига ҳисса қўшиш каби эзгу мақсадлар мужассам. Шунинг учун ҳам бу ташаббус жамоатчилик томонидан эътироф этилиб, фидойи тадбиркорнинг меҳнатлари алоҳида қадрланди.

Табрик ва қутловлардан кейин рамзий тасма кесилиб, замонавий тиббий жиҳозлар билан таъминланган янги бино ўз фаолиятини бошлади.

Ушбу замонавий тиббий пункт ультра товуш текшируви, электрокардиограф, тиш даволаш ускуналари, компьютер техникалари ва бошқа илғор тиббий жиҳозлар билан тўлиқ таъминланган. Эндиликда Уйшин маҳалласи аҳолиси бирламчи тиббий хизматлардан маҳалласининг ўзида, қулай ва тезкор тарзда фойдаланиш имконига эга бўлди.

Бу нафақат тиббиёт инфратузилмасининг кенгайиши, балки одамлар ҳаёт сифатининг ошиши, соғлом турмуш тарзини тарғиб этиш йўлидаги навбатдаги муҳим қадамлардан биридир.

Чарос Арслонова, туман ҳокимлигининг Ахборот хизмати раҳбари.