Халқ депутатлари Амударё туман Кенгашининг 17-сессияси тўғрисида ахборот

Амударё тумани ҳокимлигининг мажлислар залида Халқ депутатлари Амударё туман Кенгашининг навбатдаги 17-сессияси бўлиб ўтди. Сессия ишида туман Кенгаши депутатлари, туман ҳокимининг ўринбосарлари, ташкилот ва муассасалар раҳбарлари ҳамда оммавий ахборот воситалари вакиллари иштирок этди.

Сессия Ўзбекистон Республикаси ва Қорақалпоғистон Республикаси Давлат мадҳиялари садолари остида очилди. Сессия мажлисига Халқ депутатлари Амударё туман Кенгаши раиси Алишер Йўлдашев раислик қилди. Сессия котиблигига “23-Қипчоқ” сайлов округидан депутат Муяссар Рахматуллаева номзоди депутатлар томонидан маъқулланди.

Сессия кун тартибидаги биринчи масала юзасидан туман ҳокимининг биринчи ўринбосари Фаҳриддин Юсупов драйвер лойиҳаларни молиялаштириш тўғрисида ҳисобот берди. Қайд этилишича, Ўзбекистон Республикаси Президентининг 2024 йил 20 декабрдаги “Ҳудудларда юқори иқтисодий ўсиш ва аҳоли бандлигини таъминлашнинг янги тизимини йўлга қўйиш ҳамда бу борада маҳаллий ҳокимликларнинг роли ва масъулиятини ошириш чора-тадбирлари тўғрисида”ги 223-сонли Фармонига мувофиқ, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари бир ой муддатда ҳар бир туман ва шаҳарда ҳудуднинг иқтисодий ўсишига туртки берувчи саноат, қишлоқ хўжалиги ҳамда хизмат кўрсатиш йўналишларида камида 5 тадан драйвер лойиҳаларнинг манзилли рўйхатини тасдиқлаши белгиланган.

Мазкур Фармон ижросини таъминлаш мақсадида Амударё тумани Чордара маҳалласи ҳудудида жойлашган Буюк Турон, Чордара ва Махтумқули кўчалари туташган ҳудудда савдо ва хизмат кўрсатиш объектларини ташкил этиш режалаштирилган. Бунда трансформатор ўрнатиш, СИП кабель тортиш, лотоклар ўрнатиш, замонавий ақлли бекат қуриш ҳамда асфальтлаш ишларини амалга ошириш кўзда тутилган. Ушбу ҳудудда савдо ва хизмат кўрсатиш объектларини ташкил қилиш учун 10,5 млрд сўм маблағ ажратиш бўйича таклиф билдирилди.

Сессия кун тартибидаги навбатдаги масала юзасидан туман прокурори Баҳрам Машарипов туман прокуратурасининг қонун устуворлигини таъминлаш соҳасидаги фаолияти ҳақида ахборот берди. Ахборотда таъкидланишича, туман прокуратураси томонидан 2025 йил давомида ҳудудда қонун устуворлигини таъминлаш, қонунийликни мустаҳкамлаш, фуқароларнинг ҳуқуқ ва эркинликларини, жамият ва давлатнинг қонун билан қўриқланадиган манфаатларини ҳамда Ўзбекистон Республикаси конституциявий тузумини ҳимоя қилиш, ҳуқуқбузарликларнинг олдини олиш ва профилактика қилиш борасида муайян ишлар амалга оширилган. Хусусан, қонунлар ижроси юзасидан ўтказилган 140 та назорат тадбирида 1200 та қонун бузилиш ҳолатлари аниқланиб, 314 та прокурор назорати ҳужжатлари қўлланилган. Қўпол қонун бузилишлари юзасидан 21 та жиноий иш қўзғатилган.

Кун тартибидаги яна бир масала — 2025 йилнинг 12 ойи давомида ҳуқуқбузарликлар профилактикаси ва жиноятчиликка қарши курашиш борасида амалга оширилган ишлар тўғрисида туман Ички ишлар бўлими бошлиғи Тимур Дошумбаев ҳисобот берди. Ўзбекистон Республикаси Президентининг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш чора-тадбирлари тўғрисида”ги 1-сон қарори ижросини таъминлаш мақсадида туман ва маҳаллалар кесимида чора-тадбирлар йўл хариталари ишлаб чиқилиб, маҳалла еттилиги, Адлия, соғлиқни сақлаш ҳамда бошқа масъул идоралар билан ҳамкорликда амалий ишлар олиб борилаётгани қайд этилди.

Амалга оширилган профилактик ишлар натижасида тумандаги 32 та маҳалла “яшил” тоифага киритилиб, уларда жиноят содир этилишига йўл қўйилмади. Шу билан бирга, жиноят салмоғи ошгани сабабли 2 та маҳалла “қизил”, 15 та маҳалла эса “сариқ” тоифага киритилди. 2024 йил ва 2025 йилнинг 12 ойи давомида туман ҳудудида содир этилган жиноятлар сони 438 тадан 127 тага, яъни 60,7 фоизга камайди. Олдини олиш мумкин бўлган жиноятлар эса 161 тадан 127 тага, яъни 21,1 фоизга қисқарди.

Сессия мажлисида туман ҳокимлигида ижро интизомига риоя этилиши ҳолати тўғрисидаги масала юзасидан ҳокимлик ижро интизоми назорати бўлинмаси бош мутахассиси Маъмуржон Таджибоев ахборот берди. Ахборотга кўра, 2025 йил давомида туман ҳокимлигига 31 та Президент Фармони, 47 та қарор, 2 та фармойиш ҳамда Вазирлар Маҳкамасининг 49 та қарорлари асосида тайёрланган Қорақалпоғистон Республикаси Вазирлар Кенгашининг жами 129 та норматив-ҳуқуқий ҳужжатлари келиб тушган. Ушбу ҳужжатлар ижросини таъминлаш мақсадида туман ҳокимининг 62 та қарори қабул қилинган, 67 та ҳужжат эса маълумот ва ижро учун қабул қилинган.

Шунингдек, ижро интизоми электрон тизими орқали келиб тушган Қорақалпоғистон Республикаси Жўқорғи Кенгесининг 173 та ҳужжати асосида берилган 1089 та топшириқдан 1064 таси, яъни 98 фоизи ижро этилган. Қолган 25 та топшириқ ижро жараёнида бўлиб, шундан 17 таси айрим молиявий ва ташкилий сабабларга кўра кечикаётгани ва доимий назоратга олингани маълум қилинди.

Сессия кун тартибидаги “Маҳалланинг ижтимоий-иқтисодий муаммоларини ҳал этиш жамғармаси даромадлари ва харажатлари ижроси” масаласи юзасидан Маҳаллалар уюшмаси туман бўлими бошлиғи Алишер Йўлдашев ҳисобот берди. Ҳисоботда жорий йил март ойида “Яшил макон” умуммиллий ҳаракати доирасида жами 120 мингдан ортиқ кўчат экилгани, “Қипчоқ ўрмон хўжалиги”дан шартнома асосида 40 минг кўчат сотиб олиниб, бунинг учун 511 млн сўм маблағ сарфлангани қайд этилди.

Шунингдек, фуқаролар йиғинларининг моддий-техник базасини мустаҳкамлаш мақсадида 170 млн сўмлик 31 та компьютер техникаси, 99 млн сўмлик 34 та принтер, 271 млн сўмлик 41 та кондиционер харид қилинган. 16 та маҳаллага 29 та кузатув камераси ўрнатилиб, бунинг учун 335 млн сўм маблағ йўналтирилган. Маҳаллалар биноларининг кадастр ҳужжатларини расмийлаштириш учун 93 млн сўм сарфланган. Шунингдек, ижтимоий ҳимояга муҳтож фуқароларга жами 416 млн сўмлик моддий ёрдам кўрсатилган. Умуман олганда, йил давомида ушбу йўналишдаги тадбирлар учун 1 млрд 384 млн сўмдан ортиқ маблағ сарфланган.

Сессия кун тартибига киритилган барча масалалар депутатлар томонидан атрофлича муҳокама қилиниб, билдирилган фикр-мулоҳаза ва таклифлар инобатга олинган ҳолда тегишли қарорлар қабул қилинди.

Чарос Арслонова, туман ҳокимлигининг Ахборот хизмати раҳбари.