Маҳаллий Кенгашлар фаолиятини такомиллаштириш юзасидан семинар ташкил этилди

Ўзбекистонда демократик ислоҳотларни чуқурлаштириш ва давлат бошқарувида халқ вакиллигини кучайтириш борасидаги тизимли ишлар амалга оширилмоқда. Ушбу йўналишда амалга оширилаётган ишлар, авваламбор, Олий Мажлиснинг ваколатларини кенгайтириш, маҳаллий Кенгашларнинг мустақиллигини ошириш, ижро ҳокимияти органлари устидан депутатлик назоратини кучайтириш ва “халқчил давлат” тамойилини амалда рўёбга чиқаришни ўз ичига олади. Айниқса, жойларда маҳаллий ижро органлари раҳбарларининг масъулиятини оширишга қаратилган аниқ механизмлар жорий этилмоқда.

Айни шу мақсадда, 5 ноябрь куни Амударё тумани ҳокимлигининг мажлислар залида “Маҳаллий Кенгашлар фаолиятини намунали ташкил этиш” мавзусида кўргазмали семинар ташкил этилди.

Тадбир Ўзбекистон Республикаси Олий Мажлиси Сенати девонининг Ҳудудий вакиллик органлари фаолиятини ўрганиш маркази томонидан тасдиқланган режага асосан ўтказилди. Семинарнинг асосий мақсади Сенат Кенгашининг 2025 йил 28 январдаги “Халқ депутатлари маҳаллий Кенгашлари фаолиятини намунали ташкил этиш тўғрисида”ги қарори ижросини таъминлашга қаратилди. Мазкур қарор асосида Нукус шаҳар Кенгашининг фаолияти тасдиқланган меъёрлар асосида тўлиқ йўлга қўйилган. Эндиликда Нукус шаҳар Кенгашининг тажрибасини ҳудуддаги бошқа маҳаллий Кенгашларга ҳам татбиқ этиш ва маҳаллий вакиллик органлари фаолиятини янада жонлантириш кўзда тутилмоқда.

Семинарда Қорақалпоғистон Республикаси Жўқорғи Кенгесининг Маҳаллий ҳокимият вакиллик ва фуқароларнинг ўзини-ўзи бошқариш органлари ҳамда давлат органларининг очиқлигини таъминлаш масалалари қўмитаси раиси Шарапат Отемисов, Халқ депутатлари Амударё туман Кенгаши раиси, туман ҳокими Собир Хўжаметов, Қорақалпоғистон Республикаси Жўқорғи Кенгесига Амударё туманидан сайланган депутатлар, туман Кенгаши депутатлари, Кенгаш ҳузуридаги “Ёшлар маслаҳат гуруҳи” аъзолари, сиёсий партиялар раҳбарлари ҳамда ОАВ вакиллари иштирок этдилар.

Семинарда асосий эътибор “Халқ депутатлари маҳаллий Кенгашининг доимий комиссиялари фаолиятини самарали ташкил этиш тўғрисида”ги масалага қаратилди. Ушбу йўналишда амалга оширилаётган ишлар доимий комиссияларнинг йиллик иш режаларини аниқ муаммолар ва аҳоли мурожаатлари асосида шакллантиришни, қабул қилинган қарорлар ижроси устидан қатъий депутатлик назоратини ўрнатишни ҳамда ижро ҳокимияти идоралари раҳбарларининг ҳисоботларини мунтазам эшитиб боришни тақозо этади. Самарали фаолият – бу қоғоздаги ҳисоботлар эмас, балки жойлардаги реал ижобий ўзгаришлар демакдир.

Мазкур масала юзасидан Кенгашнинг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси раиси Мадамин Казаков, Коррупцияга қарши курашиш ва хавфсизлик масалалари бўйича доимий комиссияси раиси Яхшимурат Аҳмедовлар сўзга чиқиб, доимий комиссияларнингфаолияти ҳақида маълумотлар бердилар ҳамда уни келгусида янада такомиллаштириш юзасидан фикр-мулоҳазаларини баён қилдилар.

Депутатлар томонидан Кенгашнинг туманни ижтимоий-иқтисодий ривожлантиришга қўшаётган ҳиссаси, халқ вакилларининг аҳолининг муаммоларини ҳал этишдаги ўрни, шунингдек, давлат органлари фаолиятида очиқлик ва шаффофликни таъминлаш масалалари атрофлича муҳокама қилинди.

Хусусан, депутатларнинг маҳаллий бюджетни тасдиқлаш ва унинг ижросини назорат қилишдаги ролини кучайтириш, ҳудудни ижтимоий-иқтисодий ривожлантириш бўйича дастурларнинг ижросини назорат қилиш, сайёр қабуллар орқали аҳоли билан бевосита мулоқотни йўлга қўйиш муҳимлиги таъкидланди. Кенгаш сессияларини ижтимоий тармоқлар орқали жонли эфирга узатиш, қабул қилинган қарорларни очиқ эълон қилиш ва жамоатчилик эшитувларини ўтказиш амалиётини кенгайтириш зарурлиги таъкидланди.

Тадбир доирасида иштирокчилар маҳаллий Кенгаш фаолиятининг намунавий модели, депутатларнинг ташаббуслари ҳамда уларнинг жойлардаги аҳоли билан ўзаро ҳамкорлик механизмлари билан яқиндан танишдилар. Айнан шу механизмлар орқали депутатлик корпуси аҳолининг ҳаётий муаммоларига тезкор ечим топишда кўприк вазифасини бажариши лозимлиги қайд қилинди.

Мазкур семинар маҳаллий Кенгашлар фаолиятини янада такомиллаштириш, депутатлар ташаббускорлигини ошириш ва уларнинг жамият ҳаётидаги ролини янада мустаҳкамлашга хизмат қилади. Бу эса кучли ва халқчил вакиллик органини шакллантириш орқали ҳудудларни ривожлантириш стратегиясини изчил амалга ошириш учун мустаҳкам асос яратади.