ИЖОДКОР ОНАХОННИНГ ЁШЛАР БИЛАН УЧРАШУВИ БЎЛИБ ЎТДИ
Юртимизда кейинги йилларда инсон қадр-қиммати юксак тутилаётгани уларга маънавий куч бахш этаётир. Айниқса, адабиёт, маданият, санъат соҳасида умр бўйи меҳнат қилиб, улкан ҳаётий тажриба тўплаган фахрийлар билан ёшларнинг учрашувлари ўтказилаётгани, уларнинг босиб ўтган ҳаёт йўли ибрат қилиб кўрсатилаётгани ёшларда улкан таассуротлар қолдираяпти, элнинг муносиб фарзандлари бўлиб улғайишга рағбатлантираяпти.
Яқинда туман Маданият ва туризм бўлими ташаббуси билан бўлим томошалар залида элимизнинг таниқли фарзанди, ижодкор, санъаткор, маънавият тарғиботчиси Жумагул Юнусованинг туманимиз ёшлари билан учрашуви бўлиб ўтди.
“Қорақалпоғистонда хизмат кўрсатган маданият ходими” Гулмирза Нурматов, журналист, “Баркамол авлод” болалар мактаби директори, “Қорақалпоғистонда хизмат кўрсатган маданият ходими” Хонимжон Ражабова, Қорақалпоғистон халқ ўқитувчиси, 40-сонли мактаб директори Санобар Хўжамуродовалар, шунингдек, Жумагул Юнусова билан ҳаммаслак маданият ва маънавият соҳаси фахрийлари, санъаткорлар, ёшлар иштирок этдилар.
Тадбирда касб-ҳунар билим юртида ўқитувчи, туман Маънавият ва маърифат бўлими раҳбари, маҳалла хотин-қизлари етакчиси каби масъул лавозимларда ишлаш билан бир қаторда “Човдир масхарабоз” қўғирчоқ театрини ташкил этган ва фаолиятини юритган Жумагул Юнусованинг таржимаи ҳоли ўқиб эттирилди. Санъаткор онахон билан бир сафда меҳнат қилган фахрийлар, таълим соҳаси фидойилари сўзга чиқиб, Жумагул Юнусованинг серқирра фаолиятига юксак баҳо бердилар. Илк китобини муштарийлар ҳукмига ҳавола этган, иккинчи – “Соғинч” номли шеърий тўплами нашрга тайёранаётган, айни кунда тақдир тақозосига кўра Тошкент вилоятида истиқомат қилаётган Жумагул Юнусова сўзга чиқиб, ўзига кўрсатилаётган ҳурмат-эътибор учун барчага, тадбир ташкилотчиларига чуқур миннатдорчилик билдирди ва айни кундаги ижодий ишлари ҳақида гапириб берди.
Тадбир туманимиз санъаткорлари ижросидаги дилрабо куй-қўшиқлар билан давом этди. Санъаткор, ижодкор, маънавият фидойиси, кексайганида ҳам жамият ҳаётида фаол, ижоддан чарчамайдиган Жумагул Юнусованинг ёшлар билан учрашуви барчада ёрқин таассуротлар қолдирди.
Севара ИСМОИЛОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
