3-dekabr – Xalqaro nogironlar kuniga bagʻishlangan tadbir boʻlib oʻtdi

Maʼlumki, Birlashgan millatlar tashkiloti Bosh Assambleyasining 1992-yil 14-oktabrdagi rezolyutsiyasiga muvofiq, har yili 3-dekabr sanasi butun dunyoda Xalqaro nogironlar kuni sifatida nishonlanib kelmoqda. Dunyo mamlakatlari qatori yurtimizda ham ushbu sana keng nishonlanadi.

Sana munosabati bilan Amudaryo tumani hokimligi tomonidan katta bayram tadbiri tashkil etildi. Tumanimizdagi “Oltin saroy” tantanalar saroyida nogironligi boʻlgan hamyurtlarimiz uchun bayram dasturxoni yozildi. Tadbirda tuman hokimining birinchi oʻrinbosari – iqtisodiy taraqqiyot va kambagʻallikni qisqartirish boʻlimi boshligʻi Fahriddin Yusupov soʻzga chiqib, bugungi kunda muhtaram Prezidentimiz tomonidan keksalar va nogironligi boʻlgan shaxslarni ijtimoiy himoya qilish hamda qoʻllab-quvvatlash masalasiga alohida eʼtibor qaratilayotgani, bu borada amalga oshirilayotgan chora-tadbirlar natijasida ushbu toifa vakillari turmush tarzining tobora yaxshilanayotgani xususida soʻz yuritdi hamda barchani bayram bilan tabrikladi.

Tuman “Inson” ijtimoiy xizmatlar markazi boshligʻi Gʻulomjon Duysenboyev oʻz nutqida inson huquqlari, jumladan, nogironligi boʻlgan shaxslar huquqlarining kafolatlarini mustahkamlash, nogironligi boʻlgan shaxslarning jamiyat hayotining barcha sohalarida ishtirok etishlari uchun zarur shart-sharoitlar yaratish masalasiga katta eʼtibor qaratilayotganini taʼkidlab, Oʻzbekiston Respublikasi Prezidentining “Nogironligi boʻlgan shaxslarni qoʻllab-quvvatlash tizimini takomillashtirishga doir qoʻshimcha chora-tadbirlar toʻgʻrisida”gi qarori bu borada muhim dasturulamal boʻlayotganini qayd etdi.

Shundan soʻng bayram dasturxoniga taklif etilgan barcha nogironligi boʻlgan hamyurtlarimiz uchun tuman hokimligi tomonidan tayyorlangan bayram sovgʻalari topshirildi. Tadbir tuman Madaniyat boʻlimi xonandalari ijrosidagi betakror kuy-qoʻshiqlar bilan davom etdi.

Taʼkidlash joizki, mamlakatimizdagi oliy taʼlim muassasalarida nogironligi boʻlgan shaxslar uchun alohida kvotalar belgilanganligi ham davlat tomonidan ularga berilayotgan keng imkoniyatlar belgisi sanaladi. Ushbu imkoniyatlardan samarali foydalangan holda tumanimizdan 5 nafar nogironligi boʻlgan yoshlarimiz oliy taʼlim muassasalari talabasi boʻlishdi. Bu kabi xayrli ishlarning amalga oshirilishida katta maʼno bor. Chunki davlatimiz siyosatida ham, muqaddas islom dinimiz taʼlimotlarida ham inson eng aziz va mukarram sanalgan. Mehr-muruvvatli va bagʻrikeng xalqimiz ham azal-azaldan yordamga muhtoj, imkoniyati cheklangan insonlarga eʼtibor va gʻamxoʻrlik koʻrsatishni jamiyatda tinchlik, doʻstlik va hamjihatlikni mustahkamlashga xizmat qiladigan eng muhim qadriyatlardan biri sifatida eʼzozlab keladi.

Ana shunday ezgu anʼanalarimizni bugungi zamon talablari asosida rivojlantirish maqsadida soʻnggi yillarda mamlakatimizda imkoniyati cheklangan fuqarolarimizni qoʻllab-quvvatlash, ular uchun zarur barcha sharoitlarni yaratish borasidagi davlat siyosati yangi bosqichga koʻtarilmoqda.

Bayram tadbiri shoʻx-shodon kuy-qoʻshiqlar bilan yuqori kayfiyatda ajoyib taassurotlarga boy tarzda oʻtdi.

Charos Arslonova, tuman hokimligining Axborot xizmati rahbari.