АМУДАРЁ ТЕЛЕВИДЕНИЕСИ ТАҲРИРИЯТИ ТОМОНИДАН ЎТКАЗИЛГАН “МАҲАЛЛАМИЗНИНГ ЭНГ ЗИЁЛИ ОИЛАСИ” ТАНЛОВИ ҒОЛИБЛАРИ АНИҚЛАНДИ

Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” грант лойиҳаси доирасида ёшлар маънавиятини юксалтириш, улар онгида Ватанга муҳаббат, миллий ва умуминсоний қадриятларга садоқат руҳини шакллантириш мақсадида турли тадбирлар, танловлар ўтказилиб, тарғибот ишлари олиб борилмоқда. Таҳририят ходимлари томонидан ташкил этилган ушбу тадбирлар нафақат ёшлар, балки турли ёшдаги аҳолига ҳам манзур бўлиб, барчасида фаол иштирок этишмоқда.

14 июнь куни мазкур грант лойиҳаси доирасида “Маҳалламизнинг энг зиёли оиласи” танлови ғолибларини тақдирлаш маросими бўлиб ўтди. Ушбу маросимда “Жайҳун илҳомлари” нодавлат нотижорат ташкилоти раҳбари Ўрозали Рейимов ҳамда Амударё телевидениеси таҳририяти ходимлар иштирок этишди. Шунингдек, ҳудудларда ижтимоий-маънавий-муҳит барқарорлигини таъминлашга ҳисса қўшиш, аҳоли ўртасида оилавий китоб ўқиш анъанасини оммалаштириш, оилаларда кутубхоналар ташкил қилишни тарғиб қилиш, шу орқали оила аъзоларининг маънавиятини юксалтиришга эришиш каби мақсадларда ўтказилган ушбу танловда фаол қатнашган ва ғолиб бўлган оилалар ташриф буюришди.

Бўстон маҳалласидан ташриф буюрган тадбиркор, ҳожи она Гуласал Ўрозметованинг оиласида 13 нафар аъзоси бор. У 2 ўғли, 3 келини, 8 невараси билан яшаб келмоқда. Катта ўғли Руслан Искандаров туман Ички ишлар бўлимида хизмат қилади. Кичик ўғил Зафаржон эса қурилиш ишлари билан шуғулланадиган “Виктория-холдинг” МЧЖ раҳбари бўлиб ишлайди. Катта келини Нодирахон “Истиқлол” тўйхонасини бошқаради, иккинчи келин Малоҳатхон “ARISTOKRAT-baby” нодавлат оилавий МТТ раҳбари, кичик келин эса савдо ходими.

Гуласал опа раҳматли умр йўлдоши Тўлибой ака билан биргаликда оилада фарзандларининг билимли, ўқимишли, бўлишларига алоҳида эътибор қаратишди. Шу туфайли улар кичик ёшданоқ китобхонликка, билим олишга қизиқиб, ўзлари танлаган касбларнинг эгалари бўлиб етишишди. Эндиликда эса онахон невараларнинг бўш вақтларидан унумли фойдаланишларига имконият яратиб, кўпроқ китобхонликка қизиқтиришмоқда.

Онахон ўз фарзандлари билан биргаликда кўплаб хайрли ишларга ҳам бош-қош бўлмоқда. “Виктория-холдинг” МЧЖда 35 та, “ARISTOKRAT-bebi” нодавлат оилавий МТТда 16 та иш ўрни яратиб, ишсиз фуқароларнинг бандлигини таъминлашди. Яқинда Хитой Республикасидан киритилган 150 минг АҚШ доллари миқдоридаги инвестиция маблағлари ҳисобидан ташкил этилиб, ишга туширилиши кутилаётган бетон заводида эса 150 та иш ўрни яратилиб, ишсиз фуқаролар бандлигини таъминлаш кўзда тутилмоқда. Қурилиш ташкилотига раҳбарлик қилиб келаётган фарзанди Зафаржон ўтган йили тумандаги Янгиобод маҳалла фуқаролар йиғини биносини ўз маблағи ҳисобидан қуриб фойдаланишга топширди.

Бойовул маҳалласидан зиёли оила деб топилган Эгамберган Ёдгоровлар оиласи аъзолари ҳам 13 нафардан иборат. Оила соҳиби Эгамберган Ёдгоров умр йўлдоши Пардагул Юсупова билан биргаликда 3 ўғилни вояга етказишган. Улар бири заводда, бири фабрикада ишчи бўлиб ишлашган ва фарзандларнинг билимли, ўқимишли бўлишларига алоҳида эътибор қаратишган. Ҳозир ўғиллар ҳам, шу оилага тушган 3 нафар келинлар ҳам тумандаги умумтаълим мактабларида ўқитувчи бўлиб ишлаб, элга зиё тарқатишмоқда. Зиёли оилада камолга етаётган 5 нафар невара ҳам бобо-бувиларидан эртаклар тинглаб, турли китобларни ўқиб, камолга етишмоқда.

Танловда ғолиб бўлган Гулзор маҳалласидаги Жумамуродовлар оиласида 2 ўғил, 2 қиз вояга етган бўлса, ҳозирда хонадонда 2 келин ва 4 нафар неваралар билан яшашади. Тумандаги собиқ 44-сонли автобазада шофёр бўлиб ишлаган оила соҳиби Бахтиёр Жумамуродов, 40-сонли мактабгача таълим ташкилотида тарбиячи бўлиб ишлаган хонадон бекаси Энажон Авезмуродовалар ҳам асосий вақтини фарзандларини эл корига ярайдиган инсонлар қилиб тарбиялашга бағишлаб, кам бўлишмади. Ҳозир ўғиллари ўз ҳунарлари билан эл хизматида бўлиб, оилаларига даромад топишмоқда. Қизлар ҳам бири тикувчи, бири пазанда бўлиб, келин бўлиб тушган хонадонларида ўзлари каби солиҳ фарзандлар тарбия қилишмоқда. Келинлар эса боғчада тарбиячи, ёш авлод таълим-тарбияси билан банд.

Шунингдек, туманимизнинг чекка ҳудудида жойлашган Назархон овулидан ташриф буюрган Тозахон Қдирниязова ҳам турмуш ўртоғи Хидирбой билан биргаликда 3 нафар қиз ва 1 нафар ўғил фарзандни тарбиялаб вояга етказмоқда. Тўнғич қизи Нилуфар ҳозирги кунда Театр ва санъат институти Нукус филиалининг 3-босқич талабаси.  Тозахон овулдаги 3-сонли мактабда кутубхоначи бўлиб ишлайди. У китобхонлик борасида бошқаларга ўрнак бўлиб, катта ютуқларни қўлга киритиб келмоқда. У ўтган йили Республикада ўтказилган китобхонлик фестивалида совриндор бўлиб қайтди. Бу йил Қорақалпоғистон Республикаси миқёсида ўтказилган китобхонлик фестивалида ғолиб деб топилди ҳамда биринчи даражали диплом ва фестивалнинг махсус кубоги билан тақдирланди.

Грант лойиҳаси доирасида ўтказилган “Маҳалламизнинг энг зиёли оиласи” танлови ғолибларини тақдирлаш маросимида оилалар билан суҳбатлар ўтказилиб, уларнинг ҳаётидаги ютуқлари, оилавий китобхонликка бўлган муносабати, оиладаги тарбиявий удумлар, одатлар хусусида сўзлашилди. Невараларнинг бобо-бувиларидан эшитган эртаклари, китобхонлик ҳақидаги шеърлари тингланди. Шундан сўнг, танловда ғолиб деб топилган ҳар бир оилага фахрий ёрлиқ ва совғалар топширилди.

Грант лойиҳаси доирасидаги маънавий-маърифий аҳамиятга эга бўлган мазкур тадбир жуда қизиқарли ўтди. Оилаларининг туманда энг зиёли деб эътироф этилгани, эътибор кўрсатилиб рағбатлантирилганидан хурсанд бўлган иштирокчилар ташкилотчиларга ўз миннатдорчиликларини билдиришди.

 О.Худойберганова.