Жумуровул маҳалласида сунъий қопламали мини футбол майдони қурилиб, фойдаланишга топширилди

Сўнгги йилларда юртимизда “Ташаббусли бюджет” доирасида фуқаролар томонидан билдирилган ижтимоий таклифлардан овоз бериш йўли орқали энг муносибларини аниқлаш ва молиялаштириш тизими йўлга қўйилгани бугун ўзининг ижобий самарасини бермоқда. “Ташаббусли бюджет”нинг 2023 йилги мавсумида Амударё туманидаги Жумуровул маҳалласи ҳам ижтимоий аҳамиятга эга лойиҳа билан иштирок этиб, ғолиб бўлган эди.

Мазкур лойиҳа бўйича маҳалладаги 48-сонли мактаб ҳудудига мини футбол майдони қурилди ва жорий йилнинг 3 июнь куни бюджет маблағлари асосида қурилган ушбу ўйингоҳнинг очилиш маросими бўлиб ўтди.

Бу сана жумуровуллик аҳоли, айниқса ёшлар ҳаётида қувончли кун бўлди. Чунки олдинлари маҳаллада замонавий футбол ёки мини футбол майдони мавжуд эмас эди. Эндиликда мактаб ўқувчилари ва спортчи ёшлар машғулотлар билан замонавий майдонда шуғилланадиган бўлишди. Айниқса, мини футбол майдони ёнида стрит воркаут спорт майдончасининг ҳам қуриб фойдаланишга топширилиши аҳоли ва ёшлар орасида жисмоний тарбия ва оммавий спортни янада ривожлантиришга қўшимча имконият яратади. Бу каби шароитлар аҳоли, айниқса ёшлар ўртасида соғлом турмуш тарзини кенг татбиқ этишда муҳим восита саналади.

Майдоннинг очилиш маросимида Амударё тумани ҳокими Собир Хўжаметов, 3-сектор раҳбари – туман Ички ишлар бўлими бошлиғи Жамолиддин Юсупов, Ўзбекистон Маҳаллалари уюшмаси Амударё туман бўлими бошлиғи Алишер Юлдашев, туман Мактабгача ва мактаб таълими бўлими бошлиғи Ялғашбой Шомуротов, 48-сонли мактаб директори Ўктам Қўшназаров, туман Ички ишлар бўлими бошлиғининг ўринбосари Шарапат Жолдасбаев, “Амударё махсус қурилиш” масъуляти чекланган жамияти директори Жаҳонгир Алламберганов , Жумуровул маҳалла фуқаролар йиғини раиси Дилмурод Бўронов ҳамда маҳалланинг нуронийлари ва ёшлар иштирок этди.

Тадбирни туман ҳокими Собир Хўжаметов табрик сўзи билан очиб, маҳалла аҳли ва ёшларни замоавий спорт майдончаси қуриб фойдаланишга топширилгани билан табриклади ҳамда келгусида маҳалладан чемпион спортчилар етишиб чиқишига тилакдош бўлди.

Тадбирда сўзга чиққанлар мамлакатимизда аҳоли турмуш тарзини яхшлаш ва маҳаллалар фаровонлиги йўлида амалга оширилаётган ислоҳотлар ҳақида айтиб ўтди. Ташаббусли бюджетлаштириш жараёнлари фуқароларнинг ижтимоий муаммоларини ижобий ҳал этиш имкониятларини тақдим этувчи муҳим омил экани, мазкур тизим бюджет маблағларининг сарфланишида фуқароларнинг бевосита истирок этиши, шунингдек, бюджет маблағларининг самарали сарфланишини кузатиб бориш имкониятини яратаётгани алоҳида қайд этилди.

Тадбирда мактабнинг “Ёш қутқарувчилар” ва “Ёш чегарачилар” мусобақаларининг туман босқичида 1-ўринни эгаллаган ўқувчиларнинг ҳарбий чиқишлари ҳамда маҳалла ҳудудида жойлашган 46-сонли мактабгача таълим ташкилоти тарбияланувчиларининг гуруҳ рақс чиқишлари намойиш қилинди. Шу куни янги майдонда 48-сонли мактаб ўқувчиларидан таркиб топган жамоалар иштирокида ўртоқлик учрашуви бўлиб ўтди. Ўйин ёш спортчиларнинг ғолиблик учун муросасиз баҳсларига бой бўлди.

Маълумот ўрнида айтиш жоизки, “Ташаббусли бюджет”нинг 2023 йилги мавсумида Жумуровул маҳалласи аҳли мазкур мини футбол майдончасидан ташқари Шижоатли кўчаси учун 1 минг 300 метр асфальт қопламали йўл қурилишига доир лойиҳаси билан ҳам қатнашиб, ғолиб бўлган эди. Натижада ушбу лойиҳалар 2 миллиард 720 миллион сўм қийматида давлат ҳисобидан молиялаштирилди. Мазкур мини футбол майдони “Амудрё махсус қурилиш” масъулияти чекланган жамияти томонидан қисқа фурсатларда, сифатли қилиб қурилди. Мазкур майдон турли мавсумларда спортчиларга қулайлик яратиш учун ён ва устки қисми махсус қопламалар ёрдамида ёпилгани билан бошқа футбол майдончаларидан ажралиб туради.

Бу каби шароитлар қачонлардир маҳалла аҳли ва ёшлари учун орзу эди, десак муболаға бўлмас. Эндиликда ёш спортчилар мавжуд имкониятлардан унумли фойдаланган ҳолда ўтказилаётган мусобақаларда фаол иштирок этиб, туманимиз номидан улкан ютуқларга эришишига тилакдошмиз. Биз ҳам фурсатдан фойдаланиб жумуровулликларни замонавий мини футбол майдони ишга тушгани билан табриклаймиз.

Шоҳзод Қурбонбоев