"Касблар фестивали" ва "Меҳнат ярмаркаси" ўтказилди
Ёшларни ҳаётга тайёрлаш, уларнинг касб-ҳунар кўникмаларини ошириш ва бандлигини таъминлашга қаратилган тизимли ишлар доирасида Амударё туманида “Касблар фестивали” ҳамда “Меҳнат ярмаркаси” тадбирлари бўлиб ўтди. Тумандаги 2-сонли политехникумда ташкил этилган тадбир ёшлар ва иш берувчилар ўртасида мустаҳкам кўприк вазифасини ўтади.
Тадбирда туман ҳокими Собир Хўжаметов бошчилигидаги раҳбарлар, тумандаги йирик корхона ва ташкилотлар вакиллари, тижорат банклари масъуллари ҳамда юзлаб ўқувчи-ёшлар иштирок этдилар.
Тадбирни очиб берган туман ҳокими Собир Хўжаметов ўз нутқида бугунги кунда юртимизда ёшларнинг касб-ҳунар эгаллашига шароит яратиш, уларнинг бандлигини таъминлаш борасида кенг имкониятлар яратилаётганини алоҳида таъкидлади.
Дарҳақиқат, касб-ҳунар ўрганиш ёшлар учун ҳаётий заруратдир. Бугунги рақобатли меҳнат бозорида анъанавий ва замонавий касб сирларини мукаммал эгаллаш муҳим аҳамиятга эга. Касб эгаси бўлган ёшлар ўз ҳаётининг меъмори, жамиятнинг таянчи, Ватан тараққиётининг таянч кучидир. Шу боис давлатимиз томонидан ҳар бир ҳудудда касб-ҳунар ўқув масканларини модернизация қилиш, замонавий техникалар билан таъминлаш ва ёшларни амалий кўникмалар билан қуроллантиришга алоҳида эътибор қаратилмоқда. Сабаби, ўз касбининг устаси бўлган ёшлар ҳаётда ўз ўрнига ва жамиятда муносиб обрў-эътиборга эга бўлади.
Тадбир давомида сўзга чиққан ташкилот ва муассасалар вакиллари ёшлар учун мавжуд имкониятлар, амалий ўқув дастурлари, таълим ва ишга жойлашиш масалалари бўйича батафсил маълумот беришди. Хусусан, туман 1-сонли муҳандислик техникуми директори Шуҳрат Матризаев сўзга чиқиб, техникумда ташкил этилган 18 та касб-ҳунар йўналиши бўйича ўқув курслари хусусида маълумот берди.
"Касблар фестивали" доирасида политехникум ўқувчилари томонидан пазандачилик, тикувчилик, дизайнерлик, пайвандлаш ва бошқа йўналишларда яратилган ижодий ишлардан иборат кўргазма намойиш этилди. Ёшларнинг қўл меҳнати билан тайёрлаган буюмлар, техник ишланмалар ва креатив ғоялар тадбир иштирокчиларида, айниқса, иш берувчиларда катта таассурот қолдирди.
Тадбирнинг иккинчи қисми – "Меҳнат ярмаркаси" ёшлар учун амалий имконият майдонига айланди. У ерда турли корхона ва ташкилотлар вакиллари томонидан бўш иш ўринлари таклиф этилди. Ёшлар иш берувчилар билан тўғридан-тўғри мулоқот қилиш имкониятига эга бўлдилар. Шунингдек, бандлик ва тадбиркорликни қўллаб-қувватлаш марказлари томонидан ёшларга имтиёзли кредитлар, субсидиялар ва ўз бизнесини бошлаш бўйича муҳим маслаҳатлар берилди.
Бу каби тадбирлар ёшларнинг ҳаётда ўз ўрнини топишлари, касб-ҳунар эгаллашлари ва келажак ҳаётга пухта тайёрланишида муҳим восита саналади.
Чарос Арслонова, Туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
