Aholini toza ichimlik suvi bilan taʼminlash – davlat siyosatining ustuvor yoʻnalishi

Davlatimiz rahbarining maxsus qaroriga asosan Osiyo taraqqiyot banki ishtirokida Amudaryo tumanida Mangʻit suv tozalash inshootini qurish boʻyicha pudratchi tashkilot “Obi hayot injiniring” bilan 12,99 mln. dollarlik shartnoma imzolangan edi. Shartnoma doirasida kuniga 40 ming kub metr suvni tozalash quvvatiga ega boʻlgan boʻlgan inshootni qurish nazarda tutilgan. Ayni kunlarda hajmi 66,5 ming kub metr boʻlgan suv tindirish havzasi, 1- va 2-koʻtarma nasos stantsiyalari, gorizontal suv tindirgichlar, xlorlash va filtrlash stantsiyalari, reagent xoʻjaligi, hajmi 3 ming kub metr boʻlgan 2 dona rezervuar va laboratoriya-dispetcherlik korpusini qurish ishlari jadal surʼatlarda olib borilmoqda.

19-may kuni ushbu suv tozalash inshooti qurilishi jarayonlari bilan tanishish maqsadida ommaviy axborot vositalari vakillari uchun press-tur tashkil etildi. Unda Qoraqalpogʻiston Respublikasi Vazirlar Kengashi Axborot xizmati masʼullari, Oʻzbekiston miqyosidagi telekanallarining Qoraqalpogʻistondagi muxbirlari, respublikada faoliyat olib borayotgan OAV vakillari hamda soha masʼullari ishtirok etdi. Tadbir doirasida jurnalist va muxbirlar qurilish davom etayotgan obʼektga tashrif buyurib, amalga oshirilayotgan ishlar bilan bevosita tanishdi.

Press-tur mobaynida "Qoraqalpoq suv taʼminoti" AJning boshqaruv raisi Qallibek Xalmuratov OAV vakillariga “Mangʻit suv tozalash inshooti”ning qurilishi aholining ichimlik suviga boʻlgan talabini qanoatlantirishda qanchalik muhim ahamiyat kasb etishi xususida maʼlumot berib oʻtdi.

Taʼkidlanganidek, davlatmiz rahbarining Amudaryo, Beruniy, Qoraoʻzak, Qoʻngʻirot, Nukus va Moʻynoq tumanlaridagi aholi va xoʻjalik yurituvchi subʼektlarning sifatli ichimlik suvi taʼminotini yanada yaxshilash, shuningdek, Osiyo taraqqiyot banki bilan hamkorlikni kengaytirish maqsadida “Osiyo taraqqiyot banki ishtirokida “Oʻzbekistonning gʻarbiy qismida ichimlik suvi taʼminoti tizimlarini rivojlantirish” loyihasini amalga oshirish chora-tadbirlari toʻgʻrisida” qarori bu boradagi ishlarda muhim dasturulamal boʻlmoqda.

Press-tur yakunida Amudaryo tumani hokimligining majlislar zalida matbuot anjumani boʻlib oʻtdi. Unda “Qoraqalpoq suv taʼminoti” aktsiyadorlik jamiyati direktori Qallibek Xalmuratov soʻzga chiqib, suv taʼminoti tizimini yanada takomillashtirish borasida olib borilayotgan islohotlar ijrosi yuzasidan jamiyat tomonidan amalga oshirilayotgan loyihalar, istiqboldagi rejalar va isteʼmolchilar uchun yaratilayotgan qulayliklar haqida batafsil maʼlumot berdi.

Qayd etish joizki, yurtimizda aholining turmush farovonligini oshirish, sogʻlom turmush tarzini taʼminlash hamda ekologik muammolarni bartaraf etish borasida bir qator islohotlar amalga oshirilmoqda. Xususan, aholiga sifatli va xavfsiz ichimlik suvi yetkazib berish masalasi davlat siyosatining ustuvor yoʻnalishlaridan biri sifatida belgilanmoqda. Mamlakatimizda suv resurslarining cheklanganligi va iqlim oʻzgarishlari natijasida ichimlik suviga boʻlgan ehtiyoj tobora ortib bormoqda. Shu bois, soʻnggi yillarda suv taʼminoti tizimini modernizatsiya qilish, yangi suv inshootlarini qurish va mavjudlarini rekonstruktsiya qilish boʻyicha koʻplab loyihalar amalga oshirilmoqda.

Qolaversa, aholini toza ichimlik suvi bilan taʼminlash borasida xalqaro moliyaviy institutlar, jumladan, Jahon banki, Osiyo taraqqiyot banki, Yevropa tiklanish va taraqqiyot banki bilan hamkorlikda yirik investitsiya loyihalari amalga oshirilmoqda. Bu esa ilgʻor texnologiyalarni joriy etish, energiya tejamkor uskunalarni oʻrnatish va xizmat koʻrsatish sifatini oshirishga xizmat qilmoqda.

Matbuot anjumani davomida jurnalistlar oʻzlarini qiziqtirgan savollarga javob oldi va mavjud muammolarni bartaraf etish boʻyicha fikrlar bildirildi.

Charos Arslonova, tuman hokimligining Axborot xizmati rahbari.