Ёшлар учун яратилган имкониятлар — амалий натижаларга айланмоқда
Мамлакатимизда ёшларни иш билан таъминлаш, уларнинг ташаббусларини қўллаб-қувватлаш ва айниқса, тадбиркорликка кенг жалб этиш борасида амалга оширилаётган тизимли ислоҳотлар бугун ўз мевасини бермоқда. Бу ислоҳотлар нафақат шаҳар марказларида, балки чекка-чекка овул ва маҳаллаларда ҳам ўз аксини топаётгани диққатга сазовордир. Бир пайтлар иш қидириб, ўз йўлини топишга қийналган йигит-қизлар бугун нафақат ўзларини банд қилмоқдалар, балки тенгдошлари учун ҳам янги иш ўринлари яратиб, ҳақиқий замон қаҳрамонларига айланмоқдалар. Ана шундай шижоатли ва изланувчан ёшлардан бири амударёлик Исроил Исмоиловдир.
Бундан атиги икки йил аввал Исроил ҳам кўпчилик тенгдошлари қатори ишсиз, келажакка катта умид, аммо бироз хавотир билан боқар эди. Бироқ давлатимиз томонидан ёшлар тадбиркорлигини қўллаб-қувватлаш мақсадида яратилаётган имкониятлар унинг ҳаётида бурилиш ясади. У мамлакатимизда ёшларни қўллаб-қувватлаш мақсадида берилаётган имтиёзлардан унумли фойдаланишга қарор қилди. Ўз орзусини рўёбга чиқариш йўлида дадил қадам ташлаб, банкдан 100 миллион сўм миқдорида имтиёзли кредит олди. Бу маблағ нафақат бир ёш йигитнинг бизнеси учун бошланғич капитал, балки унинг келажакдаги муваффақиятлари учун берилган ишонч рамзи ҳам эди.
Исроил Амударё туманининг Қиличбой овулида автомобилларни таъмирлаш шохобчасини ташкил этди. Унинг саъй-ҳаракатлари натижасида овулда яна икки нафар ёшлар ҳам доимий иш ўрнига эга бўлди. Бу дегани, яна иккита оилага даромад кирди, икки нафар ёш йигит устачилик сирларини ўрганиб, ҳунар эгасига айланди.
Исроилнинг фаолияти фақатгина автомобилларга техник хизмат кўрсатиш билан чекланиб қолмади. У иш жараёнида мижозларнинг эҳтиёжларини синчиклаб ўрганди ва муҳим бир муаммони пайқади. Илгари автоустахонага келаётган ҳайдовчилар эҳтиёт қисмларини олиш учун туман марказига боришга мажбур бўлардилар. Бу эса ортиқча вақт ва харажат демакдир. Мижозларнинг оворагарчилигига чек қўйиш мақсадида, лавҳамиз қаҳрамони устахона қошида автомобиль эҳтиёт қисмлари билан савдо қилувчи дўкон фаолиятини ҳам йўлга қўйди. Эндиликда овулдошлари ва шу атрофдан ўтувчи ҳайдовчилар устахона хизматларидан фойдаланиш билан бирга эҳтиёт қисмларни ҳам шу ернинг ўзидан харид қилишмоқда.
Бундай муваффақиятлар замирида аввало тинимсиз меҳнат ва давлат томонидан кўрсатилаётган юксак эътибор мужассам. Исроил Исмоиловнинг бугунги фаолияти – мамлакатимизда олиб борилаётган ислоҳотларнинг энг чекка ҳудудлардаги жонли ифодасидир. Унинг мақсадлари эса янада улкан. Қаҳрамонимиз эришилган натижалар билан тўхтаб қолмоқчи эмас. У келгусида Амударё туманининг бошқа ҳудудларида ҳам шундай замонавий сервис шохобчаларини очишни режалаштирган. Бу эса яна ўнлаб янги иш ўринлари, яна кўплаб ёшларнинг бандлиги ва ҳудудларда тадбиркорликнинг янада ривожланиши демакдир.
Исроилнинг тажрибаси шуни кўрсатадики, ҳаракат қилган ва берилган имкониятдан тўғри фойдаланган ёшлар ҳеч қачон кам бўлмайди. Бу каби жасоратли ва ташаббускор ёшларнинг кўпайиши юртимиз иқтисодиётининг барқарорлигини таъминлаш билан бирга, бошқа тенгдошлари учун ҳам ўзига хос мотивация манбаи бўлиб хизмат қилади. Зеро, ҳар бир ёш тадбиркорнинг муваффақияти – бутун мамлакатнинг ютуғи ва эртанги порлоқ келажагимизнинг кафолатидир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
