АМУДАРЁ ТУМАНИ “ЁЗГИ БИАТЛОН” БЎЙИЧА ҚОРАҚАЛПОҒИСТОН ЧЕМПИОНАТИГА МЕЗБОНЛИК ҚИЛДИ
Амударё туманида қорақалпоғистонлик ёшлар ўртасида ёзги биатлон бўйича Қорақалпоғистон чемпионати мусобақалари бўлиб ўтди.
15 сентябрь куни Ўзбекистон Республикаси Мудофаасига кўмаклашувчи “Ватанпарвар” ташкилоти Қорақалпоғистон Республикаси Кенгашининг тегишли буйруғига асосан ўтказилган ушбу мусобақаларда республика ҳудудидаги туманлардан 8 та жамоа иштирок этди.
Ташкилотнинг Амударё тумани Кенгаши ўқув-спорт техника клуби ўқув-машқ майдончасида ташкил этилган мусобақа эрталабдан тантанали равишда бошланди. Ёшлар ўртасида спортнинг техник ва амалий турларини янада кенгроқ тарғиб этиш мақсадида ўтказилган ушбу тадбирда туман ҳокимлиги, мудофаага кўмаклашувчи “Ватанпарвар” ташкилоти туман Кенгаши, Ёшлар ишлари Агентлиги туман бўлими, Спорт мактаби ҳамда бошқа ҳамкор ташкилотлар масъуллари ҳам иштирок этишди.
Тадбирни “Ватанпарвар” ташкилоти Қорақалпоғистон Республикаси Кенгаши раиси Қувват Разбеков очиб берди ва спортчиларга омад тилади. Шунингдек, у ёзги биатлон спорт турида енгил атлетиканинг кросс ва милтиқдан нишонни пойлаш элементлари мужассамлигини, биатлончининг асосий мақсади, белгиланган масофани максимал тезликда югуриб ўтиб, нишонни аниқ мўлжалга олиш эканлигини таъкидлади. Мусобақалар давомида спортчилар нишонни пойлашда бехато ҳаракат қилиши, кучларини масофанинг барчасига бир хил тақсимлай олиши кераклигини, шуниси билан ушбу спорт бошқа турлардан фарқ қилишини айтиб ўтди.
Амударё тумани Ўқув-спорт техника клуби бошлиғи Азизбек Исмоилов ҳам мазкур мусобақа республикамиз ёшлари ўртасида спортнинг техник ва амалий турларидан бири саналган ёзги биатлонни янада ривожлантириш, уни ўғил-қизлар орасида оммалаштириш ва иқтидорли спортчиларни аниқлаб олиш мақсадида ташкил этилгани, ғолиблар Ўзбекистон чемпионатида иштирок этиш имконига эга бўлишини эътироф этди.
Мусобақаларда республикамизнинг турли ҳудудларидан келган маҳоратли спортчилар ўз шижоатини, чаққонлигини намойиш этишга муваффақ бўлишди. Мусобақа шартига кўра жамоаларнинг ҳар бир аъзоси 3000 метрга югуриш ва оралиқда бир марта тик турган ҳолатда, кейинги айланани югуриб ўтиб, ётган ҳолатда ҳаво милтиғидан нишонларга ўқ отиш кабиларни бажаришди. Агарда берилган 5 та ўқдан нишонларга кам тегса, шунча марта югуриб, белгиланган жарима айланасини қўшимча равишда югуриб ўтдилар.
Мусобақалар шу тарзда курашларга бой ва қизғин ўтди. Барча жамоалар ғолиб чиқиш учун ҳаракат қилдилар. Мусобақа давомида яхши натижалар кўрсатган жамоалар ғолиб ва совриндорлар қаторидан ўрин олдилар.
Муросасиз ва қизиқарли ўтган беллашувларнинг якуний натижаларига кўра, ёзги биатлон бўйича Қорақалпоғистон чемпионатида 1-ўринни Беруний тумани Ўқув-спорт техника клуби жамоаси, 2-ўринни Амударё тумани Ўқув-спорт техника клуби, 3-ўринни Тўрткўл тумани Ўқув-спорт техника клуби жамоаси эгаллашди. Ёзги биатлон бўйича қорақалпоғистонлик ёшлар ўртасида бўлиб ўтган мусобақаларда ғолиб бўлган ёш иқтидор эгалари чемпионатнинг Ўзбекистон босқичига йўлланмани қўлга киритишди.
Мусобақа якунида ғолиб жамоа ва шахсий биринчиликка эришган спортчиларга “Ватанпарвар” ташкилоти томонидан дипломлар ва эсдалик совғалари топширилди.
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
