Joʻqorgʻi Kenges Raisi Amudaryo tumanida mahallalardagi muammolarni hal etish boʻyicha ishlar bilan tanishdi

Yaqinda Amudaryo tumanidagi ichki xoʻjalik yoʻllarini taʼmirlash va obodonlashtirish boʻyicha keng koʻlamli ishlar boshlangan edi. 4-fevral kuni Qoraqalpogʻiston Respublikasi Joʻqorgʻi Kengesi Raisi Amanbay Orinbayev tumanda amalga oshirilayotgan ishlar bilan yaqindan tanishdi.

Joʻqorgʻi Kenges Raisi Choykoʻl, Xolimbeg ovullari va Toshqalʼa mahallasida boʻlib, ichki koʻchalariga qum-shagʻal aralashmasini yotqizish boʻyicha amalga oshirilayotgan ishlarni koʻzdan kechirdi. Shuningdek, hudud aholisi bilan yaqindan muloqot qildi.

Taʼkidlash joizki, koʻp sonli fuqarolar tomonidan ichki yoʻllarni taʼmirlash va infratuzilmani yaxshilash boʻyicha bildirilgan murojaatlar bugungi kunga kelib bosqichma-bosqich oʻz yechimini topmoqda.

Fuqarolar bilan muloqot davomida ham qator dolzarb muammolar aytib oʻtilib, Joʻqorgʻi Kenges Raisi koʻtarilgan masalalar yuzasidan mutasaddilarga aniq topshiriqlar berdi. Har bir oʻrinli muammo, albatta, oʻz yechimini topishini, yomgʻirli kunlarda loy, yozda chang bilan aholini qiynab kelgan tuproq yoʻllarning barchasi tosh yoʻllarga aylantirilishi aytib oʻtildi.

Oʻz navbatida, fuqarolar ham aholining yashash sharoitini yaxshilash boʻyicha amalga oshirilayotgan ishlar va alohida eʼtibor uchun Prezidentimizga oʻzining cheksiz minnatdorchiligini bildirdi.

Tashrif mobaynida Joʻqorgʻi Kenges Raisi azaldan bobo dehqonlar yurti boʻlgan Amudaryo tumanida aholi bandligini taʼminlash, kambagʻallikni qisqartirish maqsadida tomorqalardan samarali foydalanish, uy sharoitida dehqonchilik, hunarmandchilikni rivojlantirish borasida amalga oshirilayotgan ishlar bilan ham yaqindan tanishdi.

Dastlab Choykoʻl ovulida tomorqa madaniyati rivojiga hissa qoʻshayotgan Mahmud Norboyevning issiqxonasi koʻzdan kechirilib, dehqon bilan muloqot qilindi.

Shuningdek, Xolimbeg qishlogʻida yashovchi namunali tomorqa egasi Erkin Qoʻshayevning issiqxonada limon, qulupnay yetishtirish, uy sharoitida quyonchilik, chorvachilikni rivojlantirish boʻyicha amalga oshirayotgan samarali ishlari oʻrganildi.

Shu bilan birga, ushbu ovuldagi Ollambergan Ismoilovning uy sharoitida qishloq xoʻjaligi va oziq-ovqat mahsulotlarini saqlash borasidagi ishlari ham koʻzdan kechirildi.

Imtiyozli kredit mablagʻlari hisobidan 16 sotix yer maydonida issiqxona tashkil etgan Shavkat Oʻrazboyevning pomidordan moʻl hosil olayotgani ham Joʻqorgʻi Kenges Raisining eʼtiboridan chetda qolmadi. Dehqonlar bilan muloqot chogʻida yerdan samarali foydalanish va yuqori hosil olishning sirlarini chuqur oʻrgangan mehnatkashlar tajribasi koʻpchilikka namuna boʻlishi kerakligi alohida taʼkidlandi.

Taʼkidlash joizki, “Tomorqa – daromad manbai” degan fikr bugun ozgina yerning oʻzidan katta daromad olayotgan fuqarolar misolida oʻz tasdigʻini topayotgani sir emas. Har qarich yerdan samarali foydalangan, yer ilmini puxta bilgan holda mehnat qilgan insonning xonadoniga baraka kiradi.

Qoraqalpogʻiston Respublikasi Joʻqorgʻi Kengesining Axborot xizmati.