АРНАБЎЙИ МАҲАЛЛАСИДА ҲУДУД ОСОЙИШТАЛИГИНИ АСРАШДА ҲАМКОРЛИКДА ИШ ОЛИБ БОРИЛМОҚДА

Маҳаллада тинч-осойишта муҳит яратиш, аҳоли турмуш даражасини янада юксалтириш, ёшларнинг ўқишга, спортга бўлган қизиқишларини ошириш, уларни Ватанга садоқат, миллатга муҳаббат руҳида тарбиялаш, шунингдек, барча жабҳаларда етук кадрлар бўлиб етишишга даъват этиш бугунги кундаги долзарб вазифалардан бири ҳисобланади. Шунга кўра юртимизда бу борадаги ислоҳотлар ва белгилаб берилган вазифалар изчиллик билан амалга оширилмоқда.

Тумандаги www.amunews.uz веб сайтининг “Соғлом муҳит – соғлом ҳаёт” грант лойиҳаси доирасида Арнабўйи маҳалласида аҳоли, айниқса, ёшлар ўртасида жиноятчиликнинг олдини олиш, жиноят содир этишга мойил, муқаддам судланган ва жиноят содир қилган шахслар билан ишлашиш борасида йўлга қўйилган ишлар ўрганилди. Ўрганишлар давомида маҳаллада барча ишлар фуқаролар йиғини раиси Шуҳрат Султонов, ҳоким ёрдамчиси Сирож Ўрозматов, хотин-қизлар фаоли Шаҳризода Озодова, ёшлар етакчиси Шаҳзод Нураддинов ҳамда профилактика инспектори Даврон Каримовлар томонидан ҳамкорликда олиб борилаётгани, ҳудудда тинчлик-осойишталик ҳукмронлиги, ҳудуд аҳолиси бехавотир ҳаёт кечираётгани маълум бўлди.

Арнабўйи маҳалласида 4350 нафар аҳоли яшайди. Маҳалла ҳудудидаги Ўртақалъа, Қаршилихўжа, Полвонқул аҳоли пунктларида 803 та хонадонда яшайдиган ўзбек, қозоқ, қорақалпоқ, рус, татар миллатларига мансуб аҳоли тинч-тотув ҳаёт кечирмоқда. Аҳолининг аксарияти деҳқончилик билан шуғулланса, кўпчилиги давлат ташкилотларида, айримлари тадбиркорлик билан шуғулланади. Ҳудуддаги 27-, 57-, 33-сонли мактабларда таълим-тарбия ишлари яхши йўлга қўйилган бўлиб, ўқувчи-ёшларнинг бўш вақтлари мазмунли ўтишини таъминлаш мақсадида турли тўгараклар фаолияти йўлга қўйилган.

Маҳалладаги ишсиз фуқароларнинг кредит ва субсидиялар олишига, тадбиркорликни йўлга қўйиб, ўзини ўзи банд қилишига кўмаклашилаётгани, ёшлар таълим-тарбияси, уларнинг бўш пайтлари мазмунли ўтиши доим эътиборда бўлаётгани, тўй-маросимларни тартибли ўтказишда маҳалла ёши улуғлари билан бамаслаҳат ҳолда иш олиб борилаётгани ижобий самара кўрсатмоқда. Ҳудуддаги ёш йигит-қизларга ўз ҳаётларида тўғри йўлни топишларида, касб-ҳунар эгаллашларида, келин-куёвларга мустаҳкам оила қўрғонини яратишда нуроний отахон ва онахонларнинг панд-насиҳатлари, ўгит ва маслаҳатлари муҳим аҳамият касб этмоқда.

Ундан ташқари, профилактика инспектори Даврон Каримовнинг маҳаллада ҳуқуқбузарлик ва жиноятчиликнинг олдини олишда кўрсатаётган жонбозлиги, самарали чора-тадбирларни амалга ошираётгани натижасида маҳалла “Яшил” тоифадаги ҳудудлар қаторига киритилди.

Ўтган давр мобайнида маҳалла ҳудудида безорилик, босқинчилик, фирибгарлик, ўғирлик, талончилик каби жиноятлар содир этилишининг олди олинди. Тан жароҳатини етказиш ва автоавария ҳолатлари эса камайтиришга эришилди. Жорий йилнинг 9 ойи давомидаги ишлар “Обод ва хавфсиз маҳалла” тамойили асосида “маҳаллабай, хонадонбай” тарзда ташкил этилиб, оилалар ўрганилди. Ўрганишлар давомида ҳуқуқбузарлик ва жиноят содир этиш мумкин бўлган ҳамда жабрланувчига айланиб қолиш эҳтимоли юқори бўлган фуқаролар аниқланди ва маҳалла бешлиги томонидан улар билан ишлашиш бўйича тегишли чора-тадбирлар кўрилди.

Ундан ташқари, фуқаролардан келиб тушаётган оғзаки, ёзма ва электрон шаклдаги 80 дан зиёд мурожаатлар ўрганилиб, барчаси ижобий ҳал қилинди. Аҳоли муаммоларини уйма-уй юриб ўрганиш давомида аниқланган муаммоларни ҳал қилиш мақсадида тегишли идора-ташкилотларга 25 та тақдимномалар киритилган бўлса, ушбу муаммоларнинг 85 фоиздан ортиғига ижобий ечим топишга эришилди. Шунингдек, муқаддам жиноят содир қилиб, ҳозирда суд қарори билан пробация ҳисобида турган ҳолда “озодликдан чеклаш” жазосини ўтаётган ҳамда маъмурий ҳуқуқбузарлик содир қилиб, профилактик ҳисобда турган шахсларнинг ҳам яшаш шароити ва оилавий аҳволи яқиндан ўрганилиб, доимий назоратга олинди.

Шу қаторда доимий равишда маҳалла ҳудудида жойлашган 27-, 33- ҳамда 57-сонли мактабларда ҳафтанинг ҳар пайшанба куни “профилактика куни” тадбирлари ўтказилиб келинмоқда. Шунингдек, аҳолининг ҳуқуқий онги ва маданиятини юксалтириш мақсадида тарғибот-ташвиқот ишлари ҳам амалга оширилмоқда. Маҳалла ҳудудида жойлашган савдо объектлари, кўнгилочар масканлар, ошхона, кафеларда жамоат тартиби, фуқаролар хавфсизлиги, мол-мулки дахлсизлигини таъминлаш, жиноят ва ҳуқуқбузарликнинг олдини олиш мақсадида ҳар куни тунги патруллик ташкил этилиб, хизмат олиб борилмоқда.

Тумандаги www.amunews.uz веб сайтининг “Соғлом муҳит – соғлом ҳаёт” грант лойиҳаси иш режасига мувофиқ ўтказилган ўрганишлар давомида Арна бўйи маҳалласи масъуллари ўзаро меҳр-оқибат, аҳиллик ва тотувликда ҳамкорликда фаолият олиб боришаётгани, самарали натижаларга эришилаётгани маълум бўлди. Лойиҳа ижрочилари бошқа овул ва маҳаллалардаги ибратли ишларни намуна қилиб кўрсатиш, оммалаштириш мақсадида ҳамкор ташкилотлар иштирокида бошқа ҳудудларда ҳам шу каби тадбирларни ташкил этишга келишиб олишди.

О.Худойберганова.