ЯНГИ ЙИЛ МАДҲИ

Кўп сўрасак, балки инсофданмасдир,

Асли қилдай нафдан тўлади кўнгил.

Тинчлик, саломатлик бўлса-ку басдир,

Бу неъматлар мўл кўл бўлсин, Янги йил!

Ака-ука, опа-сингил-қариндош,

Бари бир ёқадан чиқаришиб бош,

Эл-юрт хизматида бўлишсин бош-қош,

Юртимиз чиройли бўлсин, Янги йил!

Бир байрам қилайлик чақнаб кўзимиз,

Дўст-у ёр эшитсин табрик сўзимиз,

Қорбобо-ўзимиз, Қор қиз-қизимиз,

Болалар кутганин олсин, Янги йил!

Юртим келажаги-соғлом болалар,

Бу байрамда беҳад қувонар улар,

Бизнинг эътибордан олиб баҳралар,

Бир соф қалбли инсон бўлсин, Янги йил!

Бугун қор тагида ухлаётган ер,

Элнинг ризқига куч йиғмоқдаман дер,

Деҳқон элдошларим қанча тўкса тер,

Шунчалар зўр хирмон бўлсин, Янги йил!

"Қари биганини билмайди пари”,-

Деган-ку элимнинг донишмандлари,

Ёшлари улғайиб боргани сари,

Кексалар эъзозда бўлсин, Янги йил!

Аҳмад НАФАСОВ

Йилларнинг кетидан, йиллар алмашиб

Иқбол тилаб келар, бугун янги йил

Оқ либос кийдириб, еру-самога

Қорга белаб келар, бугун янги йил

Қорбобо қорқизин етаклаб, шошиб

Неча ўлкалар-у, неча қир ошиб

Соғлом болаларга совға улашиб

Бошин силаб келар бугун янги йил

Саришта-саранжом ҳар бир уйимиз

Не ажиб ушалса, орзу-ўйимиз.

Хушчақчақ ўтказиб, ҳар бир тўйимиз-

Тўйга улаб келар бугун янги йил.

Қувонч-шодлик билан ҳар бир хонадон

Янги йил кутади ўғил-қиз шодон.

Қорбобо, қорқиз-ла бўлишиб меҳмон,

Тошиб, тўлиб келар бугун янги йил.

Ўзбекка тўй-байрам азал-азал хос,

Тўй ўзбекка лойиқ, ўзбек тўйга мос.

Бу йилги янги йил сўзимга асос-

Далил бўлиб келар бугун янги йил.

Барча бахти кулган болажонларин,

Мўътабар, мехрибон онажонларин,

Мўйсафид, кекса-ю, отахонларин

Эъзоз қилиб келар бугун янги йил.

Шомурод ХЎЖАНОВ