“Ёш чегарачилар” ҳарбий-ватанпарварлик мусобақасининг туман босқичи ўтказилди

Ўзбекистон Республикаси Вазирлар Маҳкамасининг 2023 йил 26 июндаги қарори билан тасдиқланган Низом асосида мамлакатимизнинг чегараолди шаҳар ва туманлардаги умумий ўрта таълим мактабларида “Ёш чегарачилар” клублари ташкил қилинган эди. Низомга асосан Ўзбекистон Республикаси Давлат хавфсизлик хизмати Чегара қўшинларининг ҳарбий қисмларига бириктирилган мазкур клубларга мактабларнинг 9-, 10- ва 11-синф ўқувчилари ўз хоҳишига кўра аъзо бўлишлари мумкин.

Шунингдек, юқоридаги қарор билан “Ёш чегарачилар” ҳарбий-ватанпарварлик мусобақасини ўтказиш тартиби тўғрисида”ги Низом ҳам тасдиқланган бўлиб, ушбу ҳужжатга кўра ҳар йили мазкур танловда чегараолди шаҳар ва туманлардаги умумий ўрта таълим мактабларидаги энг фаол клублар аниқланади ва тақдирланади.

Бу йилги “Ёш чегарачилар” ҳарбий-ватанпарварлик мусобақасининг Амударё туман босқичида туманнинг чегараолди ҳудудларидаги 12 та мактабларда ташкил қилинган клублар жамоалари ўзаро куч синашдилар.

Мусобақа аввалида ташкилий қўмита аъзолари ва Давлат хавфсизлик хизмати чегара қўшинларининг Манғит шаҳрида жойлашган ҳарбий қисми масъуллари иштирокчиларни мусобақа шартлари билан таништирдилар.

Тумандаги 1-, 4-, 15-, 20-, 25-, 35-, 36-, 48-, 59-, 69-, 70- ва 83-сонли мактаблар жамоаларининг ҳар бири ғолибликка муносиб эканини амалда намоён этиш учун мусобақага киришдилар.

Дастлаб хар бир жамоанинг саф тайёргарлиги, ҳарбий варақалар, альбом, вимпел, жамоанинг рамзий байроғи ва номи ёзилган тахтача, жамоаларнинг махсус формаси кўрикдан ўтказилди ва баҳоланди.

Сўнгра умумтаълим фанлари бўйича тест синови ўтказилиб, Калашников автоматини нотўлиқ қисмларга ажратиш ва йиғиш бўйича жамоа аъзоларининг чаққонликлари синовдан ўтказилди. Кейин эса ўғил болалар 1000 метрга, қизлар 100 метрга югуриш, жамоа аъзолари турникда тортилиш, азимут бўйича ҳаракатланиш, граната улоқтириш бўйича маҳоратларини намойиш қилишди. Иштирокчилар айниқса, заҳарланган ҳудуддан, тўсиқлар йўлагидан ўтиш, тиббий ёрдам кўрсатиш мусобақаларини ўзгача ҳаяжон билан намойиш қилдилар. Мусобақа сўнгида эса жамоа аъзоларининг ўқ-дориларни ташиш, Калашников автоматидан ўқ отиш ва мазкур автоматнинг макети бўйича билим ва кўникмалари, маҳорати синовдан ўтказилди.

Ҳакамлар ҳайъатининг якуний қарорига кўра 59-сонли мактаб жамоаси 3-, 83-сонли мактаб жамоаси эса 2-ўринни эгаллади. 48-сонли мактабда ташкил қилинган  “Ёш чегарачилар” клубининг аъзоларидан иборат жамоа 1-ўринни эгаллади ва мусобақанинг Қорақалпоғистон Республикаси босқичига йўлланмани қўлга киритди.

Ёшларни ватанпарварлик руҳида тарбиялаш, давлат манфаатлари ва суверенитетини фидокорона ҳимоя қилишга тайёрлаш, жисмонан соғлом ва маънан етук ёш авлодни камол топтириш, улар ўртасида соғлом турмуш тарзини тарғиб қилиш, ўз юрти ва халқининг тақдири учун юксак масъулият ва жавобгарлик ҳиссини шакллантириш мақсадида ташкил қилинган мазкур мусобақанинг тантанали ёпилиш маросимида 1-, 2- ва 3-ўринни эгаллаган жамоалар ташкилий қўмита томонидан диплом, кубок ва совғалар билан мукофотланади. “Энг илғор” номинацияси ғолиблари эса ташкилий қўмита томонидан алоҳида совғалар билан тақдирланди.

Ғ.Ешниёзов