“Ilm – eng buyuk sharaf!” shiori ostida “Soʻnggi qoʻngʻiroq” tadbirlari yuqori shukuhda oʻtdi

Yurtimiz boʻylab oʻquv yili yakunlanishi bilan anʼanaviy tarzda nishonlanadigan “Soʻnggi qoʻngʻiroq” bayrami bu yil barcha umumtaʼlim maktablarida “Ilm – eng buyuk sharaf!” shiori ostida koʻtarinki ruhda, yuqori tashkiliy saviyada oʻtkazildi. Shu kuni maktab bitiruvchilari yuksak hayajon va bir olam orzular ogʻushida jonajon maktabi bilan xayrlashib, katta hayotga dadil qadam tashlashdi.

Amudaryo tumandagi barcha umumtaʼlim maktablarda ushbu tadbir uchun munosib tayyorgarlik koʻrilib, “Soʻnggi qoʻngʻiroq” kechasi bayramona ruhda tashkil etildi. 22-sonli umumtaʼlim maktabida oʻtkazilgan tadbirda tuman hokimi Sobir Xoʻjametov boshchiligida rahbarlar, nuroniy ustozlar, ota-onalar, keng jamoatchilik va OAV vakillari ishtirok etishdi.

Tadbirda tuman hokimi Sobir Xoʻjametov soʻzga chiqib, bitiruvchilar uchun bayramona tabriklar va samimiy tilaklar bildirdi. Tuman hokimi oʻz nutqida yoshlarga Vatan, xalq, ota-onalar va ustozlari oldidagi burchini chuqur anglab, kelajakda yetuk mutaxassis, el-yurtga munosib farzand boʻlib yetishishlariga tilakdosh ekanini taʼkidladi. Shuningdek, zamonaviy bilim olish, texnologiyalarni egallash va yurt ravnaqi yoʻlida fidokorona xizmat qilish yoshlar uchun asosiy maqsad boʻlishi lozimligini qayd etdi.

Taʼkidlash joizki, tumanimizdagi barcha maktablarda “Ilm – eng buyuk sharaf!” shiori ostida oʻtkazilgan tadbirlar davomida joriy oʻquv yilining soʻnggi qoʻngʻirogʻi yangradi. Davlat imtihonlaridan keyin 3480 nafar oʻquvchi yoshlarimiz yetuklik shahodatnomalarini olib, katta hayot sari yoʻllanma oladilar. Joriy oʻquv yilida tuman boʻyicha bitiruvchilarning 29 nafari oltin, 7 nafari kumush medal bilan taqdirlangani yoshlarimizning bilimi va intiluvchanligi naqadar yuksak ekanidan dalolat beradi.

Qayd etib oʻtish joizki, oʻtgan oʻquv yilida 22-sonli umumtaʼlim maktabining 11-sinfini 48 nafar oʻquvchi yoshlarimiz bitirib, shundan 38 nafari, yaʼni salkam 80 foizi oliy taʼlim muassasalariga oʻqishga qabul qilingan. Bu koʻrsatkich boʻyicha maktab tumanda 1-oʻrinni egallagan. Joriy oʻquv yilida esa 11-sinfni 71 nafar oʻquvchi bitirmoqda.

Tadbirda soʻzga chiqqanlar bitiruvchilarga yangi Oʻzbekistonda, zamonaviy sharoitlarda taʼlim-tarbiya olgan yosh avlod vakillari sifatida davlatimiz tomonidan yaratilayotgan imkoniyatlarni qadrlab, ulardan yanada samarali foydalanishlari, yurt ravnaqi hamda Vatanimizning porloq kelajagi uchun munosib hissa qoʻshadigan avlod boʻlib voyaga yetishlari, hayotda oʻz oʻrnini topishlari hamda Vatan uchun munosib farzand boʻlishlariga yuksak ishonch bildirdi.

Tadbir davomida eng faol bitiruvchilarga va ularning ota-onalariga esdalik sovgʻalari hamda faxriy yorliqlar topshirildi.

Shuningdek, ijodiy jamoamiz bilan tumanimizdagi 36-, 40- sonli umumtaʼlim maktablaridagi “Ilm – eng buyuk sharaf” shiori ostidagi oʻtkazilayotgan “Soʻnggi qoʻngʻiroq” tadbirlariga tashrif chogʻida bitiruvchi yoshlarning, maktablar jamoalarining his-hayajoni va quvonchlariga sherik boʻldik.

Katta hayot ostonasida turib, kelajak rejalarini tuzayotgan bitiruvchilar nigohlarida jonajon maktabi, ustozlari va sinfdoshlari bilan xayrlashuv onlarining ogʻriqlari, shu bilan bir qatorda kelgusi mustaqil hayot oldidagi masʼuliyat va quvonch tuygʻulari aks etib turar edi. Yuzlaridagi samimiyat, qalblaridagi orzular, koʻksidagi hayajon, koʻzlaridagi yosh va lablaridagi tabassum bilan ramziy soʻnggi qoʻngʻiroqning unutilmas sadolari ostida maktab bilan xayrlashayotgan yoshlar ushbu kunni bir umr xotiralarida saqlab qolishi shubhasiz.

Taʼkidlash joizki, ushbu taʼlim maskanlari nafaqat tumanimiz, balki respublikamiz taʼlim sohasi rivojiga munosib hissa qoʻshib kelmoqda. Oʻquvchilarning turli yoʻnalishlarda erishayotgan yutuqlari bilan bir qatorda maktablar pedagogik jamoasining hamjihatligi, oʻqituvchilarning respublika koʻrik-tanlovlaridagi muvaffaqiyatlarini ham har qancha eʼtirof etsak, arziydi. Tadbirlar doirasida taʼlim sohasida yuksak natijalarga erishayotgan ustozlar ragʻbatlantirilib, ularga yuksak ehtirom koʻrsatildi.

Qayd etish joizki, davlatimiz va hukumatimiz muhtaram Prezidentimiz tomonidan barcha sohalarda oldinga qoʻyilayotgan katta maqsadlarga erishishning eng muhim omili sifatida taʼlim-tarbiya sohasiga juda katta ahamiyat bermoqda. Zero, kelgusi islohotlarning tashkilotchilari va ijrochilari boʻlmish kadrlar aynan umumtaʼlim, kasb-hunar taʼlimi va oliy taʼlim muassasalarida tahsil oladi, tarbiyalanadi. Shu sababli ham yurtimizda bitiruvchi yoshlarni oliy taʼlim bilan qamrab olish darajasi yil sayin ortib, 2024-yilda bu koʻrsatkich 53,6 foizga yetdi. Mazkur koʻrsatkichni joriy yilda 68 foizga, 2030-yilda esa 86 foizga yetkazish rejalashtirilgan.

Fursatdan foydalanib, barcha bitiruvchi yoshlarning oliy taʼlim muassasalariga oʻqishga kirishlariga, ilm-fan va kasb-hunar sirlarini puxta egallab, Vatanimizga xizmat qiladigan yetuk kadrlar boʻlib yetishishlariga tilakdoshmiz! Ularning oʻz oldlariga yuqori maqsadlar qoʻyib, doimo bilim va koʻnikmalarini oshirib borishlari, yangi kasb-hunarlarni egallashlari va eng asosiysi, maqsadlari sari tinmay harakat qilishlarida kuch-gʻayrat va shijoat tilaymiz!

Oʻrganish, izlanish va intilishdan, ilm olishdan aslo toʻxtamang, barchangizga sihat-salomatlik, ishda va oʻqishda, shaxsiy hayotda katta yutuq va omadlar tilaymiz, aziz bitiruvchilar!

Mustaqil hayot sari tashlayotgan dadil qadamingiz qutlugʻ boʻlsin!

Charos Arslonova, tuman hokimligining Axborot xizmati rahbari.