Huquqni muhofaza qiluvchi idoralarning Muvofiqlashtiruvchi Kengashi yigʻilishi boʻlib oʻtdi
Bugungi shiddatli zamon, dunyoda sodir boʻlayotgan turli vaziyatlar bizga tinchlikning, xotirjamlik tuygʻusining naqadar bebaho ekanini anglatmoqda. Jamiyatdagi ana shu tinchlik va osoyishtalikni saqlashda huquqni muhofaza qiluvchi organlarning hissasi katta. Ularning sergakligi, tinimsiz saʼy-harakatlari natijasida qanchadan-qancha koʻngilsizliklarning oldi olinadi. Bilib-bilmay jinoyat koʻchasiga kirib qolganlar oʻz jazosini oladi, ularning aksariyati esa toʻgʻri yoʻlga qaytadi.
Amudaryo tumanida faoliyat yuritayotgan huquqni muhofaza qiluvchi idoralarning Muvofiqlashtiruvchi Kengashi yigʻilishida ham hududda qonuniylikni mustahkamlash, fuqarolarning huquq va erkinliklarini muhofaza qilish, jinoyatchilik va huquqbuzarliklarning oldini olish borasida 2024-yilda amalga oshirilgan ishlar va joriy yil uchun moʻljallangan ustuvor vazifalar muhokama qilindi.
Yigʻilishda tuman hokimi Sobir Xoʻjametov, huquqni muhofaza qiluvchi organlari masʼullari va fuqarolar yigʻinlari raislari ishtirok etdi. Yigʻilish davomida 2024-yilda jinoyatchilikka qarshi kurashish, huquqbuzarliklarning oldini olish va jamoat xavfsizligini taʼminlash, ijtimoiy-iqtisodiy sohalardagi muammolar va yoʻl qoʻyilgan kamchiliklar tanqidiy tahlil qilindi.
Tuman Prokurori – Muvofiqlashtiruvchi Kengashi raisi Bahrom Masharipov oʻz maʼruzasida 2024-yilda qonunlar ijrosi yuzasidan oʻtkazilgan 100dan ortiq nazorat tadbirlarida 1 ming 969ta qonun buzilish holatlari aniqlanib, 439ta prokuror nazorati hujjatlari qoʻllanilganini, kelib tushgan jami 923ta murojaatlarning 700dan ortigʻi bevosita prokuraturada koʻrilganligi, oʻtkazilgan sayyor qabullarda 481dan ortiq jismoniy shaxslar va yuridik shaxslar vakillarining muammolari tinglanganligini hamda aholining huquqiy madaniyatini oshirish maqsadida 400dan ortiq targʻibot tadbirlari oʻtkazilganligini maʼlum qildi.
Prokuratura organlari tomonidan aniqlangan qonunbuzilish holatlarining kelib chiqishiga, asosan idora va tashkilotlar rahbarlari, masʼul shaxslarining oʻz xizmat vazifalarini lozim darajada bilmasligi, kasbiga sadoqat ruhi shakllanmagani, ishlar toʻgʻri tashkil etilmagani, sohadagi tizimli xato va kamchiliklarni, mavjud muammolarni oʻz vaqtida bartaraf etish borasida shaxsiy tashabbus yoʻqligi sabab qilib koʻrsatildi. Bundan tashqari, xizmat vazifasiga yuzaki va masʼuliyatsizlik bilan qarab, qonunbuzilish holatlariga yoʻl qoʻygan xodimlarga nisbatan qatʼiy choralar koʻrilishi lozimligi taʼkidlandi.
Shundan soʻng, yoʻl qoʻyilgan kamchiliklar boʻyicha masʼullarning tushuntirishlari va hisobotlari tinglandi.
Yigʻilish soʻngida Kengash Qarori bilan, hududda kriminogen vaziyat barqarorligini taʼminlashda huquqni muhofaza qiluvchi organlar hamda hokimlik, idora va tashkilotlarning hamkorligini yanada kuchaytirish boʻyicha chora-tadbirlar belgilanib, ijrosi nazoratga olindi.
Shuningdek, yigʻilishda Oʻzbekiston Respublikasi Prezidentining 2025-yil 3-yanvardagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Qarori mazmun-mohiyati yuzasidan ham keng tushuntirishlar berildi. “Mahalla yettiliklari”ga mazkur Qaror talablaridan kelib chiqib, joylarda amalga oshirilishi lozim boʻlgan ishlar yuzasidan koʻrsatma va topshiriqlar berildi.
Amudaryo tuman Prokuraturasi
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
