Bobur nomli ovulda tomorqadan samarali foydalanishga doir seminar oʻtkazildi

Prezident topshirigʻiga muvofiq, mamlakatimizda ishsiz xotin-qizlarning bandligini taʼminlash maqsadida bir qator amaliy chora-tadbirlar amalga oshirilmoqda. Jumladan, tomorqalarda anjir va xurmo yetishtirish boʻyicha loyihalar yoʻlga qoʻyilib, bu tashabbus mahalliy hokimiyat organlari, qishloq xoʻjaligi mutaxassislari va banklar tomonidan qoʻllab-quvvatlanmoqda. Xotin-qizlarga zaruriy koʻmak, resurslar va amaliy hamda nazariy bilimlar berib borilmoqda.

Yaqinda Bobur nomli ovulda mazkur loyiha doirasida seminar tashkil etildi. Unda tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova, “Agrobank” ATB Nukus shahar va tuman filiali masʼullari, shu ovuldagi “yettilik” aʼzolari hamda aholi vakillari ishtirok etishdi.

Tadbirda mutaxassislar tomorqalardan samarali foydalanish, ularni daromad manbai sifatida rivojlantirish imkoniyatlari haqida fikr almashishdi. Yerga mehr qoʻygan inson hech qachon ziyon koʻrmasligi, mehnat barakasi uning hayotida muhim ahamiyat kasb etishi taʼkidlandi. Shu bois, xotin-qizlarga mevali daraxtlarni yetishtirish boʻyicha amaliy mashgʻulotlar oʻtkazilmoqda, ular sifatli koʻchatlar, urugʻlar va zarur agrotexnika vositalari bilan taʼminlanmoqda.

Shuningdek, xotin-qizlarning tadbirkorlik faoliyatini qoʻllab-quvvatlash maqsadida banklar tomonidan imtiyozli kreditlar ajratilishi, bu esa ishbilarmonlik muhitini yanada rivojlantirishga xizmat qilishi qayd etildi.

Seminar davomida ishtirokchilar anjir va xurmo koʻchatlarini ekish jarayonida faol ishtirok etishdi. Mutaxassislar mazkur mevalarning parvarishi, sugʻorish va hosildorlikni oshirish boʻyicha tavsiyalar berishdi. Shuningdek, tajribali bogʻbonlar oʻz bilim va koʻnikmalarini yoshlarga oʻrgatish zarurligiga eʼtibor qaratildi.

Mazkur tashabbus ishsiz xotin-qizlarga oʻz tomorqalarida anjir va xurmo yetishtirish orqali qoʻshimcha daromad manbaiga ega boʻlish imkonini yaratadi. Loyiha doirasida tomarqachilar va tadbirkorlar oʻrtasida hamkorlik aloqalarini yoʻlga qoʻyish imkoniyatlari muhokama qilindi.

Xotin-qizlarning tadbirkorlik faoliyatini qoʻllab-quvvatlash va ularni ish bilan taʼminlash boʻyicha davlat dasturlari ishlab chiqilgan boʻlib, ular Prezidentning tegishli Farmon va Qarorlari bilan mustahkamlab qoʻyilgan. Ushbu dasturlar doirasida xotin-qizlarni ish bilan taʼminlash, tadbirkorlikka yoʻnaltirish, kasb-hunar oʻrgatish va imtiyozli kreditlar ajratish kabi keng koʻlamli ishlar amalga oshirilmoqda.

Xotin-qizlar uchun tomorqalarda anjir va xurmo yetishtirish loyihasi nafaqat ularning bandligini taʼminlash, balki mahalliy bozorni sifatli mahsulotlar bilan toʻldirishga ham xizmat qiladi. Davlat tomonidan amalga oshirilayotgan dasturlar har bir fuqaroni tadbirkorlikka yoʻnaltirish, oʻz ishini boshlashi va mustaqil daromad topishi uchun keng imkoniyatlar yaratmoqda.

Seminardan soʻng, Navroʻz umumxalq bayrami munosabati bilan tuman hokimi oʻrinbosari Goʻzal Saburova va mutasaddilar Jumur ovul mahalla fuqarolar yigʻini hududida yashovchi 95 yoshli nuroniy Bika ona Rahimova xonadoniga tashrif buyurib, onaxonning holidan xabar olishdi.

Bika ona Rahimova 1930-yilda Amudaryo tumanida tavallud topgan. U 1948-yilda Bekimbat ota Patiyev bilan oila qurib, 3 nafar oʻgʻil va 3 nafar qizni voyaga yetkazdi. Turmush oʻrtogʻi 1973-yilda vafot etganidan soʻng, barcha masʼuliyatni zimmasiga olib, farzandlarini halollik va mehnatsevarlikka oʻrgatib, katta hayotga tayyorladi. Umri davomida front ortida – ovul xoʻjaligida astoydil mehnat qilib, oilasi va jamiyat rivojiga oʻzining munosib hissasini qoʻshdi. Bika ona bugungi kunda farzandlari, nabira va evaralari bagʻrida tinch va baxtli hayot kechirmoqda.

Bunday tashriflar yoshi ulugʻ insonlarga boʻlgan hurmat va eʼtiborning yorqin ifodasi boʻlib, nuroniylarning shodu-xurramligi yurt taraqqiyotiga oʻz hissasini qoʻshadi.

Shohzod Qurbonboyev.