ДЎСТЛИК МФЙНИНГ ПИР-У БАДАВЛАТ ОНАХОНЛАРИ ИШТИРОКИДА “ОНАЛАР ЎГИТИ” ТАДБИРИ ЎТКАЗИЛДИ

Маҳалла – қадриятлар бешиги. Инсонларнинг ўзаро меҳр-оқибатлари, муомала-муносабатлари, маънавий қиёфаси, миддий-ахлоқий фазилатлари мужассам макон. Бу маконда бегона йўқ, ҳамма бири-бирига дўст-у қадрдон, меҳрибон. қўшни-қўшнисига қайишган, тўй-маросимларида жам-ул жам бўлишиб, қувонч-у ташвишларига елка тутишган аҳил жамият.

Ана шу аҳилликни янада мустаҳкамлаш, ўзлари яшаётган маҳалла нуфузи, оилалар обрў-эътиборини ошириш мақсадида маҳаллалардаги ишчи комиссиялари ва жамоатчилик тузилмалари аъзолари барча муаммоли масалаларда ҳамфикр ва ҳамкордирлар. Айниқса, хотин-қизлар билан ишлаш комиссияси томонидан амалга оширилаётган ибратли ишлар туфайли маҳаллалар ҳудудлари тобора ободонлашиб, оилавий низолар, ўзаро қўйди-чиқдиларга барҳам берилаётгани эътиборга молик. Бу каби кўнгилларга манзур ҳолатга биз Манғит шаҳрининг Дўстлик маҳалла фуқаролар йиғинида жорий йилнинг 20 июнь санасида бўлиб ўтган давра суҳбатида гувоҳ бўлдик.

Амударё телевидениесининг “Юксак маънавиятли ёшлар – келажак пойдевори” грант лойиҳаси доирасида ўтказилган “Оналар ўгити” мавзусидаги давра суҳбатида Дўстлик маҳалласининг обрўли, эл-юрт ҳурматига сазовор онахонлари, кўчалар бўйича катхудо, кўчабошчи аёллар “Бувижонлар мактаби” аъзолари, “Оқила аёллар” ҳаракати етакчилари ҳамда ёш аёл-қизлар иштирок этдилар.

Давра суҳбатини Дўстлик МФЙ хотин-қизлар фаоли Шоира Худойберганова бошлаб берди. У Дўстлик МФЙда хотин-қизларни ҳар томонлама қўллаб-қувватлаш, уларнинг ижтимоий фаоллигини ошириш, оилавий низоларнинг олдини олишда жамоатчилик тузилмаларининг аҳамияти, хусусан, МФЙ ҳузуридаги “Оқила аёллар” ҳаракати, Аёллар масалаҳат Кенгаши аъзолари томонидан амалга оширилаётган кенг қамровли маънавий-тарбиявий ишлар ҳақида тўхталиб, кўпни кўрган, пир-у бадавлат онахонларимизнинг саъй-ҳаракатлари туфайли ёшларни, турмушга тайёрлаш, ёш оилаларнинг мустаҳкамлигини таъминлаш борасида қувонарли ютуқларга эришилаётгани ҳақида сўз юритди. Дарвоқе, Дўстлик МФЙ ҳудуди ва аҳоли сони жиҳатидан Манғит шаҳридаги катта маҳаллалардан бири саналади. 570 хонадон таркибидаги 912 та оилада 3781 нафар аҳоли истиқомат қилади.

Аҳолининг 1928 нафарини аёл-қизлар ташкил этади ва уларнинг асосий қисми ёшлардир. Маҳаллада 12 та кўча бўлиб, ҳар бир кўчага аёллардан ҳам кўча бошчилари сайланган. 15 нафардан иборат аъзоси бўлган Аёллар маслаҳат Кенгаши, 12 нафар ибратли оилалар бекаларидан иборат “Оқила аёллар” ҳаракати аъзолари ўзаро ҳамкорликда иш олиб боришлари туфайли сўнгги бир неча йил давомида маҳаллада нотинч оилалар, шунингдек, оилавий ажралишлар кескин камайди. “Оналар ўгити” давра суҳбатида иштирок этган “Юксак маънавиятли ёшлар – келажак пойдевори” лойиҳаси координатори, “Тараққиёт кўзгуси” ва “Менинг оилам” газеталарининг махсус мухбири, журналист Робия Йўлдошева бугунги давр тақозосидан келиб чиқиб, оилалар мустаҳкамлигини таъминлашда пир-у бадавлат онахонларнинг маслаҳат ва ўгитларига амал қилиш кўпдан-кўп оилавий можароларга ечим топиш имконини бераётгани, ёшлар ана шундай азиз ва нуроний онахонлардан ибрат олишга интилаётганини мамнуният билан таъкидлади.

Айниқса, кўпни кўрган, ҳаёт синовларини мардонавор енгиб ўтган нуроний онахонлар ҳаёти ёшлар учун ҳақиқий маънавият мактаби вазифасини ўтаётганини ҳаётий мисоллар орқали тадбир иштирокчиларига сўзлаб берди. Давра суҳбатида “Оқила аёллар” ҳаракати етакчиси Шукуржон Эрматова ёш келин ва қайнонанинг ўзаро муносабатлари, улар ўртасидаги айрим зиддиятлар, шу баробарида бу келишмовчиликларнинг келиб чиқиш сабаблари хусусида ўз фикрларини билдириб, кимматли маслаҳатларини берди. Кўча бошчиси Гулбаҳор Ўрозметова, кўча бошчиси ва “Оқила аёллар” ҳаракати аъзоси Гулнора Нуруллаева, маҳалла фаолларидан Ўрозгул Тиловмуродовалар, ўзларининг ёшлар тарбияси, оилавий ажрашишларнинг олдини олиш, бугунги ёш қизларнинг ўзини тутишлари, кийиниш маданияти хусусидаги фикрлари билан ўртоқлашдилар ва ёшларни миллий-маънавий қадриятлар руҳида тарбиялаш бўйича ўзларининг ҳаётий тажрибаларидан келиб чиқиб, зарур тавсия ва қимматли маслаҳатларини бердилар.

Маҳмуджон Шомуродов, Равшан Баҳромов, Амударё телевидениеси мухбирлари.