Oʻzbekiston taʼlim va fan xodimlari kasaba uyushmasi Amudaryo tuman boʻlinmasi raisi saylandi

Yurtimizda joriy yilda kasaba uyushmalari tizimida hisobot-saylov konferentsiyalari oʻtkazilmoqda. Ushbu jarayonlar orqali mehnat jamoalari oʻz vakillarini erkin va shaffof asosda saylash, kasaba uyushmalari faoliyatini tanqidiy baholash hamda kelgusidagi ustuvor vazifalarni belgilab olish imkoniga ega boʻlmoqda. 12-may kuni shunday muhim tadbirlardan biri Amudaryo tumanida ham oʻtkazildi.

Amudaryo tumani Maktabgacha va maktab taʼlimi boʻlimi tasarrufidagi 82-sonli umumtaʼlim maktabida Oʻzbekiston taʼlim va fan xodimlari kasaba uyushmasi Amudaryo tuman boʻlinmasi faoliyatining 2020–2025-yillar davomidagi faoliyati boʻyicha hisobot-saylov konferentsiyasi boʻlib oʻtdi. Unda Oʻzbekiston kasaba uyushmalari Federatsiyasining Qoraqalpogʻiston Respublikasi Kengashi tashkiliy ishlar boʻlimi mudiri, Respublika Kengashining Qoraqalpogʻiston Respublikasi boʻyicha masʼul tashkilotchisi, Oʻzbekiston taʼlim va fan xodimlari kasaba uyushmasi Respublika Kengashi bosh hisobchisi hamda kasaba uyushmalari tashkilotlarining tuman kengashi raislari ishtirok etdilar.

Tadbirda tuman boʻlinmasi Kengashining 2020-2025-yillar davomidagi faoliyati yuzasidan Kengash raisi Ulugʻbek Abdurahmonov hisobot berdi. Shundan soʻng taftish komissiyasining hisoboti tinglanib, tasdiqlandi.

Maʼlumot oʻrnida taʼkidlash joizki, kasaba uyushmasi — fuqarolarning mehnatga oid va ijtimoiy-iqtisodiy manfaatlarini ifoda etish hamda himoya qilish maqsadida tuziladigan ixtiyoriy jamoat birlashmasi hisoblanadi. Uyushma oʻz faoliyatini Oʻzbekiston Respublikasining Konstitutsiyasi, “Kasaba uyushmalari toʻgʻrisida”gi Qonun, “Jamoat birlashmalari toʻgʻrisida”gi, “Nodavlat notijorat tashkilotlar toʻgʻrisida”gi Qonunlar hamda sohaviy ustavlar asosida amalga oshiradi.

2019-yil 6-dekabrda qabul qilingan “Kasaba uyushmalari toʻgʻrisida”gi Qonunda fuqarolarning ushbu uyushmalarga erkin birlashish huquqi kafolatlangan. Mehnat faoliyatini amalga oshirayotgan shaxslar, shuningdek, oʻquv yurtlarida tahsil olayotgan 15 yoshdan katta shaxslar kasaba uyushmalariga aʼzo boʻlish yoki ularni tuzish huquqiga egadirlar.

Kasaba uyushmalari oʻz faoliyatini qonuniylik, ixtiyoriylik, kamsitishga yoʻl qoʻymaslik, mustaqillik, teng huquqlilik, shuningdek, ochiqlik va oshkoralik kabi tamoyillarga tayangan holda amalga oshiradi.

Tashkilot mehnat huquqlarini himoya qilish, xodimlarning ijtimoiy-iqtisodiy manfaatlarini taʼminlash, xavfsiz va sogʻlom mehnat muhitini shakllantirish, ish beruvchi va xodim oʻrtasidagi munosabatlarni tartibga solishda faol ishtirok etadi. Jumladan, jamoa shartnomalari tuzish, maosh va taʼtil shartlarini belgilash, mehnat qonunchiligiga amal qilinishi yuzasidan jamoatchilik nazoratini amalga oshirishda muhim rol oʻynaydi.

Konferentsiya doirasida yashirin ovoz berish yoʻli bilan tashkilotning tuman boʻlinmasi Kengashi raisi lavozimiga ushbu lavozimda ishlab kelayotgan Ulugʻbek Abdurahmonov saylandi. Shuningdek, tuman Kengashi aʼzolari, taftish komissiyasining yangi tarkibi, taftish komissiyasi raisi hamda Qoraqalpogʻiston Respublikasi konferentsiyasiga delegatlar saylandi.

Konferentsiyadan soʻng tuman Kengashining birinchi tashkiliy plenumi boʻlib oʻtdi. Unda jamoatchilik asosida rais oʻrinbosari va ijroiya qoʻmita aʼzolari tasdiqlandi.

Taʼlim va fan xodimlari kasaba uyushmasi soha xodimlarining maʼnaviy, huquqiy va ijtimoiy farovonligini taʼminlashda muhim oʻrin tutadigan jamoat tashkilotidir. Oʻtkazilgan hisobot-saylov konferentsiyasi ham ana shu yuksak maqsad va vazifalarni yana bir bor eslatib, tashkilotning jamiyat hayotidagi oʻrnini mustahkamlashga xizmat qildi.

Shohzod Qurbonboyev tayyorladi.