“КИТОБЛАР КАРВОНИ” ТАДБИРИ ЎТКАЗИЛДИ

Президентимиз Шавкат Мирзиёев: “Дунёдаги ҳар қайси давлат, ҳар қайси халқ биринчи навбатда ўзининг интеллектуал салоҳияти, юксак маънавияти билан қудратлидир. Бундай енгилмас куч манбаи эса аввало инсоният тафаккурининг буюк кашфиёти – китоб ва кутубхоналарда”, дея таъкидлаган эди. Ҳақиқатан ҳам, қайси давлатнинг маънавий салоҳияти кучли бўлса, маънан енгилмас кучга эга бўлади. Шу боисдан ҳам бугунги кунда юртимизда ёшларни маънавият ва билим сарчашмаси бўлган китоб ўқишга жалб қилишга эътибор кучаймоқда.

Шуни алоҳида таъкидлаш жоизки, маълумот олиш мумкин бўлган ҳеч қандай замонавий восита китобнинг ўрнини боса олмайди.

Ёшлар китобдан кўра телефон, интернет, ижтимоий тармоқларга кўпроқ вақт ажратаётган бугунгидек тезкор даврда уларга китоб мутолаасининг афзаллигини тушунтириш, китоб ўқишга рағбатлантириш жуда муҳим вазифа.

Шу мақсадда 20 январь куни Амударё туманининг 4-сектори ҳудудидаги 5-сонли мактабда “Тараққиёт кўзгуси” газетаси таҳририяти томонидан “Китоблар карвони” тадбири ўтказилди. Тадбирда мазкур мактабнинг юқори синфлари ўқувчилари иштирок этдилар.

“Тараққиёт кўзгуси” газетаси таҳририяти амалга ошираётган “Билимли ва маънавиятли ёшлар билан – Учинчи Ренессанс сари” номли грант лойиҳаси иш режасига мувофиқ мактаб компьютер синфхонасида маънавий-маърифий ишлар бўйича директор ўринбосари Ўмирбой Боботоев билан ҳамкорликда ўтказилган “Китоблар карвони” тадбирида ўқувчилар ҳозирги давр шоир, ёзувчилари асарлари, чет эл адабиёти ва мумтоз адабиётимиз намуналари билан батафсил таништирилди.

Ҳозирги замон руҳшунослари аниқлашича, ўқувчи-ёшлар аҳолининг бўш вақти энг кўп қатлами ҳисобланар экан. Бундай даврда уларнинг бўш вақтларининг беҳуда ўтишига йўл қўймай, оилада, мактабда китоб мутолаасининг аҳамияти кенг тушунтирилса, ёши, дидига мос китоблар билан таъминланса, нур устига аъло нур бўлади. Чунки китобхонлик оиладаги, таълим муассасасидаги, ён-атрофдаги муҳитга ҳам боғлиқ. Айтиш мумкинки, ёшларни китоб мутолаасига қизиқтириш – кенг миқёсли вазифа.

Китобга эътибор – фарзанд тарбиясида муҳим роль ўйнайди. Китобни инсон тафаккурининг қанотларига ўхшатишгани бежиз эмас. Зеро тафаккури, фикр доираси кенг, маърифатли кишилар жамиятнинг чинакам бойлигидир.

Бу ҳақда “Китоблар карвони” тадбирида лойиҳа координатори Ойгул Ражабова ўқувчиларга батафсил тушунчалар берди, ўқувчиларнинг қандай бадиий асарлар ўқиётгани, ўқиган китобларидан олган таассуротлари билан қизиқди. Мавзу доирасида ўқувчиларни қизиқтирган саволларга атрофлича жавоблар берилди.

Тадбир ўқувчиларнинг китоб ўқишга қизиқишлари ошишига хизмат қилгани билан аҳамиятли бўлди.

Севара ИСМОИЛОВА.