Жиноят ишлари бўйича Амударё тумани суди биносида очиқ суд мажлиси ўтказилди
Ҳуқуқий давлат ва адолатли жамият барпо этиш йўлида қонун устуворлигини таъминлаш, ҳуқуқбузарликларнинг олдини олиш ҳамда фуқароларнинг ҳуқуқий онги ва маданиятини юксалтириш устувор вазифалардан бири саналади. Айниқса, жойларда маъмурий ҳуқуқбузарликлар бўйича очиқ муҳокамалар ўтказилиши нафақат содир этилган ҳолатларга ҳуқуқий баҳо бериш, балки аҳоли ўртасида қонунга ҳурмат руҳини мустаҳкамлашга ҳам хизмат қилади.
Амударё туманида ҳуқуқбузарликларнинг олдини олиш, жамоат тартиби ва йўл ҳаракати хавфсизлигини таъминлашга қаратилган ана шундай сайёр суд мажлиси ўтказилди. Жиноят ишлари бўйича Амударё тумани суди биносида бўлиб ўтган мазкур очиқ суд мажлисига Жиноят ишлари бўйича Тахиатош туман судининг тергов судьяси Артур Давлетов раислик қилди.
Суд жараёнида туман ҳудудида қайд этилган айрим маъмурий ҳуқуқбузарликлар юзасидан тўпланган иш ҳужжатлари атрофлича кўриб чиқилди. Хусусан, ички ишлар органлари ходимларининг қонуний талабларига бўйсунмаслик билан боғлиқ ҳолатлар, шунингдек, автотранспорт воситаларига рухсат этилмаган овоз чиқарувчи қурилмалар, жумладан сирена кучайтиргичлари ўрнатиш билан боғлиқ қоидабузарликлар муҳокама марказида бўлди.
Мажлис давомида ҳуқуқбузарлик содир этган шахсларга амалдаги қонунчилик нормалари мазмун-моҳияти кенг тушунтирилди. Судья томонидан бундай хатти-ҳаракатлар жамият хавфсизлиги, йўл ҳаракати интизоми ва фуқаролар осойишталигига салбий таъсир кўрсатиши алоҳида таъкидланди. Шу билан бирга, келгусида бу каби ҳолатларга йўл қўймаслик юзасидан профилактик тушунтириш ишлари олиб борилиб, қонун доирасида тегишли чоралар белгиланди.
Таҳлиллар шуни кўрсатмоқдаки, бугунги кунда туманда учраётган ҳуқуқбузарликларнинг салмоқли қисми транспорт воситаларини тегишли ҳужжатларсиз бошқариш, йўл-патруль хизмати ходимларининг тўхташ ҳақидаги қонуний ишораларига амал қилмаслик, шунингдек, аҳоли гавжум ҳудудларда — деҳқон бозори ва шифохона атрофидаги “Тўхташ тақиқланган” йўл белгиси амал қиладиган жойларда автомобилларни ноқонуний тўхтатиш билан боғлиқдир.
Жамоат хавфсизлиги ва йўлларда тартиб-интизомни таъминлаш ҳар бир фуқаронинг онгли муносабатига боғлиқ. Бундай профилактик ва ҳуқуқий тушунтириш ишларининг изчил давом эттирилиши жамиятда қонунбузарликларга нисбатан муросасиз муносабатни шакллантиришга хизмат қилади. Энг муҳими, ҳар бир фуқаро қонун талабларига риоя этишни шахсий бурчи деб билган тақдирдагина ҳудудларда тинчлик-осойишталик, хавфсиз муҳит ва барқарор тартиб таъминланади.
Фурсатдан фойдаланиб, барча юртдошларимизни йўл ҳаракати қоидаларига қатъий амал қилишга, автотранспорт воситаларини тегишли ҳужжатлар асосида бошқаришга, ички ишлар органлари ходимларининг қонуний талабларига бўйсунган ҳолда ҳаракат қилишга чақирамиз. Айниқса, аҳоли гавжум жойларда белгиланган йўл белгиларига амал қилиш, тақиқланган ҳудудларда транспорт воситаларини тўхтатмаслик ва жамоат осойишталигини бузувчи ҳар қандай ҳаракатлардан тийилиш зарур. Зеро, қонунга итоат ва юксак маданият — хавфсиз ва осойишта ҳаёт гаровидир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
