ҚАНГЛИДА САЙЁР ҚАБУЛ: СУД ТИЗИМИДАГИ ИСЛОҲОТЛАР МОҲИЯТИ ТУШУНТИРИЛДИ
23 февраль куни Амударё туманининг Қангли овул фуқаролар йиғини маъмурий биносида суд-ҳуқуқ масалаларига бағишланган сайёр қабул бўлиб ўтди. Унда Жиноят ишлари бўйича Амударё туман суди раиси Жасурбек Балтабаев, Фуқаролик ишлари бўйича Амударё туман суди раиси Адилбек Сейтназаров, Амударё тумани “Мадад” нодавлат нотижорат ташкилоти юристи Даврон Пирманов ҳамда Қангли овул фуқаролар йиғини масъуллари, овул аҳолиси вакиллари иштирок этди.
Тадбирда Жиноят ишлари бўйича туман суди раиси Жасурбек Балтабаев 2025 йил 21 августда қабул қилинган Ўзбекистон Республикаси Президентининг Фармони ҳақида маълумотлар берди. Фармоннинг асосий мақсади — суд ишларини юритиш самарадорлигини ошириш, фуқаролар ва тадбиркорлар учун қулайлик яратиш, суд жараёнларини тўлиқ электронлаштириш орқали одил судлов даражасини юксалтиришдан иборат.
Тадбирда “Рақамли суд” концепцияси доирасида ишларни электрон шаклга ўтказиш, қоғоз ҳужжат айланмасини қисқартириш, электрон мурожаат ва интерактив хизматларни жорий этиш режалаштирилгани таъкидланди. Жумладан, “Менинг суддаги ишим”, “Менинг судга тааллуқлилигим” каби сервислар орқали фуқаролар ўз ишлари ҳақида онлайн маълумот олиш имконига эга бўлади.
Шунингдек, сунъий интеллект ёрдамида суд мажлиси баённомаларини реал вақт режимида матнга айлантириш, суд ҳужжатлари лойиҳаларини автоматик шакллантириш, ариза беришдан олдин тахминий натижа ва суд харажатларини ҳисоблаш имкониятлари яратилиши режалаштирилган. Томонларнинг суд мажлисларида масофадан иштирок этиши ва иш материаллари билан электрон танишиши ҳам ислоҳотларнинг муҳим жиҳатларидан бири сифатида қайд этилди.
Фуқаролик ишлари бўйича Амударё туман суди раиси Адилбек Сейтназаров интернет тармоғида инсон шаъни ва қадр-қимматини камситувчи маълумотлар тарқатилганда қўлланиладиган чоралар ҳақида тушунтириш берди. Агар ижтимоий тармоқларда шахс ҳақида ҳақиқатга тўғри келмайдиган маълумотлар тарқатилса, жабрланувчи нафақат раддия беришни, балки ушбу маълумотларни ўчириб ташлаш, қидирув тизимларидан олиб ташлаш ҳамда маънавий зарарни ундиришни талаб қилиши мумкин. Эътиборли жиҳати шундаки, тарқатилган маълумотнинг ҳақиқатга тўғри келишини исботлаш мажбурияти эндиликда маълумотни тарқатган жавобгар зиммасига юклатилади.
Мадад” нодавлат нотижорат ташкилоти юристи Даврон Пирманов ташкилотнинг асосий мақсади – жамиятда ҳуқуқий онг ва ҳуқуқий маданиятни юксалтиришга кўмаклашиш ҳамда аҳолига бирламчи бепул юридик ёрдам кўрсатиш эканини таъкидлаб, фуқароларнинг ҳуқуқий билимларини ошириш борасида амалга оширилаётган тарғибот ишлари ҳақида маълумотлар берди.
Сайёр қабул давомида фуқаролар ўзларини қизиқтирган суд-ҳуқуқ масалалари юзасидан саволлар билан мурожаат қилди ва мутахассислар томонидан атрофлича жавоблар берилди. Тадбир аҳолининг ҳуқуқий маданиятини ошириш, суд тизимидаги ислоҳотлар мазмун-моҳиятини кенг жамоатчиликка етказишда муҳим аҳамият касб этди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
