Маҳалла банкирлари иштирокида йиғилиш ўтказилди
Мамлакатимизда аҳоли турмуш фаровонлигини юксалтириш ва ҳудудларни ижтимоий-иқтисодий жиҳатдан жадал ривожлантириш давлат сиёсатининг энг устувор йўналишларидан бири саналади. Яқиндагина Ўзбекистон Республикаси Президенти Шавкат Мирзиёев бошчилигида ўтказилган кенгайтирилган видеоселектор йиғилишида ҳам айнан шу масалаларга алоҳида эътибор қаратилиб, ҳудудларда иқтисодий ўсишни янада жадаллаштириш, аҳоли бандлигини таъминлаш ва уларнинг турмуш даражаси ҳамда реал даромадларини оширишга қаратилган кўплаб долзарб вазифалар белгилаб берилган эди.
Давлатимиз раҳбари томонидан илгари сурилган ушбу муҳим топшириқлар ва кўрсатмаларнинг жойлардаги ижросини таъминлаш мақсадида республикамизнинг барча ҳудудларида кенг кўламли амалий ишлар бошлаб юборилди. Жумладан, Марказий банкнинг Қорақалпоғистон Республикаси Бош бошқармаси ҳамда Ўзбекистон маҳаллалари уюшмасининг Қорақалпоғистон Республикаси бошқармаси ҳамкорлигида Амударё тумани ҳокимлиги биносида маҳалла банкирлари иштирокида йиғилиш ташкил этилди. Йиғилишда жойлардаги “Маҳалла еттилиги” вакиллари, ҳудудда фаолият олиб бораётган тижорат банкларининг масъул ходимлари ҳамда мутахассислари иштирок этишди.
Учрашув давомида кун тартибидаги масалалар атрофлича таҳлил қилиниб, келажакдаги аниқ режалар белгилаб олинди. Хусусан, жойлардаги барча маҳаллаларнинг ўзига хос иқтисодий хусусияти, драйвер соҳалари ва мавжуд имкониятларидан келиб чиққан ҳолда янги микролойиҳаларни шакллантириш ҳамда уларни ҳаётга татбиқ этиш масаласига эътибор қаратилди.
Бундан ташқари, аҳолини, айниқса, уюшмаган ёшлар ва хотин-қизларни тадбиркорлик фаолиятига кенг жалб қилиш, уларнинг бизнес ташаббусларини молиявий жиҳатдан қўллаб-қувватлаш учун ажратилаётган имтиёзли кредит маблағларидан мақсадли ва самарали фойдаланишни ташкил этиш масаласи муҳокама қилинди. Шу билан бирга, янги иш ўринларини яратиш ва бу жараёнда аҳоли билан ишловчи маҳалла банкирлари фаолиятининг самарадорлигини янада ошириш бўйича устувор вазифалар белгиланди.
Тадбирда сўзга чиққан мутахассислар томонидан қайд этилганидек, бугунги кунда фақатгина умумий ёндашувлар ва эски қолиплар билан чекланиб қолмасдан, барча ҳудудларнинг ўзига хос иқтисодий салоҳиятини тўлиқ ишга солиш талаб этилмоқда. Бунинг учун эса маҳаллалардаги барча хонадонларга кириб бориш, оилаларнинг ижтимоий ҳолатини чуқур ўрганиш орқали улар билан манзилли ва якка тартибда ишлаш тизимини янги босқичга олиб чиқиш зарурлиги алоҳида таъкидланди. Жойлардаги аҳоли томонидан билдирилаётган истиқболли ташаббуслар ва ғояларни давлат томонидан қўллаб-қувватлаш орқали уларнинг доимий даромад манбаини шакллантириш ҳамда бандлигини таъминлаш бугунги куннинг энг асосий мақсади қилиб олинди.
Ушбу йиғилишда белгилаб олинган кенг кўламли вазифаларнинг тўлақонли ижро этилиши келгусида Амударё тумани ва умуман, Қорақалпоғистон Республикаси ҳудудларида кичик бизнес ҳамда хусусий тадбиркорлик муҳитини жадал ривожлантиришга ҳисса қўшади. Энг муҳими, бу каби тизимли ва манзилли саъй-ҳаракатлар натижасида кўплаб янги иш ўринлари яратилиб, юртдошларимизнинг турмуш даражаси ва оилалар фаровонлигини оширишга эришилади. Бу эса ўз навбатида, бутун мамлакатимизнинг умумий иқтисодий барқарорлигини таъминлашда энг муҳим пойдевор вазифасини ўташи шубҳасиздир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
