АМУДАРЁДА ВОЛЕЙБОЛ БЎЙИЧА ТУМАН БИРИНЧИЛИГИ МУСОБАҚАЛАРИ БЎЛИБ ЎТДИ
Амударёда спортнинг волейбол тури бўйича “Ёшлар ва бизнесни қўллаб-қувватлаш йили”га бағишлаб туман биринчилиги ўтказилди.
17-18 февраль куни тумандаги Ихтисослаштирилган мактаб спорт залида катталар ўртасида бўлиб ўтган туман биринчилиги мусобақасининг очилиш маросимида туман Спорт мактабининг оммавий спортни ривожлантириш ва селекция ишлари бўйича директор ўринбосари Баҳром Соатов ҳамда Ёшлар ишлари агентлиги туман бўлими масъуллари, мактабларнинг жисмоний тарбия фани ўқитувчилари, туман Спорт мактаби мураббийлари иштирок этишди.
Очилиш маросимида сўзга чиққанлар юртимизда спортни ривожлантиришга қаратилаётган эътибор, туманимиз спорт шарафини нуфузли мусобақаларда ҳимоя қилаётган юртдошларимиз, эришилаётган ютуқларни тилга олиб ўтдилар. Шунингдек, аҳолини жисмоний тарбия ва спортга жалб қилиш, спорт турлари орқали соғломлаштириш азал-азалдан эътироф этиб келинаётгани, бу эса соғлом муҳитни яратишга хизмат қилаётганини таъкидлашди ва мусобақада иштирок этиш учун келган жамоаларга омад тилашди.
Шундан сўнг, туман биринчилиги учун қизғин беллашувлар бошлаб юборилди. Мусобақаларда эркаклар ўртасида 11 та, аёллар ўртасида эса 9 та жамоа куч синашдилар. Тумандаги овул ва маҳаллалар, корхона-ташкилотлар, умумтаълим мактаблари ходимларидан ташкил топган жамоалар ғолиблик учун ҳаракат қилдилар. Мусобақалар давомида барча жамоалар ўйин қоидаларига амал қилган ҳолда бирдамликда ғалабани қўлга киритишга интилдилар.
Шуни эътироф этиш жоизки, бугунги кунда давлатимизда спорт ўйинлари кундан кунга оммалашиб, спорт жамоаларининг шаклланиб бориш даражаси юқориламоқда. Айниқса, волейбол спорт тури аҳоли ва ўқувчи-ёшларда жамоавийлик, аҳиллик, бирдамлик, ҳамжиҳатлик, меҳр-оқибатни янада мустаҳкамлашда беқиёс аҳамият касб этмоқда. Ҳозирда мактабларда жисмоний тарбия фани дарслари ва дарсдан ташқари машғулотлар мобайнида волейбол спорт тури орқали ўқувчиларнинг жисмоний сифатларини ривожлантиришда турли хил замонавий методлардан фойдаланиб келинмоқда. Шунингдек, волейбол спорт тури ёшларда жисмоний сифатларни ривожлантириш билан бирга куч, чидамлилик, тезкорлик, чаққонлик, эгилувчанлик сифатларини ҳам оширишда ҳам ўрни катта.
Икки кун давомида қизғин ва муросасиз бўлиб ўтган волейбол мусобақаларида жамоалар ўртасидаги баҳсларни ҳакамлар синчковлик билан кузатиб, баҳолаб бордилар. Натижага кўра эркаклар ўртасида туман Ички ишлар бўлими жамоаси биринчи ўрин ғолиблигини қўлга киритди. Иккинчи ўринни эса 45-сонли мактаб жамоаси, учинчи ўринни Қангли овули жамоаси қўлга киритишга муваффақ бўлишди. Шунингдек, аёллар ўртасидаги мусобақаларда биринчи ўрин 28-сонли мактаб жамоасига насиб қилган бўлса, Оқ олтин овули жамоаси иккинчи ўрин, туман Спорт мактаби жамоаси эса учинчи ўринни эгаллашди.
18 февраль куни бўлиб ўтган ғолибларни тақдирлаш муносабати билан ўтказилган маросимда туман Спорт мактаби директори Чоршам Тажимуродов, туман Ички ишлар бўлими масъуллари, Спорт мактаби масъуллари, тренерлари қатнашишди ва ғолибларни ютуқ билан табриклашди.
Ғолиб жамоаларга туман ҳокимлиги томонидан тайёрланган диплом ва эсдалик совғалари билан топширилди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
