Imtiyozli tavsiyanoma uchun test sinovlari tashkil etildi

Oʻzbekiston Respublikasi Qurolli Kuchlari safida muddatli harbiy xizmatni oʻtagan yoshlar uchun oliy taʼlim muassasalariga kirishda imtiyoz taqdim etadigan tavsiyanoma ularning kelajakdagi taʼlim va kasbiy faoliyatida muhim oʻrin tutadi.

7-fevral kuni Amudaryo muhandislik texnikumida tuman hududidagi Davlat xavfsizlik xizmati Chegara qoʻshinlariga qarashli harbiy qismlarda xizmat qilayotgan muddatli harbiy xizmatchilar oʻrtasida oliy taʼlim muassasalariga kirishda imtiyoz beruvchi tavsiyanoma uchun test sinovlari tashkil etildi.

Jarayon avvalida Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligining Qoraqalpogʻiston Respublikasi boʻlimi masʼullari tomonidan ishtirokchilarga test jarayonining tartibi, asosiy mezonlari va muhim jihatlari haqida tushunchalar berildi.

Muddatli harbiy xizmatchilarga imtiyozli tavsiyanoma berish jarayoni ularning xizmat davomida erishgan natijalari hamda bilim saviyasi asosida baholanadi. Ushbu jarayonda askarlarning jangovar tayyorgarligi, maʼnaviy-maʼrifiy saviyasi va nazariy bilimlari asosiy mezon sifatida koʻrib chiqiladi. Jangovar tayyorgarlik – harbiy xizmat davomida oʻtkazilgan amaliy mashgʻulotlarda koʻrsatgan natijalari asosida, maʼnaviy-maʼrifiy tayyorgarlik esa askarlarning vatanparvarlik ruhida tarbiyalanganligi, intizomi va huquqiy bilimlari darajasi boʻyicha baholanadi. Nazariy bilimlarni aniqlash maqsadida esa harbiy xizmatchilar matematika, fizika va mantiqiy tafakkurga oid test sinovlaridan oʻtadilar.

Tavsiyanoma harbiy xizmat davomida oʻzini intizomli, bilimli va faol sifatida namoyon etgan askarlarga taqdim etiladi. Agar askar xizmat davomida intizomiy qoidabuzarliklarga yoʻl qoʻygan yoki jazo olgan boʻlsa, u tavsiyanoma olish huquqidan mahrum qilinadi. Ushbu tizim, bir tomondan, harbiy xizmat intizomini mustahkamlashga xizmat qilsa, ikkinchi tomondan, oliy taʼlimga intilayotgan yoshlarni oʻz bilim va mahoratini oshirishga ragʻbatlantiradi.

Maxsus test sinovlari 100 ta savoldan iborat boʻlib, harbiy xizmatchilarning turli yoʻnalishlardagi tayyorgarlik darajasini aniqlashga qaratilgan. Baholash tizimi askarlarning jangovar hamda maʼnaviy-maʼrifiy tayyorgarligi, shuningdek, matematika, fizika va mantiqiy tafakkurga oid bilimlarini qamrab oladi.

Test natijalari harbiy xizmatni oʻtayotgan yoshlarning bilim darajasini aniq belgilash barobarida, ularning kelajakda oliy taʼlim muassasalarida oʻqish imkoniyatini oshirish hamda tafakkurini yanada rivojlantirishga xizmat qiladi.

Tavsiyanomaga ega boʻlgan harbiy xizmatchilar oliy taʼlim muassasalariga kirishda test natijalari boʻyicha toʻplagan ballarining 50 foizi miqdorida qoʻshimcha ballga ega boʻlishadi. Shuningdek, oliy taʼlim muassasalariga qabul jarayonida harbiy xizmatni oʻtagan abituriyentlar uchun alohida kvotalar ajratiladi. Tavsiyanomaning amal qilish muddati uch yil boʻlib, bu harbiy xizmatdan soʻng yoshlarning oʻqishga kirish rejalari ustida ishlashi uchun yetarli imkoniyat yaratadi. Ushbu imtiyozlar harbiy xizmatni oʻtagan yoshlarning intellektual rivojlanishini qoʻllab-quvvatlash va ularning kelajakdagi taʼlim jarayoniga keng yoʻl ochish maqsadida joriy etilgan.

Muddatli harbiy xizmatni oʻtab, oliy taʼlim muassasalarida tahsil olishni maqsad qilgan yoshlar uchun bunday imtiyozlar, shubhasiz, katta ahamiyat kasb etadi.

Shohzod Qurbonboyev