ТУМАН ПРОКУРОРИ “ДЎСТЛИК” МАҲАЛЛАСИДА АҲОЛИ МУАММОЛАРИНИ ТИНГЛАДИ

Инсон манфаатларини таъминлаш, халқ билан очиқ мулоқот қилиш ва уларнинг муаммоларига тезкор ечим топиш — бугунги куннинг асосий талабидир. Раҳбарларнинг хизмат хоналаридан чиқиб, бевосита маҳаллаларга кириб бориши аҳолининг розилигини олиш ва қонун устуворлигини таъминлашда муҳим омил бўлмоқда. Амударё тумани Прокурори томонидан ўтказилган навбатдаги сайёр қабул ҳам ана шундай амалий тадбирлардан бири сифатида халқ ва давлат органи ўртасидаги ишонч кўприги вазифасини бажарди.

Туманнинг “Дўстлик” маҳалласида ташкил этилган ушбу учрашувда туман прокурори Баҳром Машарипов фуқаролар билан юзма-юз мулоқот қилди. Қабулда маҳалла фаоллари, нуронийлар, хотин-қизлар ва ёшлар иштирок этиб, ўзларини қийнаётган муаммо ва таклифларини тўғридан-тўғри раҳбарга етказиш имконига эга бўлдилар.

Очиқ ва самимий руҳда ўтган қабул давомида фуқаролардан турли мавзу ва йўналишларда мурожаатлар келиб тушди. Мурожаатларнинг салмоқли қисмини маҳалла инфратузилмасини яхшилаш масалалари ташкил этди. Хусусан, ички йўлларни таъмирлаш, электр энергияси таъминотидаги барқарорлик ва ичимлик суви тармоқларини яхшилаш бўйича ҳақли талаблар илгари сурилди.

Шунингдек, аҳолининг ижтимоий ҳимояга муҳтож қатлами томонидан меҳнат ва бандлик масалалари, хусусан, ишга жойлашиш, ижтимоий ёрдам олиш ҳамда турмуш шароитини яхшилаш, яъни уй-жой таъмири ёки моддий кўмак масалалари юзасидан қилинган мурожаатлар ҳам диққат билан тингланди.

Сайёр қабул давомида билдирилган ҳар бир масалага туман прокурори томонидан алоҳида ёндашилиб, уларнинг ечими бўйича қатъий чоралар кўрилди.

Айрим мурожаатлар жойида ижобий ҳал этилди. Қўшимча ўрганиш ва маблағ талаб қилувчи масалалар юзасидан мутасадди ташкилот ва идора раҳбарларига аниқ муддатли топшириқлар берилди. Барча топшириқларнинг ижроси прокуратура органлари томонидан қатъий назоратга олинди.

Тадбир фақат муаммоларни тинглаш билан чекланиб қолмади. Унда ҳуқуқий тарғибот ишларига ҳам алоҳида эътибор қаратилди. Прокурор томонидан фуқароларга амалдаги қонунчилик ҳужжатларининг мазмун-моҳияти, янги қабул қилинган фармон ва қарорлар бўйича тушунтиришлар берилди. Фуқароларни қизиқтирган саволлар юзасидан жойида ҳуқуқий маслаҳатлар кўрсатилди.

Прокуратура органлари ҳудудларни ижтимоий-иқтисодий ривожлантириш жараёнида қонун устуворлигини таъминловчи муҳим институт сифатида фаол иштирок этади. Ушбу органлар давлат дастурлари, инвестиция лойиҳалари ҳамда маҳаллий бюджет маблағларининг қонуний ва самарали сарфланишини доимий назорат қилиб боради. Натижада молиявий интизом мустаҳкамланиб, коррупция ҳолатларининг олди олинади.

Прокуратура томонидан тадбиркорлик субъектларининг ҳуқуқ ва қонуний манфаатларини ҳимоя қилишга ҳам алоҳида эътибор қаратилади. Асоссиз текширувларни чеклаш, маъмурий тўсиқларни бартараф этиш орқали ишбилармонлик муҳити яхшиланади, янги иш ўринлари яратилишига шароит туғилади. Бу эса аҳоли бандлиги ва даромадларининг ошишига хизмат қилади.

“Дўстлик” маҳалласида ўтган сайёр қабул давомида прокуратура органларининг ушбу қонуний ваколатларини амалга ошириш доирасида қилинаётган ишлар ҳақида ҳам кенг турда маълумотлар берилди. Мазкур сайёр қабул аҳоли ва ҳуқуқни муҳофаза қилувчи органлар ўртасидаги ишончни мустаҳкамлашга, энг муҳими, одамларнинг оғирини енгил қилишга хизмат қилгани билан аҳамиятли бўлди.