40-sonli maktab oʻquvchisi Ogʻabek Ozodov Xitoyda oʻtkazilgan nufuzli xalqaro olimpiadada oltin medal sohibi boʻldi

Matematika kabi murakkab va aniq fanlarda yuqori natijalarga erishish uchun faqatgina tugʻma iqtidor yoki nazariy bilimlarning oʻzi yetarli emas, balki tinimsiz izlanish, mukammal hisob-kitob hamda uzoq muddatli, puxta tayyorgarlik talab etiladi. Bugungi kunda yurtimiz yoshlari nafaqat sportda, balki ilm-fan, xususan, aniq fanlar sohasida ham jahon arenalarida oʻzlarining yuksak intellektual salohiyatini namoyish etib kelishmoqda. Buning yorqin ifodasini yaqinda Xitoy Xalq Respublikasida boʻlib oʻtgan nufuzli xalqaro olimpiada misolida ham koʻrishimiz mumkin.

Xitoyning Xanchjou ilmiy-tadqiqot institutiga qarashli Sidyan universitetida matematika fani boʻyicha boʻlib oʻtgan GATE olimpiadasi imtihonida Oʻzbekiston sharafini 40 nafarga yaqin yosh, iqtidorli matematiklar munosib tarzda himoya qildilar. Eng quvonarlisi shundaki, maktab oʻquvchilaridan iborat terma jamoamiz aʼzolarining ayrimlari murakkab shartlarni bexato bajarib, 100 foizlik natija qayd etishga muvaffaq boʻlishdi va yurtimiz bayrogʻini baland koʻtarishdi.

Dunyoning turli qitʼalaridan, koʻplab mamlakatlardan kelgan minglab yoshlar oʻzlarining bilim, salohiyat va intellektual qobiliyatlarini sinovdan oʻtkazgan ushbu nufuzli xalqaro bellashuvda ishtirokchilar ingliz tili hamda matematika fanlari boʻyicha bellashdilar. Faxr bilan taʼkidlash kerakki, mana shunday kuchli bilimdonlar orasida tumanimizdagi 40-sonli umumtaʼlim maktabi oʻquvchisi Ogʻabek Ozodov ham bor. U olimpiadaning oltin medaliga sazovor boʻldi. Umumiy hisobda, 40 nafar turli yoshdagi maktab oʻquvchilaridan tashkil topgan Oʻzbekiston delegatsiyasi mazkur musobaqada jami 5 ta oltin, 6 ta kumush va 7 ta bronza medalini qoʻlga kiritishga erishdi. Bayram arafasida gʻolib va sovrindorlar Toshkent xalqaro aeroportida keng jamoatchilik, ota-onalar va ustozlar ishtirokida katta tantana bilan, munosib kutib olindi.

Bir hafta davom etgan mazkur musobaqa ishtirokchilar uchun nafaqat oʻz bilimlarini sinovdan oʻtkazish va baholash maydoni, balki xorijlik tengdoshlari bilan yaqindan muloqot qilish, oʻzaro tajriba almashish va yangi bilimlarni oʻzlashtirish uchun gʻoyat muhim platforma vazifasini oʻtab berdi. Mutaxassislarning eʼtirof etishicha, jahon arenalarida, xususan, Xitoyda boʻlib oʻtadigan olimpiadalarda gʻolib boʻlish hech qachon oson kechmaydi. Sababi, Xitoy davlati dunyoda matematika fani boʻyicha eng ilgʻor oʻrinlardan birini egallaydi va ularning topshiriqlari oʻta murakkabligi bilan ajralib turadi. Ana shunday eng qiyin va murakkab hisoblangan olimpiadada 100 foizlik natija koʻrsatib, mutlaq chempion boʻlib qaytgan oʻquvchilarimizning yutugʻi tarixiy ahamiyatga egadir.