“Обод турмуш йили“ янгиликлари

Фаровонликка ҳисса

1998 йилда ташкил этилган "Бўзёп” овул фуқаролар йиғинида 4800 нафардан зиёд ўзбек, қозоқ, қорақалпоқ, туркман, татар каби турли миллат вакиллари аҳил иноқ яшашмоқда. Овул аҳолиси асосан қишлоқ хўжалигида, таълим ва тиббиёт муассасаларида меҳнат қилишади.

Кейинги йилларда уй меҳнати ва касаначиликни ривожлантириш, аёлларнинг оиласи бағридан ажралмай ижтимоий фойдали меҳнат билан шуғулланишларига кенг имкониятлар яратиб беришга улкан эътибор берилаётгани боис, овулнинг 98 нафар аёли уй меҳнати билан банд бўлиб, даромад топмоқда. Бу ўз навбатида мазкур оилалар фаровонлигига хизмат қилиши шубҳасиз.

Аҳоли хизматида

"Бўзёп” овулида 6 та хусусий дўконлар ва 1 та гўшт дўкони мавжуд бўлиб, аҳолининг кундалик эҳтиёж молларига бўлган талабини тўла қоплашаяпти. Туман марказидан олисда жойлашган ҳудуд аҳолиси учун сифатли ва арзон моллар билан тўла мавжуд дўконлар фаолияти айни муддаодир.

Томорқа – кони фойда

Бугунги кунда томорқа ерлар хонадонларнинг ўз оиласи эҳтиёжларига яраша турли мева полиз ва сабзавот экинлари етиштириб, ортганини бозорга сотиб, иқтисодига ижобий таъсир этадиган фойдали манба экинлигини барча англаб етди ва ундан унумли фойдаланишаётир.

"Бобур” овулидаги мавжуд 647 та хонадоннинг деярли барчаси томорқа ерларига эга бўлиб айни кунда турли экинлар етилиб турибди. Шунингдек, 40 та деҳқон хўжалиги ихтиёридаги 14 гектар ерда ҳам айни пишиқчилик.

Намунали ҚВПлар

Истиқлол йилларида аҳоли саломатлигини яхшилашга, баркамол авлодни шакллантиришга, оилада тиббий маданиятни оширишга, соғлом турмуш тарзини тарғиб қилишга берилаётган эътибор натижасида туманимиз аҳолисининг саломатлик кўрсаткичлари сезиларли даражада яхшиланди.

Тумандаги барча қишлоқ врачлик пунктлари қошида дорихона шохобчалари ва фитобарлар ташкил қилинди.

Намунали қишлоқ врачлик пунктини яратиш бўйича туманда кенг кўламли ишлар олиб борилмоқда. Жумладан Бердақ, Охунбобоев, Тўлқин, Қипчоқ, Маданият, Ўрта қалъа ва Хитой қишлоқ врачлик пунктлари намунали ҚВПларга айлантирилди.

"Оқ олтин” ва "Й.Ўрозбоев” ҚВПларини ҳам шундай даволаш муассасаларига айлантириш мақсадида уларда капитал таъмирлаш ишлари амалга оширилмоқда.

Шу кунгача "Оқ олтин” ҚВПни таъмирлашга 40 млн. сўм, "Й. Ўрозбоев” ҚВПни таъмирлашга 30 млн. сўм маблағ сарфланди.

 "Қорақалпоғистон” системаси қайта тикланмоқда

Узунлиги 170 км. бўлган "Қорақалпоғистон” коллектор тармоғини таъмирлаб, қайта тиклаш мақсадида 1219 миллион сўм пул маблағи ажратилган эди. Айни кунда бу объектда 4 та экскаватор ва 1 та бульдозер ёрдамида системани таъмирлаш ишлари қизғин олиб борилмоқда.

Жорий йилнинг 1 август ҳолатига "Қорақалпоғистон” системасининг 113 километрида жами 775 миллион сўмлик таъмирлаш-тиклаш ишлари амалга оширилди.