Ўзбекистон таълим ва фан ходимлари касаба уюшмаси Амударё туман бўлинмаси раиси сайланди
Юртимизда жорий йилда касаба уюшмалари тизимида ҳисобот-сайлов конференциялари ўтказилмоқда. Ушбу жараёнлар орқали меҳнат жамоалари ўз вакилларини эркин ва шаффоф асосда сайлаш, касаба уюшмалари фаолиятини танқидий баҳолаш ҳамда келгусидаги устувор вазифаларни белгилаб олиш имконига эга бўлмоқда. 12 май куни шундай муҳим тадбирлардан бири Амударё туманида ҳам ўтказилди.
Амударё тумани Мактабгача ва мактаб таълими бўлими тасарруфидаги 82-сонли умумтаълим мактабида Ўзбекистон таълим ва фан ходимлари касаба уюшмаси Амударё туман бўлинмаси фаолиятининг 2020–2025 йиллар давомидаги фаолияти бўйича ҳисобот-сайлов конференцияси бўлиб ўтди. Унда Ўзбекистон касаба уюшмалари Федерациясининг Қорақалпоғистон Республикаси Кенгаши ташкилий ишлар бўлими мудири, Республика Кенгашининг Қорақалпоғистон Республикаси бўйича масъул ташкилотчиси, Ўзбекистон таълим ва фан ходимлари касаба уюшмаси Республика Кенгаши бош ҳисобчиси ҳамда касаба уюшмалари ташкилотларининг туман кенгаши раислари иштирок этдилар.
Тадбирда туман бўлинмаси Кенгашининг 2020-2025 йиллар давомидаги фаолияти юзасидан Кенгаш раиси Улуғбек Абдураҳмонов ҳисобот берди. Шундан сўнг тафтиш комиссиясининг ҳисоботи тингланиб, тасдиқланди.
Маълумот ўрнида таъкидлаш жоизки, касаба уюшмаси — фуқароларнинг меҳнатга оид ва ижтимоий-иқтисодий манфаатларини ифода этиш ҳамда ҳимоя қилиш мақсадида тузиладиган ихтиёрий жамоат бирлашмаси ҳисобланади. Уюшма ўз фаолиятини Ўзбекистон Республикасининг Конституцияси, “Касаба уюшмалари тўғрисида”ги Қонун, “Жамоат бирлашмалари тўғрисида”ги, “Нодавлат нотижорат ташкилотлар тўғрисида”ги Қонунлар ҳамда соҳавий уставлар асосида амалга оширади.
2019 йил 6 декабрда қабул қилинган “Касаба уюшмалари тўғрисида”ги Қонунда фуқароларнинг ушбу уюшмаларга эркин бирлашиш ҳуқуқи кафолатланган. Меҳнат фаолиятини амалга ошираётган шахслар, шунингдек, ўқув юртларида таҳсил олаётган 15 ёшдан катта шахслар касаба уюшмаларига аъзо бўлиш ёки уларни тузиш ҳуқуқига эгадирлар.
Касаба уюшмалари ўз фаолиятини қонунийлик, ихтиёрийлик, камситишга йўл қўймаслик, мустақиллик, тенг ҳуқуқлилик, шунингдек, очиқлик ва ошкоралик каби тамойилларга таянган ҳолда амалга оширади.
Ташкилот меҳнат ҳуқуқларини ҳимоя қилиш, ходимларнинг ижтимоий-иқтисодий манфаатларини таъминлаш, хавфсиз ва соғлом меҳнат муҳитини шакллантириш, иш берувчи ва ходим ўртасидаги муносабатларни тартибга солишда фаол иштирок этади. Жумладан, жамоа шартномалари тузиш, маош ва таътил шартларини белгилаш, меҳнат қонунчилигига амал қилиниши юзасидан жамоатчилик назоратини амалга оширишда муҳим роль ўйнайди.
Конференция доирасида яширин овоз бериш йўли билан ташкилотнинг туман бўлинмаси Кенгаши раиси лавозимига ушбу лавозимда ишлаб келаётган Улуғбек Абдураҳмонов сайланди. Шунингдек, туман Кенгаши аъзолари, тафтиш комиссиясининг янги таркиби, тафтиш комиссияси раиси ҳамда Қорақалпоғистон Республикаси конференциясига делегатлар сайланди.
Конференциядан сўнг туман Кенгашининг биринчи ташкилий пленуми бўлиб ўтди. Унда жамоатчилик асосида раис ўринбосари ва ижроия қўмита аъзолари тасдиқланди.
Таълим ва фан ходимлари касаба уюшмаси соҳа ходимларининг маънавий, ҳуқуқий ва ижтимоий фаровонлигини таъминлашда муҳим ўрин тутадиган жамоат ташкилотидир. Ўтказилган ҳисобот-сайлов конференцияси ҳам ана шу юксак мақсад ва вазифаларни яна бир бор эслатиб, ташкилотнинг жамият ҳаётидаги ўрнини мустаҳкамлашга хизмат қилди.
Шоҳзод Қурбонбоев тайёрлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
