Jinoyat ishlari boʻyicha Amudaryo tumani sudi binosida ochiq sud majlisi oʻtkazildi

Huquqiy davlat va adolatli jamiyat barpo etish yoʻlida qonun ustuvorligini taʼminlash, huquqbuzarliklarning oldini olish hamda fuqarolarning huquqiy ongi va madaniyatini yuksaltirish ustuvor vazifalardan biri sanaladi. Ayniqsa, joylarda maʼmuriy huquqbuzarliklar boʻyicha ochiq muhokamalar oʻtkazilishi nafaqat sodir etilgan holatlarga huquqiy baho berish, balki aholi oʻrtasida qonunga hurmat ruhini mustahkamlashga ham xizmat qiladi.

Amudaryo tumanida huquqbuzarliklarning oldini olish, jamoat tartibi va yoʻl harakati xavfsizligini taʼminlashga qaratilgan ana shunday sayyor sud majlisi oʻtkazildi. Jinoyat ishlari boʻyicha Amudaryo tumani sudi binosida boʻlib oʻtgan mazkur ochiq sud majlisiga Jinoyat ishlari boʻyicha Taxiatosh tuman sudining tergov sudyasi Artur Davletov raislik qildi.

Sud jarayonida tuman hududida qayd etilgan ayrim maʼmuriy huquqbuzarliklar yuzasidan toʻplangan ish hujjatlari atroflicha koʻrib chiqildi. Xususan, ichki ishlar organlari xodimlarining qonuniy talablariga boʻysunmaslik bilan bogʻliq holatlar, shuningdek, avtotransport vositalariga ruxsat etilmagan ovoz chiqaruvchi qurilmalar, jumladan sirena kuchaytirgichlari oʻrnatish bilan bogʻliq qoidabuzarliklar muhokama markazida boʻldi.

Majlis davomida huquqbuzarlik sodir etgan shaxslarga amaldagi qonunchilik normalari mazmun-mohiyati keng tushuntirildi. Sudya tomonidan bunday xatti-harakatlar jamiyat xavfsizligi, yoʻl harakati intizomi va fuqarolar osoyishtaligiga salbiy taʼsir koʻrsatishi alohida taʼkidlandi. Shu bilan birga, kelgusida bu kabi holatlarga yoʻl qoʻymaslik yuzasidan profilaktik tushuntirish ishlari olib borilib, qonun doirasida tegishli choralar belgilandi.

Tahlillar shuni koʻrsatmoqdaki, bugungi kunda tumanda uchrayotgan huquqbuzarliklarning salmoqli qismi transport vositalarini tegishli hujjatlarsiz boshqarish, yoʻl-patrul xizmati xodimlarining toʻxtash haqidagi qonuniy ishoralariga amal qilmaslik, shuningdek, aholi gavjum hududlarda — dehqon bozori va shifoxona atrofidagi “Toʻxtash taqiqlangan” yoʻl belgisi amal qiladigan joylarda avtomobillarni noqonuniy toʻxtatish bilan bogʻliqdir.

Jamoat xavfsizligi va yoʻllarda tartib-intizomni taʼminlash har bir fuqaroning ongli munosabatiga bogʻliq. Bunday profilaktik va huquqiy tushuntirish ishlarining izchil davom ettirilishi jamiyatda qonunbuzarliklarga nisbatan murosasiz munosabatni shakllantirishga xizmat qiladi. Eng muhimi, har bir fuqaro qonun talablariga rioya etishni shaxsiy burchi deb bilgan taqdirdagina hududlarda tinchlik-osoyishtalik, xavfsiz muhit va barqaror tartib taʼminlanadi.

Fursatdan foydalanib, barcha yurtdoshlarimizni yoʻl harakati qoidalariga qatʼiy amal qilishga, avtotransport vositalarini tegishli hujjatlar asosida boshqarishga, ichki ishlar organlari xodimlarining qonuniy talablariga boʻysungan holda harakat qilishga chaqiramiz. Ayniqsa, aholi gavjum joylarda belgilangan yoʻl belgilariga amal qilish, taqiqlangan hududlarda transport vositalarini toʻxtatmaslik va jamoat osoyishtaligini buzuvchi har qanday harakatlardan tiyilish zarur. Zero, qonunga itoat va yuksak madaniyat — xavfsiz va osoyishta hayot garovidir.