Жўқорғи Кенгес Раиси Амударё туманида маҳаллалардаги муаммоларни ҳал этиш бўйича ишлар билан танишди

Яқинда Амударё туманидаги ички хўжалик йўлларини таъмирлаш ва ободонлаштириш бўйича кенг кўламли ишлар бошланган эди. 4 февраль куни Қорақалпоғистон Республикаси Жўқорғи Кенгеси Раиси Аманбай Оринбаев туманда амалга оширилаётган ишлар билан яқиндан танишди.

Жўқорғи Кенгес Раиси Чойкўл, Холимбег овуллари ва Тошқалъа маҳалласида бўлиб, ички кўчаларига қум-шағал аралашмасини ётқизиш бўйича амалга оширилаётган ишларни кўздан кечирди. Шунингдек, ҳудуд аҳолиси билан яқиндан мулоқот қилди.

Таъкидлаш жоизки, кўп сонли фуқаролар томонидан ички йўлларни таъмирлаш ва инфратузилмани яхшилаш бўйича билдирилган мурожаатлар бугунги кунга келиб босқичма-босқич ўз ечимини топмоқда.

Фуқаролар билан мулоқот давомида ҳам қатор долзарб муаммолар айтиб ўтилиб, Жўқорғи Кенгес Раиси кўтарилган масалалар юзасидан мутасаддиларга аниқ топшириқлар берди. Ҳар бир ўринли муаммо, албатта, ўз ечимини топишини, ёмғирли кунларда лой, ёзда чанг билан аҳолини қийнаб келган тупроқ йўлларнинг барчаси тош йўлларга айлантирилиши айтиб ўтилди.

Ўз навбатида, фуқаролар ҳам аҳолининг яшаш шароитини яхшилаш бўйича амалга оширилаётган ишлар ва алоҳида эътибор учун Президентимизга ўзининг чексиз миннатдорчилигини билдирди.

Ташриф мобайнида Жўқорғи Кенгес Раиси азалдан бобо деҳқонлар юрти бўлган Амударё туманида аҳоли бандлигини таъминлаш, камбағалликни қисқартириш мақсадида томорқалардан самарали фойдаланиш, уй шароитида деҳқончилик, ҳунармандчиликни ривожлантириш борасида амалга оширилаётган ишлар билан ҳам яқиндан танишди.

Дастлаб Чойкўл овулида томорқа маданияти ривожига ҳисса қўшаётган Маҳмуд Норбоевнинг иссиқхонаси кўздан кечирилиб, деҳқон билан мулоқот қилинди.

Шунингдек, Холимбег қишлоғида яшовчи намунали томорқа эгаси Эркин Қўшаевнинг иссиқхонада лимон, қулупнай етиштириш, уй шароитида қуёнчилик, чорвачиликни ривожлантириш бўйича амалга ошираётган самарали ишлари ўрганилди.

Шу билан бирга, ушбу овулдаги Олламберган Исмоиловнинг уй шароитида қишлоқ хўжалиги ва озиқ-овқат маҳсулотларини сақлаш борасидаги ишлари ҳам кўздан кечирилди.

Имтиёзли кредит маблағлари ҳисобидан 16 сотих ер майдонида иссиқхона ташкил этган Шавкат Ўразбоевнинг помидордан мўл ҳосил олаётгани ҳам Жўқорғи Кенгес Раисининг эътиборидан четда қолмади. Деҳқонлар билан мулоқот чоғида ердан самарали фойдаланиш ва юқори ҳосил олишнинг сирларини чуқур ўрганган меҳнаткашлар тажрибаси кўпчиликка намуна бўлиши кераклиги алоҳида таъкидланди.

Таъкидлаш жоизки, “Томорқа – даромад манбаи” деган фикр бугун озгина ернинг ўзидан катта даромад олаётган фуқаролар мисолида ўз тасдиғини топаётгани сир эмас. Ҳар қарич ердан самарали фойдаланган, ер илмини пухта билган ҳолда меҳнат қилган инсоннинг хонадонига барака киради.

Қорақалпоғистон Республикаси Жўқорғи Кенгесининг Ахборот хизмати.