Амударё туманида Халқлар дўстлиги куни кенг нишонланди

Ўзбекистон азалдан турли миллат ва элат вакиллари аҳил, тотув ва бир оила фарзандларидек яшаб келаётган бағрикенг диёр сифатида бутун дунёга маълум ва машҳурдир. Ушбу табаррук заминдаги тинчлик, осойишталик ва ўзаро ҳурмат муҳити мамлакат тараққиётининг, халқ фаровонлигининг энг муҳим пойдевори ҳисобланади. Ана шундай буюк қадриятларни ўзида мужассам этган ва халқимизнинг қон-қонига сингиб кетган меҳр-оқибат, аҳиллик туйғуларини янада жонлантириш мақсадида, юртимизда 30 июль санаси «Халқлар дўстлиги куни» сифатида нишонланиб келинмоқда.

Жорий йилда ҳам ушбу сана муносабати билан республикамизнинг барча гўшаларида катта байрам тадбирлари, маданий-маърифий кечалар юқори савияда ташкил этилди. Хусусан, Амударё туманида ҳам миллатлараро тотувлик, ўзаро ҳурмат ва бирдамлик ғояларини улуғловчи, қалбларни эзгуликка чорловчи «Дўстлик фестивали» катта тантана билан, ўзгача шукуҳда бўлиб ўтди.

Байрам тадбирига туман ҳокими ўринбосари Жасур Яхшимов, қатор давлат ва жамоат ташкилотлари раҳбарлари, кўпни кўрган дуогўй нуронийлар, кенг жамоатчилик вакиллари ҳамда туманнинг турли бурчакларидан ташриф буюрган аҳоли вакиллари жам бўлди.

Тадбирнинг расмий қисмида сўзга чиққанлар томонидан бугунги кунда жонажон юртимизда турли миллат ва элат вакиллари ўртасидаги дўстлик, ҳамжиҳатлик ҳамда ўзаро ҳурмат муҳитини янада мустаҳкамлаш, барчамиз учун бебаҳо неъмат бўлган тинчлик ва осойишталикни кўз қорачиғидек асраб-авайлаш борасида давлатимиз томонидан амалга оширилаётган кенг кўламли, эзгу ишлар алоҳида эътироф этилди.

Таъкидланганидек, бугунги кунда Ўзбекистонда истиқомат қилаётган барча миллат вакиллари ягона мақсад — Ватанимизни янада ривожлантириш, унинг дунё ҳамжамиятидаги ўрнини юксалтириш йўлида ҳамжиҳатликда фидокорона меҳнат қилиб, турли соҳаларда жуда юқори ва салмоқли натижаларга эришиб келмоқда.

Фестиваль туман Маданият бўлими иқтидорли санъаткорлари ва бадиий ҳаваскорлик жамоаларининг чиқишлари билан давом этди. Улар ижросидаги дилбар куй-қўшиқлар, жўшқин мусиқий чиқишлар ҳамда миллий қадриятларимизни, халқлар ўртасидаги азалий дўстликни тараннум этувчи саҳна кўринишлари байрамга янада файз ва жозиба бағишлади. Ранг-баранг миллий либослардаги ижрочиларнинг чиқишлари, турли тилларда янграган шўх тароналар тадбир иштирокчиларига унутилмас лаҳзаларни ҳадя этди.

Бундай байрамона ва жозибадор дастурлар иштирокчиларнинг барчасига кўтаринки кайфият улашиб, уларнинг қалбидаги дўстлик ва бирдамлик ғояларини янада мустаҳкамлади. Айнан мана шундай маданий тадбирлар халқимизнинг кўп асрлик бағрикенглик анъаналарини, миллатлараро аҳиллик ва ўзаро ҳурмат тамойилларини кенг оммага тарғиб этишга, жамиятимиздаги бирлик ва ҳамжиҳатлик муҳитини ҳар қачонгидан ҳам мустаҳкамлашга хизмат қилади.

Таъкидлаш жоизки, «Халқлар дўстлиги куни» байрами ва унинг доирасидаги «Дўстлик фестивали» нафақат Амударё туманида, балки бутун юртимиз бўйлаб ҳар йили ушбу санада кенг турда ўтказиб келинмоқда. Кенг кўламда нишонланаётган ушбу умумхалқ байрами тадбирлари энг чекка ва олис овуллардан, маҳаллалардан бошлаб, йирик шаҳарлар ва туманларгача қамраб олган бўлиб, ўзига хос халқ сайиллари кўринишида давом этмоқда. Ушбу сайилларда миллий маданий марказлар ҳам фаол иштирок этмоқда. Улар томонидан ташкил этилган кўргазмаларда ҳар бир миллатнинг ўзига хос миллий таомлари, моҳир рассом ва ҳунармандларнинг қўл меҳнати билан яратилган амалий санъат асарлари намойиш этилмоқда. Бу кўргазмалар турли маданиятларнинг гўзал бир гулдастага айланиб, томошабинлар эътиборига ҳавола этилмоқда ва энг асосий бойлигимиз бўлган юртимиз тинчлигини сақлашда, халқлар дўстлигини, миллатлараро тотувликни янада мустаҳкамлашда ғоят катта аҳамият касб этмоқда. Чунки тинчлик ва аҳиллик бор жойдагина тараққиёт ва фаровонлик бўлади.

Фестиваль доирасидаги байрам тадбирининг давоми таниқли хушовоз хонандалар ижросидаги катта гала-концерт дастурига уланиб кетди. Очиқ осмон остида янграган куй-қўшиқлар тадбирга йиғилган юртдошларимиз қалбида унутилмас хотиралар қолдирди ва мамлакатимизда ҳукм сураётган дўстлик, тинчлик ва тотувликнинг абадийлигини яна бир бор намоён қилди.