Амударё туманида сайёр қабуллар давом этмоқда

Амударё тумани ҳокими Собир Хўжаметов томонидан туман аҳолисининг муаммоларини жойида ўрганиш, фуқароларни қийнаб келаётган масалаларга тезкор ва самарали ечим топиш мақсадида Дарё бўйи, Босув ҳамда Гулзор маҳаллаларида сайёр қабуллар ташкил этилди.

Мазкур сайёр қабулларда туман ҳокимининг ўринбосарлари, тегишли бўлим ва ташкилотлар раҳбарлари, маҳалла фаоллари ҳамда аҳоли вакиллари иштирок этиб, фуқаролар мурожаатлари бевосита жойида кўриб чиқилди.

Туман ҳокими “Дарё бўйи” овул фуқаролар йиғинида аҳоли билан юзма-юз учрашиб, фуқаролар томонидан билдирилган мурожаатларни батафсил ва тўлиқ тинглади. Учрашув давомида аҳолини энг кўп ташвишга солаётган масалалар — электр таъминотини яхшилаш, кўча йўлларига шағал (тош) ётқизиш, кўча йўллари чегараларини белгилаб бериш, таълим контракти тўловига кўмаклашиш ҳамда иш билан таъминлаш каби масалалар бўлди.

Жумладан, сайёр қабул давомида 17 нафар фуқаролар томонидан 20 та мурожаат билдирилган бўлиб, уларнинг барчаси масъуллар томонидан рўйхатга олиниб, алоҳида назоратга олинди. Ҳар бир мурожаат юзасидан аниқ муддат ва ижро механизмлари белгиланди.

Босув маҳалласи аҳолиси билан ўтказилган учрашувда эса фуқаролар томонидан асосан электр таъминотини яхшилаш, кўча йўлларини таъмирлаш ва тош ётқизиш, шунингдек, тадбиркорлик фаолиятини йўлга қўйиш учун ер участкалари ажратиб бериш бўйича мурожаатлар билдирилди.

Мазкур маҳаллада сайёр қабул давомида 5 нафар фуқаро томонидан 5 та мурожаат келиб тушди. Ушбу мурожаатлар ҳам тегишли ташкилотларга бириктирилиб, ижроси қатъий назоратга олинди.

Гулзор маҳалласи аҳолиси билан бўлиб ўтган учрашувда эса ижтимоий йўналишдаги масалалар устувор бўлди. Хусусан, электр таъминотини яхшилаш, моддий ёрдам ажратиш, шунингдек, сафарбарлик чақирув резерви бадал пулини тўлашга кўмаклашиш бўйича мурожаатлар билдирилди.

Ушбу маҳаллада 5 нафар фуқаролар томонидан 6 та мурожаат қабул қилиниб, уларнинг ҳар бири юзасидан тегишли чора-тадбирлар белгиланди.

Сайёр қабуллар давомида туман ҳокими Собир Хўжаметов фуқаролар мурожаатлари билан ишлашда очиқлик, шаффофлик ва натижадорлик тамойилларига қатъий амал қилинаётганини таъкидлади. Билдирилган ҳар бир мурожаат жойида ўрганилиб, имкон қадар тезкор ҳал этиш, мураккаб масалалар бўйича эса босқичма-босқич ечим топиш вазифаси масъулларга топширилди.

Аҳоли билан бундай бевосита мулоқотлар жойлардаги муаммоларни чуқур таҳлил қилиш, фуқаролар ишончини мустаҳкамлаш ҳамда ҳудудларни ижтимоий-иқтисодий ривожлантиришда муҳим аҳамият касб этмоқда.

Чарос Арслонова, туман ҳокимлигининг Ахборот хизмати раҳбари.