“Yangi Oʻzbekiston maktab ostonasidan boshlanadi” shiori ostida uchinchi “Ustozlar milliy forumi” oʻtkazildi

Mamlakatimiz innovatsion taraqqiyot yoʻlida shiddat bilan rivojlanib borayotgan bir davrda kelajagimiz davomchilari boʻlgan yoshlarning ijodiy gʻoyalari va ijodkorligini har tomonlama qoʻllab-quvvatlash, ularning bilim, koʻnikma va malakalarini davlat taʼlim standartlari asosida shakllantirish hamda ilgʻor xorijiy tajribalar, xalqaro mezon va talablar asosida baholash tizimini takomillashtirish muhim ahamiyatga ega. Shu maqsadda yurtimizda taʼlim sifatini oshirish va tizimda innovatsion yondashuvlarni joriy qilish boʻyicha qator ishlar amalga oshirib kelinmoqda.

Pedagoglarning kasbiy rivojlanishlari uchun yetarli shart-sharoitlarni yaratish, tizimda ishlayotgan oʻqituvchilarni muntazam tarzda yangiliklardan xabardor qilish, ilgʻor metodikalar bilan tanishtirish va tajriba almashish maqsadida har yili avgust oyida oʻtkaziladigan “Ustozlar milliy forumi” ham shunday tadbirlardan biridir.

Tadbirda tuman Maktabgacha va maktab taʼlimi boʻlimi boshligʻi Yalgʻash Shomuratov, Maktablar faoliyatini muvofiqlashtirish shoʻʼbasi rahbari Ibragim Radjapov, mazkur shoʻʼba metodistlari Habibulla Davletyarov, Rayxon Yakubova, trener oʻqituvchilar hamda umumiy oʻrta taʼlim maktablardan barcha fanlardan bir nafardan fan oʻqituvchilari ishtirok etishdi.

Mazkur forum tizimda olib borilayotgan islohotlar, taʼlim mazmunini takomillashtirish borasida amalga oshirilayotgan ishlar bilan tanishtirish, oʻquv rejalar, oʻquv dasturlar, darsliklar, yangi baholash tizimi, shuningdek, oʻquv jarayoniga tatbiq etiladigan ilgʻor metodikalarning mazmun-mohiyatini soha xodimlariga yetkazish koʻzlangani bilan ahamiyatli hisoblanadi.

Bu yilgi forum “Yangi Oʻzbekiston maktab ostonasidan boshlanadi” shiori ostida tashkil etildi.

Amudaryo tumani Maktabgacha va maktab taʼlimi boʻlimi boshligʻi Yalgʻash Shamuratov oʻz soʻzida forum ishtirokchilarini yaqinlashib kelayotgan mustaqilligimizning 33 yilligi hamda yangi oʻquv yili bilan muborakbod etdi va mamlakatimizda “Yangi Oʻzbekiston maktab ostonasidan boshlanadi” degan ezgu gʻoya asosida taʼlim-tarbiya tizimini tubdan takomillashtirish, ertangi kunimizning munosib davomchilarini kamolga yetkazishning mustahkam tashkiliy-huquqiy mexanizmini yaratish borasida amalga oshirilayotgan keng koʻlamli islohotlarning mazmun-mohiyati haqida fikr-mulohazalarini bildirdi.

Taʼkidlanganidek, sohani yanada rivojlantirish maqsadida qabul qilingan qator davlat dasturlari, qonun hujjatlari asosida yangi taʼlim muassasalari qurilmoqda va eng zamonaviy oʻquv anjomlari bilan taʼminlanmoqda. Taʼlim-tarbiya sifati va samaradorligi maktablar moddiy-texnik bazasi bilan birga oʻqituvchi va murabbiylarimizning bilimi, malaka va tajribasiga, oʻz kasbiga boʻlgan muhabbatiga ham bogʻliqdir. Shu bois keyingi yillarda oʻqituvchilarning jamiyatdagi oʻrni va nufuzini oshirish, ularni davlat tomonidan qoʻllab-quvvatlash va ijtimoiy muhofaza qilishga juda katta eʼtibor qaratilmoqda.

Forum davomida boʻlimning Maktablar faoliyatini muvofiqlashtirish shoʻʼbasi rahbari Ibragim Radjapov soʻzga chiqib, oʻtgan oʻquv yili natijalari sarhisobiga toʻxtalib oʻtdi va yangi oʻquv yili uchun belgilangan ustuvor vazifalar haqida gapirdi.

Joriy yilda Oʻzbekiston Respublikasining “Pedagogning maqomi toʻgʻrisida”gi qonuni qabul qilinishi bilan ustozlarning huquqlari, shaʼni, qadr-qimmati va ishchanlik obroʻsi davlat himoyasida ekanligi huquqiy jihatdan mustahkamlab qoʻyildi. Oʻqituvchining mehnati, bilimiga yarasha moddiy ragʻbatlantirib borish eng ustuvor vazifa sifatida belgilandi. Bundan yuzlab oʻqituvchilarimiz samarali foydalanib, moddiy manfaatdorligi oshmoqda.

Maʼruzalar yakunlanganidan soʻng trener oʻqituvchilar tomonidan barcha fan oʻqituvchilariga shoʻʼbalar kesimida treninglar tashkil qilindi. Treninglarda oʻqituvchilar mezonlarga asoslangan baholash tizimi, zamonaviy darsliklarning yangi yondashuvlari haqida maʼlumotga ega boʻlishlari bilan bir qatorda amaliy mashgʻulotlarda faol ishtirok etishdi.

Zamon shiddat bilan rivojlanayotgan bir davda har bir oʻqituvchi-pedagogdan oʻz ilm-maʼrifati bilan hamisha jamiyatning oldingi oʻrinlarida boʻlish, tinimsiz shaxsiy rivojlanish talab qilinadi. Zero, maktabni oʻzgartirmasdan turib jamiyatni oʻzgartirib boʻlmaydi. Taʼlim va tarbiyaning asosi, poydevori bu – bogʻcha va maktabdir. Bu binolarni muqaddas dargoh qiladigan kuch, shubhasiz, oʻqituvchi-pedagoglar hisoblanadi. Shunday ekan, ustoz va murabbiylarimizga yangi oʻquv yilida kuch-quvvat, omad va muvaffaqiyatlar yor boʻlishini, oliy orzularining roʻyobga chiqishini tilab qolamiz!

Rayhon Yakubova, tuman Maktabgacha va maktab taʼlimi boʻlimining Maktablar faoliyatini muvofiqlashtirish shoʻʼbasi metodisti