Амударё тумани Мудофаа ишлари бўлими Миллий Армиямизни муносиб кадрлар билан таъминлашга ҳисса қўшмоқда

Мамлакатимизда қутлуғ сана — Ўзбекистон Республикаси Қуролли Кучлари ташкил этилганлигининг 34 йиллиги ҳамда 14 январь – Ватан ҳимоячилари куни юртимиз бўйлаб кенг нишонланмоқда.

Айни жараёнларда Мудофаа ишлари туман ва шаҳар бўлимларининг ўрни ва масъулияти алоҳида аҳамият касб этмоқда. Чунки ушбу бўлимлар ҳарбий хизматни ташкил этиш, чақирув ишларини амалга ошириш, ёшларни ҳарбий-ватанпарварлик руҳида тарбиялаш ҳамда Қуролли Кучларни сифатли кадрлар билан таъминлашда муҳим бўғин ҳисобланади.

Амударё тумани Мудофаа ишлари бўлими томонидан ҳам мазкур вазифаларни изчил амалга ошириш борасида салмоқли ишлар олиб борилмоқда. Хусусан, “Умумий ҳарбий мажбурият ва ҳарбий хизмат тўғрисида”ги Қонун ҳамда тегишли норматив-ҳуқуқий ҳужжатлар асосида чақирувчиларни ҳарбий рўйхатга олиш, муддатли ҳарбий хизматга юбориш, сафарбарлик чақируви резервини шакллантириш ва ҳарбий ҳисоб юритиш тизими самарали йўлга қўйилган.

2025 йил якунлари таҳлили шуни кўрсатмоқдаки, туман Мудофаа ишлари бўлими томонидан белгиланган вазифалар изчил ва самарали бажарилмоқда. Жумладан, қонуннинг 18-моддасига асосан 1 808 нафар ёшлар ҳарбий рўйхатга олинди. Қўшинларни бутлаш, муддатли ҳарбий хизмат ҳамда сафарбарлик чақируви резерви хизматига юбориш бўйича берилган йиллик режа муддатидан аввал бажарилиб, 115 фоиз ижро этилди.

Айни кунда Амударё туманидан 122 нафар ёшлар республикамизнинг турли ҳарбий қисмларида Ватан олдидаги муқаддас бурчини шараф билан адо этмоқда. 2026 йилги чақирув мавсуми учун эса 353 нафар йигитни муддатли ҳарбий хизматга, 650 нафарини сафарбарлик чақируви резерви хизматига юбориш бўйича ташкилий ва тайёргарлик ишлари бошлаб юборилган.

Мудофаа ишлари бўлимларининг муҳим вазифаларидан бири — ёшларни ҳарбий хизматга тайёрлаш ва уларда ватанпарварлик туйғуларини шакллантиришдир. Шу мақсадда Амударё туманида “маҳаллабай” ва “хонадонбай” тизим асосида кенг кўламли тарғибот ишлари амалга оширилди. 18–27 ёшгача бўлган 9 400 нафар чақирилувчи ёшлар ва уларнинг ота-оналари билан суҳбатлар ўтказилиб, ҳарбий хизматнинг мазмун-моҳияти, имтиёзлар ва истиқболлар атрофлича тушунтирилди.

Бу ишлар ўз самарасини бермоқда. Хусусан, 2025 йилда туманимиздан 7 нафар ёш “Темурбеклар мактаби”га, 5 нафар ёш эса олий ҳарбий таълим муассасаларига ўқишга қабул қилинди. Бу эса ёшлар ўртасида ҳарбий касбга бўлган қизиқиш изчил ошиб бораётганини кўрсатади.

Шунингдек, Мудофаа ишлари бўлими томонидан таълим муассасалари билан ҳамкорликда амалий тадбирлар ҳам режалаштирилган. Жумладан, тумандаги барча мактабларнинг 11-синфларида таҳсил олаётган 1 808 нафар ўқувчи учун Нукус дала ўқув майдонида жанговар қуроллардан амалий ўқ отиш машғулотларини ўтказиш белгиланган.

Айни кунларда мамлакатимизда давом этаётган “Ватанпарварлик ойлиги” доирасида Амударё туманида ҳам “Миллий армия – Она юрт қалқони, тинчлигимиз посбони” шиори остида кўплаб маънавий-маърифий тадбирлар ташкил этилмоқда. Мактаблар, маҳаллалар ва меҳнат жамоаларида ҳарбий хизматчилар, фахрийлар иштирокида учрашувлар, ҳарбий қисмларда “Очиқ эшиклар куни”, кўргазмали машғулотлар ўтказилмоқда.

Хулоса қилиб айтганда, Миллий Армиямиз бугунги кунда нафақат мамлакатимиз суверенитети кафолати, балки ёшларни мардлик, интизом ва фидойилик руҳида тарбияловчи улкан мактабга айланган. Амударё тумани Мудофаа ишлари бўлими томонидан олиб борилаётган амалий ишлар эса ана шу қудратли тизимни муносиб кадрлар билан таъминлашга хизмат қилмоқда.

Фурсатдан фойдаланиб, барча юртдошларимизни, Ватан осойишталиги йўлида хизмат қилаётган жасур ҳарбийларимизни 14 январь – Ватан ҳимоячилари куни билан самимий табриклаймиз!