Tumanimizda yana bir xususiy tibbiy klinika ish boshladi

Tibbiyot inson salomatligini asrashdek ezgu maqsadlarga xizmat qiladi. Shu bois mazkur sohani rivojlantirish, zamonaviy texnologiyalar bilan jihozlangan tibbiy muassasalar tashkil etish nafaqat aholiga qulaylik yaratadi, balki xalqimizning umumiy salomatlik darajasini oshirishda ham muhim rol oʻynaydi.

Amudaryo tumanining Chordara mahallasida yangidan ish boshlagan “Faxriddin klinikasi” nomli xususiy tibbiyot muassasasi maʼmuriyati ham aholiga yuqori sifatli va zamonaviy tibbiy xizmatlarni taqdim etishni bosh maqsad qilib qoʻygan. Klinikada malakali mutaxassislar jamoasi tomonidan zamonaviy texnologiyalar orqali aholiga maqbul narxlarda namunali tibbiy xizmatlarni koʻrsatish yoʻlga qoʻyilgan.

25-yanvar kuni mazkur muassasaning ochilish marosimi oʻtkazildi. Tadbirda tuman hokimi oʻrinbosarlari Faxriddin Yusupov, Nodirbek Kamolov, “Nuroniy” jamgʻarmasi tuman boʻlimi raisi Bekman Allaberganov, tibbiyot sohasi mutasaddilari, mahalla faollari va aholi vakillari ishtirok etdilar.

Tantanali tadbirda tuman hokimi oʻrinbosari Nodirbek Kamolov soʻzga chiqib, mazkur muassasaning faoliyati tumanimiz tibbiyoti rivoji yoʻlida muhim ahamiyatga ega ekanligini, klinika nafaqat zamonaviy tibbiy texnologiyalar, balki malakali mutaxassislar orqali aholi salomatligini yaxshilashga xizmat qilishini taʼkidladi. Shuningdek, klinika rahbari Faxriddin Ibodullayevning tibbiyot sohasidagi koʻp yillik tajribasini eʼtirof etib, kelgusi faoliyatida muvaffaqiyatlarga tilakdoshlik bildirdi.

Shuningdek, “Nuroniy” jamgʻarmasi tuman boʻlimi raisi Bekman Allaberganov oʻz soʻzida yangi klinikaning, aholi, ayniqsa keksalar uchun ahamiyatini eʼtirof etib, yaratilgan qulay sharoitlar va zamonaviy tibbiy texnologiyalar keksalarning sogʻligini tiklash va hayot sifatini, davomiyligini oshirishga yordam berishini alohida taʼkidladi.

Klinika muassisi Faxriddin Ibodullayev tashrif buyurgan mehmonlarga samimiy minnatdorchilik bildirib, mamlakatimizda tibbiyot sohasida amalga oshirilayotgan islohotlar va tadbirkorlarga yaratilayotgan qulay shart-sharoitlar xususiy tibbiy muassasalarning rivojida muhim omil boʻlayotganini taʼkidladi. Qayd etilganidek, mazkur muassasaning bosh maqsadi aholiga zamonaviy va sifatli tibbiy xizmat koʻrsatish orqali ularning sogʻlom hayotga qaytishlariga yordam berishdan iborat.

“Faxriddin klinikasi”da yurak-qon tomir kasalliklarini diagnostika qilish va davolashga ixtisoslashgan kardiologiya, asab tizimi muammolarini aniqlash va bartaraf etishga ixtisoslashgan nevrologiya, endokrin tizimi kasalliklari davolanuvchi endokrinologiya, shuningdek, davolash va reabilitatsiya jarayonlarida zamonaviy usullarni qoʻllaniladigan fizioterapiya kabi boʻlimlar mavjud.

Klinikada statsionar tartibda davolanish imkoniyati yaratilgan boʻlib, bir vaqtning oʻzida 35 nafar bemorni qabul qilish quvvatiga ega. Shuningdek, kunduzgi statsionar va ambulator xizmatlar ham mavjud.

Tibbiyot muassasasi ilgʻor tibbiy texnologiyalar bilan jihozlangan boʻlib, ultratovush tashxisi, elektrokardiograf uskunalari, bir qator fizioterapiya uskunalari, bel churralarini davolash uchun maxsus moslamalar hamda reabilitatsiya jarayonlari uchun nebulayzer va boshqa uskuna va qurilmalar mavjud. Barcha jihozlar bemorlarga kasalliklarni aniqlash, davolash va sogʻlom hayotga qaytarishda koʻmak beradi.

Klinika muassisi, kardiolog Faxriddin Ibodullayev, tibbiyot sohasida 20-yildan ortiq tajribaga ega. U Toshkent Tibbiyot akademiyasining Urganch filialida tahsil olgan boʻlib, soʻngra kardiologiya va nevrologiya boʻyicha malaka oshirgan.

Klinikada hozircha 10 nafar malakali xodim ishlamoqda. Shifokorlar orasida koʻp yillik tajriba va chuqur bilimga ega boʻlgan kardiolog, nevropatolog, endokrinolog hamda boshqa tor doiradagi malakali mutaxassislar bor. Yangi tibbiy muassasa va undagi zamonaviy texnologiyalar hamda taklif etilayotgan xizmatlar nafaqat kasalliklarni davolash, balki ularni erta tashxislash va oldini olish, shu orqali aholining salomatligini yanada mustahkamlashga hissa qoʻshishi shubhasiz.

Shohzod Qurbonboyev