ЁШ ИЖОДКОРНИНГ ИЛК КИТОБИ ТАҚДИМОТИГА БАҒИШЛАНГАН ТАДБИР ЎТКАЗИЛДИ

Амударё телеканали таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ёшлар маънавиятини юксалтириш, китобхонликка жалб этиш, интеллектуал салоҳиятини ошириш мақсадида турли танловлар, китоблар кўргазмаси, янги асарлар тақдимотлари ўтказилиб борилмоқда. Лойиҳа режасига кўра ўтказилаётган бундай тадбирлар ёшлар маънавий дунёсини бойитиш, китоб ўқишга қизиқишларини оширишда муҳим аҳамият касб этмоқда.

Ушбу грант лойиҳаси иш режасига мувофиқ Ихтисослаштирилган таълим муассасалари агентлиги тизимидаги Амударё тумани ихтисослаштирилган мактабида ёш ижодкор Машҳура Ражабованинг яқинда нашрдан чиққан “Кўнглим” деб номланган илк шеърий тўплами тақдимотига бағишланган тадбир ташкил этилди.

12 октябрь куни бўлиб ўтган ушбу тадбирда таҳририят ходимлари, мактабнинг маънавий-маърифий ишлар бўйича директор ўринбосари Муяссар Раҳматуллаева, она тили ва адабиёт фани ўқитувчиси Моҳира Собирова, туман Ахборот кутубхона маркази ходимлари ҳамда ўқувчи-ёшлар қатнашишди.

Тадбирда мактабнинг она тили ва адабиёт фани ўқитувчиси Моҳира Собирова инсон ҳаётида китоблар ва китобхонликнинг аҳамияти, тафаккур ва дунёқарашни кенгайтиришдаги ўрни ҳақида сўзлади. Шунингдек, таҳририят ходимлари грант лойиҳаси доирасида ўтказилаётган тадбирлар, турли танловлар, уларда иштирок этиб ғолиб бўлаётган, китобхонликка қизиқиши янада ортаётган ёшлар, ёш ижодкорларни қўллаб-қувватлаш борасида амалга оширилаётган ишлар хусусида маълумотлар беришди. Иқтидорли ижодкор Машҳура Ражабова ҳамда унинг “Кўнглим” деб номланган илк шеърий тўплами билан таништириб ўтишди.

Машҳура Ражабова 2009 йилда Манғит шаҳрида таваллуд топган. У ҳозир тумандаги 82-сонли мактабнинг 9-синфида ўқийди. Машҳура бадиий адабиётга болалигидан жуда қизиқади, кўп бадиий китоблар мутолаа қилади. Унинг уйидаги китоб жавонидан ўзбек адибларининг турли жанрлардаги асарлари, атоқли шоирларнинг шеърий тўпламлари билан бирга мумтоз ва чет эл адабиётига доир китоблар ўрин олган. Бўш вақтларида шеърлар машқ қилиб турадиган ижодкор қиз тумандаги “Тараққиёт кўзгуси” газетаси таҳририятидаги тажрибали журналистларга ўз ижод намуналарини кўрсатиб, маслаҳат ва тавсияларини тинглайди. Ҳар бир ижодий иши устида қайта ва қайта ишлаб, мукаммаллаштиришга ҳаракат қилади.

Машҳуранинг “Кўнглим” деб номланган илк шеърий тўпламидан Ватан, дўстлик, табиат, меҳр-оқибат, эзгулик ҳақидаги қирққа яқин шеърлар жой олган. Ҳаваскор шоиранинг устози, Қорақалпоғистонда хизмат кўрсатган журналист Робия Йўлдошева таъриф берганидек, унинг шеърий сатрларида жигарбандлик меҳри, дўстликнинг қудрати, меҳнатнинг улуғлиги, ва инсоннинг қадр-қиммати ҳақидаги фикрлари акс этган. Ижоди билан танишиб бориш жараёнида кўнглидаги жўшқинликни, самимий туйғулар ва келажак ҳақидаги улкан орзуларини англаш, ҳис қилиш мумкин.

Ёш ижодкорнинг илк шеърий тўплами тақдимотига бағишланган тадбирда иштирок этган ўқувчи-ёшлар унинг ижодиётига катта қизиқиш билдириб, адабиёт ва шеърият ҳақидаги турли саволларига жавоблар олишди. Адабиётга қизиқувчи ўқувчилар ҳаваскор шоиранинг шу пайтга қадар ўқиган китоблари, асосан қайси жанрдаги адабиётларни кўпроқ мутолаа қилиши ва ижод намуналари ҳақида суҳбатлашишди.

Тадбир якунида Машҳура Ражабова Ихтисослаштирилган мактаб кутубхонаси ва туман Ахборот кутубхона марказига ўзи каби ёшларни ҳам шеърияти билан таништириш мақсадида “Кўнглим” деб номланган китобчасини совға қилди. Бўлиб ўтган тадбирдан катта таассуротлар олган ёшлар ва мактаб маъмурияти ҳам барчаси учун миннатдорчилик билдиришди.

Амударё телеканали таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ёш ижодкор Машҳура Ражабованинг “Кўнглим” деб номланган илк шеърий тўплами тақдимотига бағишлаб ўтказилган ушбу тадбир барчага бирдек манзур бўлди.

О.Худойберганова.