Paxta yigʻim-terimi mavsumini uyushqoqlik bilan oʻtkazishga bagʻishlangan seminar boʻlib oʻtdi

Amudaryo tumani Tosh yop ovulidagi “Bekmon Allaberganov” fermer xoʻjaligi dalasida joriy yilgi paxta yigʻim-terim mavsumini uyushqoqlik bilan oʻtkazish maisadida qishloq xoʻjaligi xodimlari ishtirokida seminar boʻlib oʻtdi.

Seminarda tuman hokimi Sobir Xoʻjametov, hokim oʻrinbosarlari, qishloq xoʻjaligi sohasi masʼullari hamda fermerlar ishtirok etdilar. Seminarda paxta yigʻim-terimi mavsumida amalga oshirilishi lozim boʻlgan ishlar xususida soʻz yuritildi. Jumladan, paxtani nest-nobud qilmasdan oʻz vaqtida yigʻib-terib olish, terim mavsumidagi barcha ishlarni toʻgʻri tashkil etish yuzasidan tegishli masʼullarga topshiriqlar berildi. Shuningdek, paxta yigʻim-terimi mavsumini uyushqoqlik bilan oʻtkazish yuksak paxta xirmoni bunyod qilishda alohida ahamiyatga ega ekani taʼkidlandi.

Bugungi kunda tumanimizdagi barcha fermer xoʻjaliklarining paxta dalalarida gʻoʻzalar qiygʻos ochilib, dalalar oppoq tusga kirgan. Paxta yetishtiruvchi fermer xoʻjaliklari tomonidan gʻoʻzani parvarishlash ishlarining oʻz vaqtida va sifatli olib borilgani, paxta yetishtirishga masʼul shaxslarning fidoyi mehnatlari natijasida dalalarda moʻl hosil yetishtirildi. Sentyabr oyining boshlaridanoq barcha fermer xoʻjaliklarida yetishtirilgan hosilni yigʻib-terib olish ishlari boshlab yuboriladi. Mavsum boshlanishidan avval terim uchun barcha sharoitlar yaratilib, zarur resurslar taxt qilib qoʻyildi.

Aytish joizki, paxta yigʻim-terimini gʻoʻzaning pishish holatidan kelib chiqib, yaʼni paxtaning kamida 70-75 foizi ochilganidan keyin terish maqsadga muvofiq. Hududlarda paxta yigʻim-terimiga ommaviy kirishish kechi bilan 10-sentyabrdan boshlandi va 10-oktyabrgacha birinchi terim toʻliq yakunlanib, ikkinchi terimga oʻtiladi.

Paxta terimi mavsumida koʻngilli, 18 yoshdan katta, muayyan mehnat bilan band boʻlmagan ishga layoqatli vaqtincha ishsiz, ayrim hollarda mehnat resurslari yetmagan hududga boshqa hududlardan kelib haq evaziga terimda ishtirok etish istagini bildirgan terimchilar maxsus terim otryadlariga biriktiriladi.

Maʼlumot oʻrnida, tumanda paxta yigʻim-terimi mavsumiga puxta tayyorgarlik koʻrish va uni optimal muddatlarda amalga oshirish maqsadida 310ta terim otryadlari tashkil qilingan. Terim otryadlariga 100-150 nafardan iborat tashabbuskor guruhlar hamda mahallalarda tajribali koʻcha faollaridan iborat otryad rahbarlari tayinlangan. Otryadlarga jami 17 ming 490 nafar terimchilar jalb qilingan.

Bu kabi yuksak tashkiliy ishlardan koʻzlangan asosiy maqsad – tumandagi 352ta fermer xoʻjaliklarining 13 ming 900 gektar maydonida pishib yetilgan hosildan jami 48 ming 500 tonnalik xirmon bunyod qilish va shartnomalarga muvofiq xom ashyoni 6ta klasterlarga oʻz vaqtida hamda sifatli tarzda yetkazib berishdir.

Seminarda paxta yigʻim-terimi mavsumida fermer xoʻjaliklari tomonidan terimchilarni zarur mehnat va dam olish sharoitlari bilan taʼminlash, ularga mehnat haqini oʻz vaqtida va toʻliq toʻlash, paxta-toʻqimachilik klasterlari tomonidan yigʻim-terimga jalb qilingan shaxslarni oziq-ovqat mahsulotlari bilan taʼminlash, ularga qulayliklar yaratish maqsadida koʻchma savdo doʻkonlari faoliyatini yoʻlga qoʻyish, tibbiy, madaniy hamda maishiy xizmatlar koʻrsatish xususida soʻz yuritilib, hosilni nest-nobud qilmasdan terib olish boʻyicha tushuntirish-targʻibot ishlari olib borildi.

Charos Arslonova, tuman hokimligining Axborot xizmati rahbari.