"ДАЛАЛАР ЧЕТЛАРИДАН САМАРАЛИ ФОЙДАЛАНИШ ИСТИҚБОЛЛАРИ" МАВЗУСИДА СЕМИНАР ЎТКАЗИЛДИ
Сўнгги йилларда ер юзида рўй бераётган иқлим ўзгаришлари, табиий офатлар ва қурғоқчилик каби экологик вазиятнинг бузилиш ҳолатлари қишлоқ хўжалиги соҳасига жиддий таъсирини ўтказиб, озиқ-овқат маҳсулотлари етиштиришни қийинлаштириб бормоқда. Албатта, бу ҳолат Марказий Осиё минтақаси давлатлари, хусусан, бизнинг мамлакатимизга ҳам ўзининг салбий таъсирини кўрсатмоқда.
Ана шундай ҳолатларнинг олдини олиш мақсадида мамлакатимизда сўнгги бир йилда аграр тизимни янада ривожлантириш, соҳага сув ва энергия тежамкор технологияларни кенг жорий этиш орқали юқори сифатли озиқ-овқат ва саноатбоп маҳсулотлар етиштиришни кўпайтириш мақсадида муҳтарам Президентимиз томонидан қатор Фармон ва Қарорлар қабул қилиниб, бунинг натижасида жойларда улкан ютуқларга эришилмоқда.
Президентимизнинг 2024 йил 30 декабрдаги “Қишлоқ хўжалиги майдонларидаги қўшимча имкониятлардан фойдаланган ҳолда маҳсулот етиштиришни кўпайтиришга доир чора-тадбирлар тўғрисида”ги Қарорига мувофиқ далалар четларида, аҳолининг томорқа ерларида, кўп қаватли уйлар ёнида, маҳалла ички кўчаларида қишлоқ хўжалиги маҳсулотларини етиштириш тартиби белгиланиб, Ўсимликлар карантини ва ҳимояси агентлигига маҳсулот етиштиришни ташкил этиш, уруғ ва кўчатларни етказиб бериш, шунингдек, етиштирилган маҳсулотни экспортга йўналтириш вазифалари юкланган эди.
30 октябрь куни Амударё туманининг Тўлқин овули ҳудудидаги “Амат Тўраев” фермер хўжалиги даласида туман Фермерлар кенгаши, Қорақалпоғистон Республикаси Ўсимликлар карантини ва ҳимояси агентлиги ҳамда Боғдорчилик агентлиги туман бўлимлари ҳамкорлигида “Далалар четларидан самарали фойдаланиш истиқболлари” мавзусида семинар ташкил этилди.
Семинарда туманда фаолият олиб борувчи қишлоқ хўжалик корхоналари, фермер ва деҳқон хўжаликлари раҳбарлари ҳамда илғор томорқа ер эгалари, соҳа мутахассислари иштирок этишиб, соҳага татбиқ қилинаётган янгиликлар ва ўзгаришлар билан яқиндан танишдилар.
Семинарда мутахассислар томонидан ички фитосанитар сертификати далалар четларидан самарали фойдаланаётган қишлоқ хўжалиги маҳсулотлари ишлаб чиқарувчиларга бепул берилиши, Агросаноатни ривожлантириш ва қўллаб-қувватлаш давлат мақсадли жамғармаси ҳисобидан далалар четларига “in-vitro” усулида экилган мевали кўчатлар пайвандтагларини харид қилиш харажатларининг 50 фоизи миқдорида, яъни, ҳар бир мевали кўчат пайвандтаги учун 25 минг сўмдан ошмаган миқдорда субсидия ажратилиши ҳақида маълумотлар берилди.
Бундан ташқари, Президент Қарори ижросини таъминлаш мақсадида, туман Фермерлар кенгаши ҳамда Ўсимликлар карантини ва ҳимояси агентлиги туман бўлими билан биргаликда далалар четларида, каналлар, суғориш ва коллектор-дренаж тармоқлари атрофидаги майдонларда, томорқа ерларида, кўп қаватли уйлар атрофида, маҳалла ички кўчаларида қишлоқ хўжалиги маҳсулотларини етиштиришни ташкил этишни мувофиқлаштириш бўйича туман ишчи гуруҳи тузилгани маълум қилиниб, мазкур ишчи гуруҳ аъзоларининг вазифалари юзасидан батафсил маълумотлар ҳам берилди.
Семинарда иштирокчилар туман Фемерлар кенгаши ҳамда Ўсимликлар карантини ва ҳимояси агентлиги туман бўлими мутахассислари билан ўзаро фикр алмашдилар, шунингдек, тажрибали деҳқонлар томонидан амалга оширилаётган ишларни оммалаштириш юзасидан таклифлар ва тавсиялар берилиб, келгусида қилиниши лозим бўлган ишлар келишиб олинди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
